ކުރިއަށް އޮތް ފަސް އަހަރު ދުވަހުގެ ތެރޭގައި 1000 ފަގީރުން ހިލޭ ހައްޖަށް ފޮނުވުމަށް ނިންމާފައިވާކަމަށް ރައީސުލްޖުމްހޫރިއްޔާ ޑރ. މުހަންމަދު މުއިއްޒު ވިދާޅުވެއްޖެއެވެ.
ރައީސް، ޑރ. މުއިއްޒު ކެބިނެޓާއި އެކީ ބޭއްވި ބައްދަލުވުމަށްފަހު، ނިންމި މުހިންމު ނިންމުންތައް ހިއްސާކުރުމަށް ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވިދާޅުވީ، ފަސް އަހަރަށް 1000 ފަގީރުން ސަރުކާރުގެ ހަރަދުގައި ހައްޖަށް ފޮނުވުމަށް ނިންމާފައިވާއިރު، މިއަހަރުގައި އެންމެ ފުރަތަމަ ހައްޖަށް ދާ މީހުންގެ ތެރޭގައި 50 މީހުން ފޮނުވާނޭކަމަށެވެ.
ރައީސް ވިދާޅުވީ، މިއަހަރުގައި 50 މީހުން ފޮނުވާގޮތަށް ހަމަ ޖެހުނުނަމަވެސް މި އަދަދު އެކި އަހަރުތަކުގައި ބަދަލުވަމުން އަންނާނޭކަމަށާއި، އަދި ކުރިއަށް އޮތްތަނުގައި މި އަދަދު އިތުރުވެސް ވެގެންދާނޭކަމަށެވެ.
ރައީސް ވިދާޅުވީ، ސަރުކާރުގެ ހަރަދުގައި ހިލޭ ހައްޖަށް ފޮނުވުމަށް މީހުން ކަނޑައަޅާނީ ފަގީރުންގެ ދަފްތަރުގައި ހިމެނޭ ފަރާތްތަކުގެ ތެރެއިން ވަކި އުސޫލުތަކެއްގެ ތެރެއިންކަމަށެވެ.
އޭގެ ތެރެއިން ނެގޭ ފަރާތްތައް މި ފަންސާސް މީހުނާ، ކުރިއށް އޮތް އަހަރުތަކުގެ ތެރޭގައި އެންހާސް މީހުންގެ ތެރޭގައި ހިމެނިގެންދާނެ،
ރައީސް ޑރ.މުއިއްޒު
ރައީސް ވިދާޅުވީ، ހިލޭ މީހުން ހައްޖަށް ފޮނުވުމަކީ ހަމަ އެކަނި ކުރިއަށްއޮތް ފަސް އަހަރު ކުރާ ކަމެއްގެ ބަދަލުގައި، މިކަމަކީ ދާއިމީ ގޮތެއްގައި ފަގީރުންނަށްޓަކައި ކޮށްދެވޭނެ ކަމެއްގެ ގޮތުގައި ނިންމުމަކީ ކުރައްވާ އުންމީދުފުޅެއްކަމަށެވެ.
Advertisement
This content is created and paid for by advertisers and does not involve Voice Journalists
