ހައްޖުގެ މަތިވެރި އަޅުކަމަށް މީހުން ގެންދިއުމަށް ސައުދީ އަރަބިޔާއިން ހަވާލުކޮށްފައިވާ ކޯޓާގެ އިތުރުން، އަދި އިތުރު ކޯޓާ ހޯދުމުގެ މަސައްކަތް ކުރަމުން އަންނަކަމަށް ހައްޖު ކޯޕަރޭޝަންގެ މެނޭޖިން ޑިރެކްޓަރ މުހައްމަދު ޝަކީލް ވިދާޅުވެއްޖެއެވެ.

ސަންގު ޓީވީ އަށް މައުލޫމާތު ދެއްވަމުން ޝަކީލް ވިދާޅުވީ، ހައްޖަށް މީހުން ގެންދިއުމަށް ސައުދީ އިން މިހާރު ހަވާލުކޮށްފައިވާ ކޯޓާގެ އިތުރުން، އިތުރު 500 ކޯޓާ ހޯދުމަށްޓަކައި އިސްލާމީ ކަންތައްތަކާއި ބެހޭ ވުޒާރާގެ ވަޒީރު، ޑރ. މުހައްމަދު ޝަހީމް އަލީ ސައީދު އާއިއެކު މަޝްވަރާ ކުރެވިފައިވާ ކަމަށެވެ.

ސައުދީއިން މިހާރު ހަވާލުކުރެވިފައި ވަނީ 500 ކޯޓާކަމަށް އޭނާ ވިދާޅުވި އެވެ.

Advertisement

ޝަކީލް ވިދާޅުވީ، ހައްޖު ކޯޓާގެ ކަންތަކުގައި ކުރިއަށް އޮތް ހަފްތާއެއްހާ ދުވަހުގެ ތެރޭގައި ގޮތެއް ކަނޑައެޅިގެންދާނެ ކަމަށް އުންމީދު ކުރައްވާ ކަމަށެވެ.

ހައްޖު ކޯޕަރޭޝަންގެ މައިގަނޑު އަމާޒަކީ ހައްޖަށް ދިއުމަށްޓަކައި އާންމު ރައްޔިތުން ކުރަންޖެހޭ ހޭދަ ކުޑަކޮށް، ލުއި ގޮތްތަކެއް ހޯދައި ދިނުންކަން އޭނާ ފާހަގަކުރެއްވިއެވެ.

ޝަކީލް ވިދާޅުވީ، ނިމިދިޔަ ސަރުކާރުން މީހުން ހައްޖަށާއި އުމްރާއަށް ފޮނުވުގެ ކަންތައްތަށް ކޮށްފައިވަނީ އެންމެ އެދެވިގެންވާ ގޮތުގެ މަތިން ނޫންކަމަށެވެ.

ކުރިއަށް އޮތް ފަސް އަހަރަކީ ހައްޖުގެ އަޅުކަން ކުރުމަށްޓަކައި ރައްޔިތުން ކުރާ ހޭދަ ކުޑަކޮށް، މިހާރަށްވުރެ ފަސޭހައިން ކަންކަން ކުރެވިގެންދާނެ ދުވަސްތަކެއް ކަމުގެ ޔަގީންކަން ދެއްވާކަމަށް ޝަކީލް ވަނީ ވިދާޅުވެފައެވެ.