އަމީނީ މަގުގެ ނުނިމި އޮތް އެންމެ ފަހުގެ ދެ ސެގްމެންޓު ހެދުމުގެ މަސައްކަތް ހޮނިހިރު ދުވަހު ފެށުމަށް ނިންމައިފިއެވެ. 

އާރްޑީސީން މިއަދު ބުނީ، އަމީނީ މަގުގެ ސެގްމެންޓު 12 އަދި 13 ހެދުމުގެ މަސައްކަތް ހޮނިހިރު ދުވަހު ފަށަން ނިންމާފައިވާ ކަމަށެވެ. 

އަދި އެކަމާއި ގުޅިގެން އެ ސަރަހައްދުގެ ޓްރެފިކަށް އަންނަ ބަދަލު ފުލުހުންގެ އިދާރާއިން ހިއްސާކުރާނެ ކަމަށްވެސް ބުނެފައިވެއެވެ. 

Advertisement

ޒަމާނީ ފެންވަރަށް އަމީނީމަގު ހެދުމުގެ މަސައްކަތުގެ ތެރެއިން ނުނިމި އޮތް ދެ ސެގްމެންޓްގެ މަސައްކަތް އަވަށް ނިންމުމަާއި ގުޅޭ ގޮތުން، ޢިމާރާތް ކުރުމާއި ބިނާރާ ބެހޭ ވުޒާރާއިން، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާއެކު މިހަފްތާ ތެރޭގައި ވަނީ މަޝްވަރާ ކޮށްފައެވެ. 

އެކަމާއި ގުޅިގެން އެ ވުޒާރާއިން ނެރުނު ނޫސް ބަޔާނެއްގައި ބުނީ، އެ ބައްދަލުވުމުގައި މަޝްވަރާ ކުރެވުނު ގޮތަށް އަމީނީމަގު ހެދުމުގެ މަސައްކަތް ބާރު ސްޕީޑުގައި ކުރިއަށް ގެންދިއުމުގެ މަސައްކަތް ފެށުމުގެ އެންމެފަހުގެ ތައްޔާރީތައް އާރުޑީސީން ވަމުން އަންނަ ކަމަށެވެ.

އަދި މި ބައްދަލުވުމުގައި މަގު ހެދުމުގެ މަސައްކަތް ފެށުމާ އެކު އާންމުންނަށް މަގު ބޭނުން ކުރުމުގައި ދިމާވެދާނެ ދަތިތައް ހައްލު ކުރުމާ ގުޅޭގޮތުން އާރުޑީސީ އާއެކު މަޝްވަރާ ކުރެވުނު ކަމަށްވެސް އެ ވުޒާރާއިން ބުނެއެވެ.

މިއާއެކު ޢިމާރާތް ކުރުމާއި ބެހޭ ވުޒާރާ އިން ބުނީ އަމީނީ މަގުގެ ޓްރެފިކް ފްލޯއަށާއި ރާއްޖެ ޓްރާންސްޕޯޓް ލިންކްގެ ބަސް ރޫޓުތަކަށް ދިމާވެދާނެ ދަތިތަކަށް ޓްރެފިކް ބަލަހައްޓާ ފުލުހުންގެ އެހީގައި ހައްލެއް ގެނައުމަށް އެ ބައްދަލުވުމުގައި ނިންމާފައިވާ ކަމުގަ އެވެ.

އަމީނީ މަގު ޒަމާނީ ފެންވަރަކަށް ތަރައްގީކުރުމުގެ މަޝްރޫއު އެންމެ ފުރަތަމަ ހަވާލުކުރެވިފައިވަނީ މާލެ ސިޓީ ކައުންސިލަށެވެ. އެހެން ނަމަވެސް އެފަހުން ކުރީ ސަރުކާރުން ވަނީ އެ މަސައްކަތް ސިޓީ ކައުންސިލްއަތުން އަތުލުމަށްފަހު ތިން ގުނަ އަގުބޮޑުކޮށް އާރުޑީސީއާއި ހަވާލުކޮށްފައެވެ. 

އެ މަސައްކަތް ނިންމަން އޮތް ތާރީހަށް މަސައްކަތް ނިންމާލެވިފައި ނުވާއިރު، އެކަމުގެ ހުރި ކަންބޮޑުވުންތަކާއެކު ގިނަ ބައެއްގެ ފާޑުކިޔުންވެސް ކުރީ ސަރުކާރަށް އަމާޒުވެގެން ދިޔައެވެ. 

އެހެންކަމުން ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމާއި ހަވާލުވެވަޑައިގަތުމާއެކު އެ މަޝްރޫއު ބާރު ސްޕީޑުގައި ނިންމަވާނެ ކަމަށާއި އޭގެ އިތުރުން މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއެއް ވެސް ކުރިއަށް ގެންދަވާނެކަމަށް އެމަނިކުފާނު ވަނީ ކެންޕެއިންގެ ތެރެއިން ވިދާޅުވެފައެވެ.