މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނައުމަށް ރައީސް ޑރ. މުޙައްމަދު މުޢިއްޒުގެ މިސަރުކާރުން ކުރިއަށް ގެންދެވުމަށް ނިންމެވި އެންމެ ބިޔަ މަޝްރޫއުކަމަށްވާ ފުށިދިއްގަރުފަޅު، ނުވަތަ 'ރަސް މާލެ' ހިއްކުމުގެ މަސައްކަތް މިއަދު ފަށައިފިއެވެ.

މިއަދު ހަވީރު ފުށިދިއްގަރުފަޅު ސަރަހައްދުގައި މިމަސައްކަތް ރަސްމީކޮށް ފައްޓަވައިދެއްވީ ރައީސުލްޖުމުހޫރިއްޔާ ޑރ މުހައްމަދު މުޢިއްޒެވެ. 

ރަސްމިޔާތު ފައްޓަވައިދެއްވާ ވާހަކަފުޅު ދައްކަވަމުން ރައީސް މުޢިއްޒު ވަނީ، ފުށިދިއްގަރުފަޅު ތަރައްގީކުރާނީ 'ރަސްމާލެ' ގެ ނަމުގައި ކަމަށް ވިދާޅުވެފައެވެ. 

Advertisement

އަދި އެމަނިކުފާނުގެ އަމާޒަކީ ފުށިދިއްގަރުފަޅުގައި ތަރައްގީކުރާ ސިޓީއަކީ ޒީރޯ-ކާބަން ސިޓީއަކަށް ހެދުން ކަމަށާއި، އެ ތަން ތަރައްގީކުރާނީ 'މޯލްޑިވްސް އީކޯ ސިޓީގެ' ގޮތުގައި ކަމަށްވެސް ރައީސް ވިދާޅުވިއެެވެ. 

މި މަޝްރޫއު ފެށުމަށްޓަކައި މިދިޔަ ހަފުތާގެ ތެރޭގައި ރައީސް ވަނީ ގަރާރެއް ނެރުއްވައި ފުށިދިއްގަރުފަޅު ކ. ގުޅީގެ އިހްތިސާސްގެ ތެރެއިން އުނިކުރައްވާފަ އެވެ.

މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ކުރިއަށްގެންދާ މި މަޝްރޫޢުގެ ދަށުން 1153 ހެކްޓަރުގެ ބިން ހިއްކަން ހަމަޖެހިފައިވާއިރު، އެއީ ބޮޑު މިނުގެ ގޮތުން ބަލާ ނަމަ ހުޅުމާލޭގެ ދެ ފިޔަވަހި އެއްކޮށްލީމާ އޮންނަ ސަރަހައްދަށްވުރެ ތިންގުނަ ބޮޑު ސަރަހައްދެކެވެ. 

މި މަޝްރޫޢުގެ ދަށުން ހިއްކާ ބިމުން 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ޕްލޭނުގައި ހިމަނާފައިވާއިރު އެ މަސައްކަތުގެ ތެރެއިން ގާތްގަނޑަކަށް، 75،000 ޢާއިލާއަކަށް ބޯހިޔާވަހިކަން ކަށަވަރުވެގެންދާނެ ކަމަށް ޕްލޭނިންގ މިނިސްޓްރީން ވަނީ ބުނެފައެވެ. 

20 އަހަރުގެ ޕްލޭނަކާއެކު ފަށާ މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ މުހައްމަދު މުއިއްޒު ވަނީ ވިދާޅުވެފަ އެވެ.