އިތުރުގޮތެއް ނުހޯދާ، ޕްލާސްޓިކް މަދުކުރުމަށް ކަމަށްބުނެ ޕްލާސްޓިކް ފުޅީގައި ބަންދުކޮށްފައި ހުންނަ ފެން އުފެއްދުމާއި ރާއްޖެ އެތެރެކުރުން ހުއްޓާލައިފިނަމަ އެކަމުގެ ސަބަބުން ރައްޔިތުންނަށް ބޮޑެތި ދަތިތަކަކާއި ކުރިމަތިލާންޖެހޭނެ ކަމަށް، އެމްޑަބްލިއުއެސްސީގެ މެނޭޖިން ޑިރެކްޓަރ އަބްދުލް މަތީން މުހަންމަދު ވިދާޅުވެއްޖެއެވެ.
ސަންގު ޓީވީއަށް މައުލޫމާތުދެއްވަމުން މަތީން ވިދާޅުވީ، ފުޅީގައި ބަންދުކުރާ ފެނަކީ ސާފު ބޯފެން ޔަގީންކޮށްދެވޭ އެއް ވަސީލަތްކަމަށާއި، ސާފު ބޯފެނަކީ ރާއްޖޭގެ އާބާދީއަށް ވަރަށް މުހިންމު އަސާސެއް ކަމަށެވެ. އަދި ފުޅީގައި ބަންދުކުރެވިފައިވާ ފެނަށް ރައްޔިތުން ވަރަށް ބޮޑަށް ބަރޯސާވެފައިވާ މިދަނޑިވަޅުގައި، ޕްލާސްޓިކު ފުޅީގައި ބަންދުކޮށްފައި ހުންނަ ފެންފުޅި ރާއްޖޭގައި ވިއްކުން މަނާކުރުމަކީ އެކަމުގެ ސަބަބުން ރައްޔިތުންނަށް ދަތިތަކަކާއި ކުރިމަތިލާންޖޭހެނެ ކަމެއްކަމަށް މަތީން ވިދާޅުވިއެވެ.
މަތީން ވިދާޅުވީ، އެއްރަށުން އަނެއްރަށަށް ފެން ފޯރުކޮށްދިނުމުގައި އޭގެ ރައްކާތެރިކަމާއި ސާފުކަން ޔަގީންކޮށްދެއްވޭނެ ގޮތަކީވެސް ފުޅީގައި ރަނގަޅަށް ބަންދުކޮށްފަ ހުރުން ކަމަށެވެ.
ފުޅީގަ ރަނގަޅަށް ބަންދުކޮށަފަ ހުރީމަ އޭގެން ޔަގީންވަނީ އެފެނުގަ ތަގައްޔަތު ވުމެއް ނޫޅޭކަމަށާ، ބެކްޓީރިއާއެއް ނޫޅޭކަމާ، މިދެންނެވި ފެން އުފުލުމުގެ ތެރޭގަ،
މަތީން
އަދި ފުޅީގައި ބަންދުކޮށްގެން ނޫން ގޮތަކަށް، ފެންއުފުލުމަށް މަސައްކަތްކުރާނަމަ އެ ފެން ތަގައްޔަރުވުމުގެ ފުރުސަރު ބޮޑުވެގެންދާކަމަށްވެސް އޭނާ ވިދާޅުވިއެވެ.
އެހެހެން ގޮތަކަށް ފެން އުފުލާނަމަ ބޮޑު އެއްޗެއްގަ ހަމެއްގަ ފެން އުފުލާފަ ދެން އެރަށްރަށް ފެން ގެންދާކަމުގަ ވަންޏާ، އެގެންދިއުމިގެ ތެރޭގަ ފެން ތަގައްޔަރު ވުމުގެ ފޖރުސަތުވެސް ވަރަށް ބޮޑަށް އޮންނާނެ
މަތީން
މަތީން ވިދާޅުވީ، ރާއްޖޭގެ ތިމާވެށި ނާޒުކުކަމާއި އަދި ތިމާވެށި ހިމާޔަތް ކުރަންޖެހޭނެކަމަށް ގަބޫލުކުރައްވާ ކަމަށެވެ. އަދި ތިމާވެއްޓަށް ގެއްލުންލިބިދޭ ކޮންމެ ކަމަކުންވެސް ދުރުވާން ޖެހޭކަން ގަބޫލުކުރައްވާކަމަށާއި، ނަމަވެސް ތިމާވެށި ރައްކާތެރި ކުރުމަށް ކުރެވޭ މަސައްކަތްތަކުގެ ތެރޭގައި ރާއްޖޭގެ އިގްތިސޯދަށްވެސް ބަލަންޖެހޭކަމަށާއި، އަދި އާންމު ރައްޔިތުންގެ ސިއްހަތަށްވެސް ބަލަންޖެހޭކަމަށް މަތީން ވަނީ ވިދާޅުވެފައެވެ.
މަތީން ވިދާޅުވީ، ޕްލާސްޓިކް މަދުކުރުމަށް އެޅޭ ފިޔަވަޅުތައް އެޅުނުއިރު އޭގައި ސާފުބޯފެއް ރައްޔިތުންނަށް ފޯރުކޮށްދޭނޭ އިތުރު އެހެންގޮތެއް ބަލާ ހޯދުމަށް މަސައްކަތްތަކެއް ކުރެވިފައި ނުވާކަމަށެވެ.
އިތުރަށް މަތީން ވިދާޅުވީ ރައްކާތެރި ގޮތެއްގައި ރައްޔިތުންނަށް ފެން ފޯރުކޮށްދިނުމަށް ގިނަ ކުންފުނިތަކުން އިންވެސްޓް ކޮށްފައިވާކަމަށާއި، އެހެންކަމުން ކުރުމުއްދަތެއްގެ ތެރޭގައި އެކަން ހުއްޓާލުމަކީ ވަރަށް ބޮޑު މާލީ ދަތިކަމެއްވެސް އޭގެން ކުރިމަތިވާނޭ ކަމައްކަމަށެވެ.
އެހެންވީމަ އެގޮތަށް ބޮޑެތި އިންވެސްޓްމަންޓް ތަކެއް ކުރެވިފަހުއްޓާ، ކުރުމުއްދަތެއްގެ ތެރޭގަ އިންވެސްޓްމެންޓް ރަނގަޅަށް ކަވަރ ނުވެ އެގޮތަށް ހުއްޓާލަން ޖެހުމަކީ ވަރަށް ބޮޑު މާލީ ގޮންޖެހުންތަކެއް އޭގެން ކުރިމަތިވާނެ ކަމެއް އެފަރާތްތަކަށްވެސް
މަތީން
ސިންގަލް ޔޫސް ޕްލާސްޓިކުގެ ބާވަތްތަކުގެ ތެރެއިން އެއް ލީޓަރާއި އެއަށްވުރެ ކުދި ޕްލާސްޓިކު ފުޅީގައި ބަންދުކޮށްފައި ހުންނަ ފެންފުޅި ރާއްޖޭގައި ވިއްކުން މަނާކުރުމަށް ކުރީގެ ސަރުކާރުގެ ސިޔާސަތުގެ ދަށުން، އެންވަޔަރަމަންޓް މިނިސްޓްރީން ވަނީ އިއުލާނުކޮށްފައެވެ. އެސަރުކާރުން ނިންމާފައިވާގޮތުން މިމަހުގެ 1ވަނަ ދުވަހުން ފެށިގެން އެއް ލީޓަރަށް ވުރެ ކުދި ފްލާސްޓިކް ފުޅީގައި ބަންދުކޮށްފައި ހުންނަ ފެން އުފެއްދުމާއި ރާއްޖެ އެތެރެކުރުން މަނާ ވާނެ އެވެ. އަދި އަންނަ މާޗް މަހުން ފެށިގެން އެ ފެން ބާޒާރަށް ނެރުން ވެސް މަނާވާނެ ކަމަށް މިނިސްޓްރީން ވަނީ ބުނެފަ އެވެ.
އެހެންނަމަވެސް މި ސަރުކާރުންވަނީ އެ ތާރީހު ބަދަލުކުރަން ނިންމާފައެވެ. އެގޮތުން ރައީސް ޑރ. މުހައްމަދު މުއިއްޒު ނެރުއްވި ގަރާރުގައި ވަނީ އަންނަ އަހަރަށް އެކަން ފަސްކުރައްވައިފާކަމަށް ވިދާޅުވެފައެވެ.
އެ ގަރާރުގައި ބުނެފައިވަނީ، އެއް ލީޓަރާއި އެއް ލީޓަރަށް ވުރެ ކުދި، ޕްލާސްޓިކް ފުޅީގައި ބަންދުކޮށްފައި ހުންނަ ފެން، އެތެރެކުރުމާއި އުފެއްދުން މަނާކުރާ މުއްދަތު އަންނަ އަހަރުގެ އޮގަސްޓް މަހުގެ ނިޔަލަށް ފަސްކުރެވިފައިވާ ކަމަށާއި، އަދި އެ ތަކެތި ބާޒާރަށް ނެރުން މަނާކުރާ ތާރީހު ވަނީ އަންނަ އަހަރުގެ ނޮވެމްބަރު މަހުގެ ނިޔަލަށް ފަސްކޮށްފައި ކަމަށެވެ.
Advertisement
This content is created and paid for by advertisers and does not involve Voice Journalists
