ރައީސް ޑރ މުހައްމަދު މުއިއްޒުގެ ސަރުކާރުގެ އެންމެ ބޮޑު ބޯހިޔާވަހިކަމުގެ މަޝްރޫއު ހިންގުމަށްޓަކައި ހިއްކަން ނިންމާފައިވާ ފުށިިދިއްގަރުފަަޅު ކ. ގުޅީގެ އިހުތިސާސުން ވަކިކޮށްފިއެވެ.

އެގޮތުން ލާމަރުކަޒީ ގާނޫނުގެ ދަށުން ރައީސަށް ދީފައި އޮންނަ އިހުތިޔާރުގެ ދަށުން، ރައީސް ޑރ. މުހައްމަދު މުއިއްޒު ނެރުއްވި ގަރާރަކުން ވަނީ ފުށިދިއްގަރު ފަޅު ގުޅީގެ އިހްތިސާސުން ވަކިކޮށްފައެވެ. 

އެގޮތުން ރައީސް ޑރ މުހައްމަދު މުއިއްޒުގެ ގަރާރުގައި ވާގޮތުން ގުޅީގެ އިހުތިސާސަށް ބަދަލު ގެންނެވީ 2020 ވަނަ އަހަރު އޭރުގެ ރައީސުލްޖުމްހޫރިއްޔާ ނެރުއްވި ފަރާތަކުންނެވެ. އެ އޭރު ނެރުއްވި ގަރާރުގައި ވާގޮތުން ކައުންސިލްތަކުގެ އިހުތިސާސް ކަނޑައަޅުއްވާފައި އޮތް ގޮތަށް ބަދަލު ގެންނަން ޖެހޭ ކަމަށް ފެނިވަޑައިގަންނަވާތީ ފުށިދިއްގަރު ފަޅު ވަނީ ގުޅީގެ އިހްތިސާސުގެ ތެރޭގައި ހިމަނައިފައެވެ. 

މިއަދު ނެރުއްވި ރައީސްގެ ގަރާރުން ކަނޑައަޅުއްވާފައިވާ ގުޅީގެ އިހުތިސާސްގައި ހިމެނެނީ އެރަށުގެ ފަޅާއި ކައިރީގައި އޮތް ދެ ފަޅެއްގެ ބައެކެވެ. ކުރިން އޮތް ގޮތުން ފުށިިދިއްގަރު ފަޅުގެ ބައެއް ގުޅީގެ އިހުތިސާސްގެ ތެރޭގައި ހިމެނެއެވެ.

ލާމަރުކަޒީ ގާނޫނު ބުނާ ގޮތުން ރަށެއްގެ އިހުތިސާސަކީ ރަށެއްގެ ރާޅުފެންފަށުން ފެށިގެން 700، މީޓަރާ ހަމައަށް އޮންނަ ސަރަހައްދުގެ ތެރެެއިން މީހުން އުޅޭ އެހެން ރަށެއްގެ ބަޔަކަށް ނުވާ އަދި ސިނާއީ މަސައްކަތެއް ކުރާ ރަށެއްގެ ބަޔަކަށް ނުވާ ސަރަހައްދެވެ. ފުށިދިއްގަރުފަޅުގެ ބައެއް ގުޅީގެ އިހުތިސާސްގެ ތެރޭގައި ހިމެނުނީ އެގޮތުންނެެވެ.

ފުށިދިއްގަރުފަޅުން ބިން ހިއްކައި އެތަނުގައި ބޮޑު އާބާދީއެއް ވަޒަންވެރި ކުރުމަކީ ރައީސް މުއިއްޒުގެ ރިޔާސީ ވައުދެކެވެ. އެގޮތުން އެ މަޝްރޫއު ކުރިއަށް ގެންދިއުމަށްޓަކައި އަންނަ އަހަރަށް ލަފާކުރާ ދައުލަތުގެ ބަޖެޓުން ކަނޑައެޅިފައިވާ ބައި މަޖިލީހުގެ ބަޖެޓް ދިރާސާކުރާ ކޮމިޓީން ދިރާސާ ކުރުމަށް ފަހު ބަޖެޓުން އުނިކޮށް އެހެން މަޝްރޫޢުތަކަށް ވަނީ ބަހާލައިފައެވެ.