އިންޑިއާ ސަރުކާރުގެ އެހީގައި ރާއްޖޭގެ ކަނޑުގެ ސަރަހައްދުގައި ކުރިއަށްގެންދާ ހައިޑްރޯގްރަފީ ސަރވޭ އެއްބަސްވުން ނިންމުމަކަށް ގެނައުމަށް ދިވެހި ސަރުކާރުން ނިންމަވައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހަފްތާ-14 ގައި ހިމެނޭ ކަންކަން ކުރިއަށް ގޮސްފައިވާ މިންވަރާއި ގުޅޭ ގޮތުން މައުލޫމާތު ދިނުމަށް މިއަދު ބޭއްވި ނުސްވެރިންގެ ބައްދަލުވުމުގައި ވާހަކަދައްކަމުން ރައީސުލްޖުމްހޫރިއްޔާގެ އޮފީހުގެ އަންޑަރ ސެކެޓްރީ ފޮރ ޕަބްލިކް ޕޮލިސީ މުޙައްމަދު ފިރުޒުލް ވިދާޅުވީ، ހަފްތާ 14ގައި އެންމެ އިސްކަން ދެއްވާފައިވާ އެއްކަމަކީ އެހެން ޤައުމުތަކާއެކު ހަދާފައިވާ ރާއްޖޭގެ ސިޔާދަތާ މިނިވަންކަމަށް އުނިކަން އަންނާނެ އެއްބަސްވުންތަކުންގެ މާއްދާތައް އުވާލުމުގެ މަސައްކަތްކުރުމެވެ.
އަދި މީގެ ކުރިން، އެފަދަ 100 އަށްވުރެ ގިނަ އެއްބަސްވުންތައް ހުރިކަން ފާހަގަކުރައްވައި ފިރުޒުލް ވިދާޅުވީ، އެ އެއްބަސްވުން ތަކުގެ ތެރެއިން ހައިޑްރޯގްރަފީ ސަރވޭގެ އެއްބަސްވުން ނިމުމަކަށް ގެންނަން ސަރުކާރުން ނިންމާފައިވާ ކަމަށެވެ.
މިކަމުގެ ތަފްސީލް ހާމަކުރައްވަމުން ފިރުޒުލް ވިދާޅުވީ، އެ އެއްބަސް ވުމުގައި ބަޔާންކުރާގޮތުން އެ އެއްބަވުން ނިމުމަކަށް އަންނާނީ އަންނަ އަހަރުގެ ޖޫންމަހުގެ 7 ވަނަ ދުވަހުކަމަށެވެ.
އަދި އެ އެއްބަސްވުން ކުރިއަށް ގެންދަން ބޭނުންނުވާކަން 6 މަސް ދުވަހުގެ ކުރިން އެޤައުމަށް އަންގަން ޖެހޭކަމަށާއި، އެހެން ނޫންނަމަ އިތުރު ފަސް އަހަރަށް އެ އެއްބަސްވުން އައުވެގެންދާކަންވެސް އޭނާ ފާހަގަކުރެއްވިއެވެ.
ހައިޑްރޯ ގްރަފީ އެއްބަސްވުން އައު ނުކުރަން ނިންމައި އެކަން އިންޑިޔާއާއި އެކު މުޢާމަލާތު ކުރެވިފައި ވޭ. އެހެންކަމުން 7 ޖޫން 2024 މިއެއްބަސްވުން ނިމުމަކަށް އަންނާނެ، މިއެއްބަސްވުމުގައި ވާގޮތުން އެއްބަސްވުމުގެ މުއްދަތު ހަމަވުމުގެ 6 މަސް ކުރިން އެއްބަސްވުން ކުރިއަށް ގެންދަން ބޭނުންނުވާކަން އަންގަންޖެހޭ. އެހެން ނޫން ކަމަށް ވާނަމަ އޮޓޯއިން އެއްބަސްވުން ފަސް އަހަރަށް އިތުރު ވެގެންދާ ގޮތަށް އެއްބަސްވުމުގެ މާއްދާތައް ހިމެނިފައި ވަނީ
މުޙައްމަދު ފިރުޒުލް
ފިރުޒުލް ވިދާޅުވީ، އެ ނިންމުން ނިންމާފައިވަނީ ކެބިނެޓްގެ މަޝްވަރާ އާއި އެކު ކަމަށާއި އަދި އެފަދައިން ނިންމީ، ދިވެހި ކަނޑުތަކުގެ މަޢުލޫމާތަކީ ދިވެހިން ބަލަހައްޓަމުން އައި އެއްޗަކަށް ވާތީ، އެކަމާއި ގުޅޭ މައުލޫމާތު ހޯދުން ދިވެހި އަސްކަރިއްޔާ އާއި ހަވާލު ކުރުމަކީ އެއްމެ ރަނގަޅު ގޮތް ކަމަށް ފެންނާތީ ކަމަށެވެ.
އެހެންކަމުން، ދިވެހި އަސްކަރިއްޔާ އަކީ އެކަމަށް ގާބިލް ބަޔަކަށް ހަދައި އެ މަސައްކަތް ދިވެހި އަސްކަރިއްޔާ އާއި ހަވާލު ކުރުމަށް ނިންމާފައިވާ ކަމަށްވެސް އޭނާ ވިދާޅުވި އެވެ.
އެ ނިންމުމާއި އެކު، އެކަމަށްޓަކައި ބަޖެޓުގައި ވަކި މިންވަރެއް ކަނޑައެޅި، އެ މަސައްކަތް މިހާރު އަސްކަރިއްޔާގެ ތެރެއިން ފެށިފައިވާ ކަން ފިރުޒުލް ފާހަގަކުރެއްވިއެވެ.
އެހެންވީމާ ކުރިއަށް އޮތް ތަނުގައި ހައިޑްރޯ ގްރަފީ އާއި ބެހޭ ކަންކަން ކުރިއަށް ދާނީ ސައްތައިން ސައްތަ ދިވެހިން ހިމެނިގެން ހަމައެކަނި ދިވެހިންނަށް އެކަން އެނގިގެންދާގޮތަށް.
މުޙައްމަދު ފިރުޒުލް
ފިރުޒުލް އިތުރަށް ވިދާޅުވީ އެއްބަސްވުން އައު ނުކުރަން ރާއްޖެއިން ނިންމި ނިންމުމާއި ގުޅިގެން ބަދަލެއްގެ ގޮތުގައި އެއްވެސް އެއްޗެއް ދޭން ދިވެހި ސަރުކާރަށް ނުޖެހޭ ކަމަށެވެ.
Advertisement
This content is created and paid for by advertisers and does not involve Voice Journalists
