ލ.އަތޮޅާއި މާލެ އާއި ދެމެދު ދަތުުރުކުރާ “ބަސްމަލާ” ނަމަކަށް ކިޔާ ބޯޓެއް ފަރަށްއަރައިފިއެވެ.

ފަރަށްއަރައިފައިވަނީ ލ. ދަނބިދޫއަށް ނިސްބަތްވާ ދޯންޏެކެވެ.

ދަނބިދޫ ކައުންސިލްގެ ރައީސް އިބްރާހިމް މިމްރާހް “ވޮއިސް” އަށް މަޢުލޫމާތު ދެއްވަމުން ވިދާޅުވެފައިވަނީ ހާދިސާ ހިނގި ވަގުތު ދޯނީގައި ތިބީ ދޯނީގެ ފަޅުވެރިން އެކަނި ކަމަށެވެ. އަދި ދޯނީގައި ތިބި މީހުންގެ ތެރެއިން އެއްވެސް މީހަކަށް އަނިޔާއެއް ވެފައި ނުވާ ކަމަށްވެސް މިމްރާޙް ވިދާޅުވިއެވެ.

މިމްރާޙް ވިދާޅުވީ ދޯނީގައި ހުރި މުދަލުގެ ތެރެއިން ސަލާމަތް ކުރެވުނީ ދޯނީގެ ޑަކް މަތީގައި ހުރި މުދާ އެކަނި ކަމަށެވެ. އަޑީގައި ހުންނަ މުދާ އަޅާ ތަންތަނުގައި ހުރި ހުރިހާ މުދަލެއް ވަނީ ހަލާކުވެފައި ކަމަށްވެސް އޭނާ ވިދާޅުވިއެވެ.

މިމްރާޙް “ވޮއިސް”އަށް މަޢުލޫމާތު ދެއްވަމުން ވިދާޅުވީ މިވަގުތު ދޯނި އޮތީ ފުން ކުރެވޭފަދަ ހާލަތެއްގައި ނޫން ކަމަށާއި މިވަގުތު ކުރިއަށް ދަނީ ދޯނިން މުދާ ހުސްކުރުމުގެ މަސައްކަތް ކަމަށެވެ.

އެމަސައްކަތުގައި އެމްއެންޑީއެފް ކޯސްޓް ގާޑާއި އިސްދޫ ޕޮލިސް އަދި ދަނބިދޫ ރައްޔިތުން ބައިވެރިވަމުންދާ ކަމަށްވެސް މިމްރާޙް ވަނީ ވިދާޅުވެފައެވެ.