ސަޤާފަތާއި ބެހޭ ޢިލްމު ދިވެހިންނަށް ފޯރުކޮށްދިނުމުގައި ބަންގްލަދޭޝްގެ އެހީތެރިކަން ދިވެހި ބަހާއި ސަޤާފަތާއި ތަރިކައާއި ބެހޭ ވުޒާރާގެ ވަޒީރު އާދަމް ނަޞީރް އިބްރާހިމާއި ބަންގްލަދޭޝްއިން ދިވެހި ރާއްޖެއަށް ކަނޑައަޅުއްވައިފައި ހުންނަވާ ސަފީރު ޝައިޚް ޢަބްދުލްކަމާލް އާޒަދު މަޝްވަރާ ކުރައްވައިފިއެވެ.

މިމަޝްވަރާ ތައް ކުރައްވައިފައިވަނީ ޝައިޙް ޢަބްދުލްކަމާލް އާޒާދު ވަޒީރު އާދަމް ނަޞީރުގެ އަރިހަށް ކުރެއްވެވި ޒިޔާރަތުގައެވެ.

ދިވެހިބަހާއި ސަޤާފަތާއި ތަރިކައާ ބެހޭ ވުޒާރާގައި މިއަދު ކުރިއަށް ދިޔަ އެދެބޭފުޅުންގެ ބައްދަލުވުމުގައި ވާހަކަފުޅުދައްކަވަމުން ބަންގްލަދޭޝް ސަފީރު ވަނީ އެ ވުޒާރާއަށް ޒިޔާރަތްކޮށްލެއްވުމުގެ ފުރުޞަތެއް ލިބިވަޑައިގަތުމަކީ ވަރަށް އުފާފުޅުކުރައްވާ ކަމެއްކަމަށް ވިދާޅުވެފައެވެ.

Advertisement

ހަމަމިއާއިއެކު ދިވެހިރާއްޖެ ޤައުމެއްގެ ގޮތުގައި ކުރިއަށް އޮތް މުސްތަޤުބަލު ބިނާކުރުމަށް އެ ވުޒާރާގެ މަސައްކަތްތަކަކީ މުހިންމު އަދި ކޮންމެހެން ބޭނުންތެރި މަސައްކަތްތަކަކަށް ވާނެކަމަށް ޤަބޫލުފުޅުކުރައްވާކަމަށް ވިދާޅުވިއެވެ.

ސަފީރު ޝައިޚް ޢަބްދުލްކަލާމް އާޒާދު އެ ވުޒާރާއަށް ޒިޔާރަތްކުރެއްވިކަމީ ވަރަށްއުފާފުޅު ކުރައްވާކަމެއްކަމަށް ވަޒީރު އާދަމް ނަޞީރު ވަނީ ވިދާޅުވެފައެވެ.

އިތުރަށް ވަޒީރު ވިދާޅުވީ ޒަމާނުއްސުރެ ދިވެހިރާއްޖެއާ ބަންގްލަދޭޝްއާ ދެމެދު އޮތް ގުޅުމަކީ ބަދަހިގުޅުމެއްކަމަށާއި، ވިޔަފާރީގެ ދާއިރާގައި އޮތް ގުޅުމުގެ އިތުރުން ބަހާއި ސަޤާފަތުގެ ގޮތުން ބަލާއިރު ވެސް އިހުޒަމާނުއްސުރެ ގުޅިފައިހުރި ގުޅުންތަކެއް އެބަހުރިކަމަށެވެ.

ހަމަ އެހެންމެ ވަކިން ޚާއްޞަކޮށް ރައީސް ޑރ މުޙައްމަދު މުޢިއްޒު ފަށްޓަވައިފައިވާ ދިވެހި ޤައުމިއްޔަތު އިޢާދަކުރުމުގެ މަޝްރޫޢާ ގުޅިގެން ދިވެހީންގެ ތަރިކަތައް ރައްކާތެރިކޮށް ދެމެހެއްޓުމުގެ ރޮނގުން ބަނގުލަދޭޝްގެ ޢިލްމީ އެހީތެރިކަމަށް އުންމީދުކުރައްވާކަމަށް ވަޒީރު ވަނީ ވިދާޅުވެފައެވެ.

ވުޒާރާގެ މަސައްކަތްތަކާ ގުޅޭ ދާއިރާތަކުން ދެ ޤައުމުގެ ދެމެދުގައި އިތުރަށް ގުޅުން ބަދަހިކޮށް އެހީތެރިކަން ފޯރުކޮށްދެވޭނެ ގޮތްތަކާބެހޭގޮތުން މި ބައްދަލުކުރެއްވުމުގައި ދެބޭފުޅުން ވަނީ ފުޅާދާއިރާއެއްގައި މަޝްވަރާ ކުރައްވައިފައިވެއެވެ.

އެގޮތުން ވަޒީރު އާދަމް ނަޞީރު އިބްރާހީމް ވަނީ ބަންގްލަދޭޝަކީ ސަގާފާތާ ބެހޭ މުހިންމު އެތައް ޢިލްމެއް އޮތް ޤައުމެއްކަން ފާހަގަކުރައްވާފައެވެ. އަދި އެދާއިރާތަކުގައި މި ވުޒާރާގެ މުވައްޒަފުންނަށާއި އެ ވުޒާރާގެ ދަށުން އަލަށް އުފެދިގެންދާ ދިރާސާ މަރުކަޒުގެ ދަރިވަރުންނަށް ޢިލްމު ފޯރުކޮށްދެވޭނެ ގޮތްތަކާބެހޭގޮތުން މަޝްވަރާކުރައްވާފައިވެއެވެ.

ޝައިޚް ޢަބްދުލްކަލާމް އާޒާދު ވަނީ ވަޒީރު އެދިވަޑައިގެންނެވި ގޮތަށް ވުޒާރާއަށް ބޭނުންވާ ޢިލްމީ އަދި ފަންނީ އެހީތެރިކަން ފޯރުކޮށްދެއްވާނެކަމުގެ ޔަޤީންކަން ދެއްވާފައެވެ.

އަދި މިހާރުވެސް ބަންގްލަދޭޝްއިން ރާއްޖެއަށް ތަފާތު ސްކޮލަރޝިޕްތަކުގެ ފުރުޞަތުތައް ފަހިކޮށްދެއްމުން ގެންދާކަމަށާއި، އެފަދަ އިތުރު ފުރުޞަތުތައް ރާއްޖެއަށް ފަހިކޮށްދެއްވުމަކީ އެމަނިކުފާނަށް ލިބިވަޑައިގަންނަވާނޭ ވަރަށްބޮޑު އުފާފުޅަކަށްވާނެކަމަށް ވަނީ ވިދާޅުވެފައެވެ.