ދަ ޑިމޮކްރެޓްސްއިން ބޭއްވި އެޕާޓީގެ އެންމެ ފުރަތަމަ އެތެރޭގެ އިންތިޚާބުން ރައީސް ކަމަށް ހޮވިފައި ވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފު ކަމަށް އިންތިޚާބުގެ ވަގުތީ ނަތީޖާއިން ދައްކައިފިއެވެ.
ދަ ޑިމޮކްރެޓްސްގެ ފަރާތުން މެދު ހެންވޭރު ދާއިރާގެ މެންބަރު އަލީ އާޒިމް ވަނީ އެޕާޓީގެ ވަގުތީ ނަތީޖާ މިރޭ އިއުލާން ކުރައްވާފައެވެ.
މި އިންތިހާބުގައި ޑިމޮކްރެޓްސްގެ ރައީސް އަދި ނައިބު ރައީސް ހިމެނޭހެން 23 މަޤާމަކަށް ބޭފުޅުން އައްޔަން ކުރުމަށް ވަނީ ވޯޓުލާފައެވެ.
ވަގުތީ ނަތީޖާ ދައްކާގޮތުން ޖުމުލަ 1704 ވޯޓާއި އެކު ހެންވޭރު ހުޅަނގު ދާއިރާގެ މެންބަރު ހަސަން ލަތީފުވަނީ ކުރިހޯއްދަވާފައެވެ. މީގެ އިތުރުން ހަސަން ލަތީފުއާއި ވާދަކުރެއްވި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު މުހައްމަދު ރަޝާދަށް ލިބިފައި ވަނީ 1300 ވޯޓެވެ.
ވޯޓުގެ ވަގުތީ ނަތީޖާ އިއުލާނުކުރައްވަމުން އާޒިމް ވިދާޅުވީ، 5،888 މީހުން ވޯޓުލުމުގެ ހައްގު ލިބުނުއިރު، ވޯޓުލާފައި ވަނީ 3،209 މެންބަރަކު ކަމަށެވެ. އަދި މިއީ މީގެ ކުރިން ދުވަހަކުވެސް ސިޔާސީ ޕާޓީއަކުން އެތެރޭގެ އިންތިހާބެއްގައި މިހާގިނަ މީހުން ނުކުމެ ވޯޓުލާފައިވާ ފުރަތަމަ ފަހަރުކަމަށެވެ.
އާޒިމް ވިދާޅުވީ މި އިންތިހާބުގެ ވޯޓުގެ ތެރެއިން 16 ޝަކުވާއެއް ލިބިފައިވާ ކަމަށެވެ.
ހޮނިހިރު ދުވަހުގެ ހެނދުނު 10:00 އިން ހަވީރު 04:00 އަށް އެޕާޓީގެ ފުރަތަމަ އިންތިޚާބުގެ ވޯޓުލުން ވަނީ ކުރިއަށް ގެންގޮސްފައެވެ. މި އިންތިހާބުގެ ނަތީޖާ އިއުލާނު ނުކޮށް ލަސްވެގެންދާތީ އެޕާޓީގެ ގިނަ މެންބަރުންތަކެއް ވަނީ ކަންބޮޑުވުން ފާޅުކޮށް ފާޑުކިޔާފައެވެ.
Advertisement
This content is created and paid for by advertisers and does not involve Voice Journalists
