ހުޅުމާލެ ފޭސް 2 ގައި ހުންނަ ސަލާހުއްދީން ސްކޫލުގައި ކުއްޖަކަށް ބުލީ ކޮށްގެން ކަމަށް ބުނާ މައްސަލައަކާއި ގުޅިގެން، މީސްމީޑިއާގައި އެ ސްކޫލުގެ ޕްރިންސިޕަލް ނާސިހާ އިދްރީސްއާ ދެކޮޅަށް ޕޯސްޓުތައް ޖަހަމުން ދާތީ ކުރީގެ އެޑިއުކޭޝަން މިނިސްޓަރު ޑރ. އާއިޝަތު އަލީ, ޕްރިންސިޕަލް ނާސިހާގެ ދިފާއުގައި ތެދުވެވަޑައިގެންފިއެވެ.

ޑރ.އައިޝަތު އަލީ ފޭސްބުކްގައި ކުރި ޕޯސްޓެއްގައި ބުނީ ނާސިހާއަކީ މި ވަގުތު ރާއްޖޭގެ އެޑިއުކޭޝަން ސިސްޓަމުގައި ހުރި އެންމެ ރަނގަޅު އެއް ޕްރިންސިޕަލު ކަމަށާއި، ނާސިހާއަށް އެނގިގެން އެފަދަ އެއްވެސް އަނިޔާއެއް އެއްވެސް ދަރިވަރަކަށް ލިބުނަ ނުދޭނެ ކަމުގެ ޔަގީންކަން އޮތްކަމަށެވެ.

މީގެ އިތުރުންވެސް އެކަމަނާ ވިދާޅުވީ އެ ޕްރިންސިޕަލަކީ އަބަދުވެސް ކުދިންގެ ރައްކާތެރިކަން ކަށަވަރުކުރުމަށްޓަކައި މަސައްކަތް ކުރާ މީހެއް ކަމަށެވެ. 

ޑރ.އައިޝަތު އަލީ ވަނީ ހުރިހާ ސްކޫލުތަކަކީވެސް ދަރިވަރުންނަށް ބުލީ ކުރުމާއި އެފަދަ އެހެނިހެން އަނިޔާތަކުން ވެސް ސަލާމަތްވެފައިވާ އަމާން ތަނަކަށް ވުން އެދޭ ކަމަށް ވިދާޅުވެފައެވެ.

އެ ސްކޫލުގެ ބައެއް ބެލެނިވެރިންނާއި، އާންމުންވެސް ވަނީ ސަލާހުއްދީން ސްކޫލުގެ ޕްރިންސިޕަލާ ދެކޮޅަށް ދައްކަމުން އަންނަ ވާހަކަތައް ކުށްވެރިކޮށް، ޕްރިންސިޕަލުގެ ދިފާއުގައި ވާހަކަ ދައްކާފައެވެ. މިގޮތުން ސަލާހުއްދީން ސްކޫލާއި އެ ސްކޫލުގެ މުދައްރިސުންވެސް ވަރަށް ރަނގަޅު ކަމަށާއި ބަޔަކު ޖަހާހާ ޕޯސްޓަކުން ސްކޫލާމެދު ދެކޭ ގޮތް ބަދަލު ނުވާނެ ކަމަށްވެސް ބައެއް ބެލެނިވެރިން އަންނަނީ ބުނަމުންނެވެ.

ސަލާހުއްދީން ސްކޫލުގެ ގްރޭޑް އެކެއްގައި ކިޔަވަމުންދާ ދަރިވަރަކަށް އެ ކުލާހުގައި އުޅޭ ކުދިންގެ ފަރާތުން ބުލީ ކުރުމާއި ޖިސްމާނީ އަނިޔާތައް ކުރިމަތިވާ މައްސަލައެއް  އެޑިއުކޭޝަން މިނިސްޓްރީގެ ސަމާލުކަމަށް އައިސް އެ މިނިސްޓްރީން ވަނީ އެ މައްސަލަ ބަލަން ފަށައިފައެވެ.