އެގްރިމެންޓް ހަމަވެ، ބެހެއްޓޭނެ އެއްވެސް ގޮތެއްނެތިގެން މުއައްޒަފުން ވަކިކުރުމަކީ މިސަރުކާރުގެ ކެބިނެޓަށް ރުހުން ނުދޭންވީ ސަބަބެއްނޫންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް އޮފީހުގައި އިއްޔެ ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ޑރ. މި މުއިއްޒު ވިދާޅުވީ، ފެނަކަ ކޯޕަރޭޝަން މިވަގުތު ވަނީ ވަރަށް ބޮޑަށް ދަރަނިވެރިވެފައި ކަމަށެވެ. ރައީސް ވިދާޅުވީ، އެކަމުން އަރައިގަތުމަށްޓަކައި އެކުންފުނީގެ މެނޭޖްމަންޓް އިން މިވަގުތު އަންނަނީ މަސައްކަތްކުރަމުންކަމަށެވެ.
އެއްވެސް މަސައްކަތެއް ކުރަން ނެތް ރަށްރަށުގައިވެސް މުއައްޒަފުން ވަޒީފާއަށް ނަގާފައިވާކަން ފާހަގަ ކުރައްވާ ރައީސް ވިދާޅުވީ، ގިނަ މުއައްޒަފުންނެއްގެ އެގްރިމެންޓް ނިމިދިޔަ ނޮވެންބަރު މަހުގެ 30ވަނަ ދުވަހާހަމައަށް ހަމަވެފައިވާ ކަމަށެވެ.
ދެން ފެނަކައިގެ މެނޭޖްމަންޓުން އޭގެ ތެރެއިން ބައެއް މުއައްޒަފުން މުއްދަތު ހަމަވީމަ އާ ކޮންޓްރެކްޓެއް ނެހެދި، އަޅުގަނޑު ދަންނަވާފަ އޮންނާނެ ވީވަރަކުން ކޮންޓްރެކްޓް އާ ކުރެވެން އޮތް އެންމެނަށް އާ ކޮށްލަދޭށޭ އަދިވެސް ހަމަ ޓެމްޕޮރަރީ އެގްރިމެންޓެއް ހަދާލައިގެން، އެހެންވީމަ އެ މަސައްކަތް އެބަ ކުރިއަށް ގެންދޭ،
ރައީސް ޑރ.މުއިއްޒު
ރައީސް ވިދާޅުވީ، އެއްވެސް މަސައްކަތެއް ނެތް ރަށްރަށަށް މުއައްޒަފުން ނަގާފައިވަނީ ކެމްޕެއިންނަށް ކަމަށް ބެލޭކަމަށެވެ.
ބައެއް މުއައްޒަފުން އެބޭފުޅުން ދޫކޮށްލެއްވި އެއްވެސް މަސައްކަތެއް ނެތް ބައެއް ރަށްތަކުގަ، މި ދެންނެވީ ޕްރޮޖެކްޓެއްވެސް ނެތި ނަގާފަ ހުރި،
ރައީސް ޑރ.މުއިއްޒު
ރައީސް ވިދާޅުވީ، ހަދާފައިވާ އެގްރިމެންޓް ހަމަވެފައިތިބި މުއައްޒަފުން ވަކި ކުރުމަކީ ޒިންމާދާރުނުވުން ނޫންކަމަށާއި، އަދި އެއީ އިދިކޮޅު ފަރާތްތަކުން މި ސަރުކާރުގެ ކެބިނެޓަށް ރުހުން ނުދޭވަރުގެ ކަމެއްކަމަށް ގާބޫލުފުޅު ނުކުރައްވާކަމަށެވެ.
ރުހުން ނުދޭނީ ރުހުން ނުދޭ ވަރުގެ ކަންތައްތައް ވީމަ
ރައީސް ޑރ.މުއިއްޒު
އިތުރަށް ވާހަކަ ދައްކަވަމުން ރައީސް ވިދާޅުވީ، ރާއްޖޭގެ ސިޔާސީ ޕާޓީތަކަކީ ވަރަށް ޒިންމާދާރު ޕާޓީތަކެއްކަމަށާއި، ހުރިހާ ޕާޓީއަކުންވެސް ކުރިއަށް ދާނީ ގައުމު އިސްކޮށްގެންކަމަށް ގަބޫލުފުޅު ކުރައްވާކަމަށެވެ.
އަޅުގަނޑު ގަބޫލެއް ނުކުރަން އެނޫން ވިސްނުމެއްގަ އެއްވެސް ސިޔާސީ ޕާޓީއަކުން މަސައްކަތްކުރާނެ ކަމަކަށް،
ރައީސް ޑރ.މުއިއްޒު
އިއްޔެ ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި ފެނަކައިގެ މުވައްޒަފުން ގަވާއިދާ ހިލާފަށް ވަކިކުރާކަމަށް ބުނެ އެމްޑީޕީގެ ޕާލިމެންޓްރީ ގްރޫޕުން ކުއްލި މައްސަލައެއް ވަނީ ހުށަހަޅައިފައެވެ.
ނިމިގެންދިޔަ އެމްޑީޕީ ސަރުކާރުން އެންމެ ގިނަ ވަޒީފާ ދީފައިވާ ކުންފުނި، ފެނަކަ ކޯޕަރޭޝަނުން މުވައްޒަފުން ވަކި ކުރާނަމަ، މި ސަރުކާރުގެ ވަޒީރުންނަށް ރައްޔިތުންގެ މަޖިލީހުން ރުހުން ނުދޭނެ ކަމަށް މިއަދުގެ ޖަލްސާގައި ބަހުސް ކުރައްވަމުން އެޕާޓީގެ ބައެއް މެންބަރުން ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
