ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ބޯހިޔާވަހިކަމުގެ ސިޔާސަތުގެ ދަށުން ހިންގާ އެންމެ ބިޔަ މަޝްރޫޢު، ފުށިދިއްގަރުފަޅު ތަރައްގީ ކުރުމުގެ އަމަލީ މަސައްކަތް މިއަދު ފަށަން ނިންމައިފިއެވެ. 

ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފަށަން ހަމަޖެހިފައިވަނީ މިއަދު ހަވީރުގެ ވަގުތެއްގައެވެ. 

އާބަންކޯގެ ބެލުމުގެ ދަށުން ކުރިއަށް ގެންދާ މި މަޝްރޫޢަށް ބިން ހިއްކަން ހަވާލު ކުރަނީ ލަންކާ ކުންފުންޏަކާ ކަމަށް މައުލޫމާތު ލިބިފައިވާއިރު، މަޝްރޫޢަށް ޚަރަދު ކުރާ ގޮތުގެ ތަފްސީލް އަދި ސަރުކާރުން ހާމައެއް ނުކުރެއެވެ. 

Advertisement

މި މަޝްރޫއު ފެށުމަށްޓަކައި މިދިޔަ ހަފުތާގެ ތެރޭގައި ރައީސް ވަނީ ގަރާރެއް ނެރުއްވައި ފުށިދިއްގަރުފަޅު ކ. ގުޅީގެ އިހްތިސާސްގެ ތެރެއިން އުނިކޮށްފަ އެވެ.

މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯއްދަވައިދެއްވުމަށް ކުރިއަށް ގެންދަވާ މި މަޝްރޫޢުގެ ދަށުން 1200 ހެކްޓަރުގެ ބިން ހިއްކަން ހަމަޖެހިފައިވާއިރު، އެއީ ބޮޑު މިނުގެ ގޮތުން ބަލާ ނަމަ ހުޅުމާލޭގެ ދެ ފިޔަވަހި އެއްކޮށްލީމާ އޮންނަ ސަރަހައްދަށްވުރެ ތިންގުނަ ބޮޑު ސަރަހައްދެކެވެ. 

މިމަޝްރޫޢުގެ ދަށުން ހިއްކާ ބިމުން 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ޕްލޭނުގައި ހިމަނާފައިވާ އިރު އެ މަސައްކަތުގެ ތެރެއިން ގާތްގަނޑަކަށް، 75،000 ޢާއިލާއަކަށް ބޯހިޔާވަހިކަން ކަށަވަރުވެގެންދާނެ ކަމަށް ޕްލޭނިންގ މިނިސްޓްރީން ވަނީ ބުނެފައެވެ. 

20 އަހަރުގެ ޕްލޭން އަކާއި އެކު ފަށާ މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ މުހައްމަދު މުއިއްޒު ވަނީ ވިދާޅުވެފަ އެވެ. 

މި މަޝްރޫޢު ކުރިއަށް ގެންދިޔުމަށް އަންނަ އަހަރަށް ލަފާކުރާ ދައުލަތުގެ ބަޖެޓްގައި މި ސަރުކާރުން އެދިގެން 400 މިލިއަން ރުފިޔާ ހިމަނާފައި އޮއްވާ، ކޮމިޓީ މަރުހަލާގައި އެމްޑީޕީގެ މެމްބަރުން ވަނީ އެ މަޝްރޫއު އުނިކޮށް، އެ ފައިސާ ގުޅިފަޅާއި ގިރާވަރުގެ ތަރައްގީއަށް ހިމަނައިފަ އެވެ.