އެންމެ މުހިންމު ކަމެއްކަމުގައި ދެކެނީ އަމިއްލަ މަސްލަހަތަށްވުރެ ރައްޔިތުނަށްނަށް ހިދުމަތްކުރުންކަމަށް، ކުރީގެ ރައީސް މުހައްމަދު ނަޝީދު އިސްކޮށް ހުންނަވާ، އެމަނިކުފާނަށް ތާއީދު ކުރާ ފަރާތްތަކުން އަލަށް އުފެއްދި ޕާޓީ، ދަ ޑިމޮކްރެޓްސް ގެ އަންހެނުންގެ ނައިބު ރައީސް އަކަށް ހޮވިފައިވާ އައިޝަތު އަލައިކާ އަދުނާން ބުނެފިއެވެ.

ހޮނިހިރު ދުވަހުގެ ހެދުނު 10:00 އިން ހަވީރު 04:00 އަށް ކުރިއަށް ދިޔަ ޑިމޮކްރެޓްސްގެ ފުރަތަމަ އެތެރޭގެ އިންތިޚާބުގެ ވޯޓުލުން ނިމި، އިންތިހާބުގެ ވަގުތީ ނަތީޖާ ރޭ ވަނީ އިއުލާނު ކޮށްފައެވެ. އެގޮތުން އެވޯޓުގެ ވަގުތީ ނަތީޖާ ދައްކާގޮތުން އަލައިކާވަނީ، އެ ޕާޓީގެ ރައީސް ކަމަށް ވާދަކުރެއްވި ދެބޭފުޅުނަނަށް ވުރެ ގިނަ ވޯޓާއި އެކު، ޕާޓީގެ އަންހެނުންގެ ނައިބު ރައީސް ކަމަށް ހޮވިފައެވެ. އަލައިކާއަށް ވަނީ ޖުމުލަ 2046 ވޯޓުލިބިފަ އެވެ.

ޑިޕްލޮމާއިން ބިޒްނަސް އަދި ޑިޕްލޮމާއިން ޝަރީއާ އެންޑް ލޯ އާއި، ޕަބްލިކް ޕޮލިސީއިން މާސްޓާސްއަކާއި، ޕަބްލިކް މެނޭޖްމަންޓުން ޑިގްރީއެއް ހާސިލުކުރުމުގެ އިތުރުން އޭނާ ވަނީ ދައުލަތުގެ އެކި މުއައްސަސާތަކުގައި އެކި ފެންވަރުގެ މަގާމުތައް އަދާކޮށްފައެވެ.

އަލައިކާ ބުނީ، ދަ ޑިމޮކްރެޓްސް އުފެދުނީއްސުރެ އެ ޕާޓީގެ ސިޔާސީ ހަރަކާތްތަކުގައި ބައިވެރިވަމުންދާކަމަށާޢި، އެގޮތުން ޕާޓީގެ އަސާސީ ގަވާއިދު ލިޔެ، އެކުލަވައިލުމުގައިވެސް އޭނާ ވަރަށް އިސް ދައުރެއް އަދާކުރި ކަމަށެވެ.

އިތުރަށް އަލައިކާ ބުނީ ދަ ޑިމޮކްރެޓްސް ބިނާކުރުމުގައި އޭނާގެ ތަސައްވުރެއް ވާކަމަށާއި، އެއީ ރައްޔިތުން ބާރުވެރިކުރުމާ ބައިވެރި ކުރުންކަމަށެވެ.