އަމާޒަކީ ކުރިއަށް އޮތް ފަސް އަހަރުގެ ތެރޭގައި ރާއްޖޭގަ އޮތް އެންމެ ވަރުގަދަ ސިޔާސީ ޕާޓީއަކަށް ދަ ޑިމޮކްރެޓްސް ހެދުންކަމަށް، އެޕާޓީއާށް އިންތިހާބުވެވަޑައިގެން ރައީސް އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.

ދައުލަތުގެ މީޑިއާއަށް މައުލޫމާތު ދެއްވަމުން ހަސަން ލަތީފް ވިދާޅުވީ، ބޭނުންވަނީ  ދަ ޑިމޮކްރެޓްސް އަކީ އެންމެ ބޮޑު ޕާޓީ ކަމުގައި ހެދުންނޫންކަމަށާއި، ނަމަވެސް އެންމެ ވަރުގަދަ ސިޔާސީ ޕާޓީކަމުގައި ހެދުންކަމަށެވެ. އަދި ދެން އަންނަންއޮތް ރިޔާސީ އިންތިހާބާއި ހަމައަށް އެ އަމާޒަށް ވާސިލްވާނޭ ކަމުގެ ފުރިހަމަ ޔަގީންކަން އެބައޮންވެވިކަމަށް އޭނާ ވިދާޅުވިއެވެ.

ކުރީގައި މަސައްކަތްކުރެއްވި އިދިކޮޅު މައިޕާޓީ އެމްޑީޕީއަށް ފާޑުވިދާޅުވަމުން ހަސަން ލަތީފް ވިދާޅުވީ، އެމްޑީޕީ އަކީ ބޮޑު ޕާޓީ އެއްކަމަށާއި، ނަމަވެސް އެއީ ވަރުގަދަ ޕާޓީއެކޭ ބުނެވެން ނެތްކަމަށެވެ.

އިތުރަށް ވާހަކަ ދައްކަވަމުން ހަސަން ލަތީފް ވިދާޅުވީ، މިއަހަރު ނިމުމުގެ ކުރިން ދިހަ ހާސް މެންބަރުން ހަމަކުރެވިއްޖެއްވިނަމަ، އެއީ ލިބިގެންދާނެ ވަރަށް ބޮޑު ކުރިއެރުމެއް ކަމަށެވެ.