ވައުދު ފުއްދެވުމުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ދައްކަވަމުން ދަނީ އެމަނިކުފާނުގެ ތެދުވެރިކަމާއި އިޚްލާސްތެރިކަން ކަމަށް ސްޕެޝަލް އެޑްވައިޒާ ޓު ދަ ޕްރެސިޑެންޓް އަބްދުއްރަހީމް އަބްދުﷲ ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައިވަނީ ވައުދުވެވަޑައިގެންނެވި ގޮތަށް މި ސަރުކާރުން އިއުލާނުކުރި ފުށިދިއްގަރުފަޅު މަޝްރޫއު އިފްތިތާހު ކުރެއްވުމާއި ގުޅިގެން ރައީސުލްޖުމްހޫރިއްޔާ ޑރ މުއިއްޒަށް މަރުހަބާ ދަންނަވާ އެކްސްގައި ކުރެއްވި ޕޯސްޓެއްގަ އެވެ. 

އަބްދުއްރަހީމް ވިދާޅުވީ ވެވަޑައިގެންނެވި ވައުދުފުޅާއި އެއްގޮތަށް، ފުށިދިއްގަރުފަޅު މަޝްރޫއު ފެއްޓެވުމުން، ރައީސުލްޖުމްހޫރިއްޔާ ޑރ މުއިއްޒުގެ ތެދުވެރިކަމާއި އިޚްލާސްތެރިކަމުގެ އިތުރުން އެމަނިކުފާނުގެ ޤާބިލުކަމާއި ހުޝިޔާރުކަން ވެސް ފެނިގެންދާ ކަމަށެވެ. 

މާތްﷲ ރައީސުލްޖުމްހޫރިއްޔާ ޑރ މުއިއްޒުގެ ޒައާމަތުގައި ބަރަކާތްލެއްވުން އެދި ދުއާކުރައްވާ ކަމަށާއި، ފަސް އެނބުރި ބެލުމެއްނެތި ރައްޔިތުންނާއި ޤައުމާއެކު ކުރިއަށް ވަޑައިގަތުމަށް ހިތްވަރުދެއްވާކަމަށް ވެސް އަބްދުއްރަހީމް ވަނީ ވިދާޅުވެފަ އެވެ. 

ފުށިދިއްގަރު ފަޅު މަޝްރޫއަށް ތައުރީފުކުރައްވާ އަބްދުއްރަހީމްގެ އެ ޕޯސްޓުގައި ވިދާޅުވެފައި ވަނީ ރަސްމާލެ މަޝްރޫޢަކީ މިހާތަނަށް ދިވެހީންގެރާއްޖޭގައި ހިންގާ އެންމެ ބޮޑު ބިންހިއްކުމުގެ މަޝްރޫޢު ކަމަށެވެ. 

އެ މަޝްރޫޢު ނިމިގެންދާއިރު ދިވެހީންގެރާއްޖެއިން އަމާން ރައްކާތެރި ހިތްފަސޭހަ ހުރިހައި ގޮތަކުން ފައްކާވެފައިވާ ފުރިހަމަ ރަސްމާލެއެއް ފެނިގެންދާނެކަމުގެ ޔަގީންކަން އޮތްކަމަށް އަބްދުއްރަހީމް ވަނީ ވިދާޅުވެފަ އެވެ.