ގެދޮރުވެރިކަމާއި ގުޅުން ހުރި އެކި ކަންކަމަށް ބޭންކުތައް މެދުވެރިކޮށް ދިނުމަށް ވައުދުވެވަޑައިގެންނެވި ލޯނުތައް ދޫކުރުމުގެ އިންތިޒާމް ދާދި އަވަހަށް ހަމަޖައްސައިދެއްވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ބޯހިޔާވަހިކަމުގެ އިންޤިލާބީ މަޝްރޫޢުކަމަށްވާ ފުށިދިއްގަރު ފަޅުގައި ތަރައްޤީ ކުރާ "ރަސްމާލެ" ސިޓީ ތަރައްޤީ ކުރާ ބިންހިއްކަން ފެށުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ މުއިއްޒު ވިދާޅުވީ، ރިޔާސީ އިންތިޚާބުގެ ކެމްޕެއިން ތެރޭގައި އެމަނިކުފާނު ވައުދުވެވަޑައިގެން ގޮތަށް ގެދޮރުވެރިކަމުގެ ލޯނުތައް ދޫކުރުމަށް ބޭންކިން ނިޒާމްގެ ތެރެއިން ފަހިކުރަންޖެހޭ ކަންކަން ހަމަޖައްސަވާ ވަރަށް އަވަހަށް އެކަންކަން އިއުލާނު ކުރައްވާނެކަމަށެވެ. 

މީގެ އިތުރުން ފަސް އިންސައްތައަށްވުރެ ކުޑަކޮށް ދޫކުރާ ލޯނުތައް ދޫކުރުމަށްޓަކައި ކުރަންޖެހޭ އިދާރީ، ފަންނީ މަސައްކަތްތައް މިހާރު ހިނގަމުންދާކަން ފާހަގަކުރައްވާ ރައީސް ވިދާޅުވީ، މާލެ ސަރަހައްދުން ކުރީ ސަރުކާރުން ދޫކުރި ގޯތިތަކުގައި ގެދޮރު ބިނާކުރުމަށްޓަކައި ތައާރަފްކުރާނެ ކަމަށް ވައުދުވެވަޑައިގެންނެވި ހާއްސަ ލޯނު ސްކީމް ވެސް އޭގެ ތެރެއިން ތައާރަފްވެގެންދާނެ ކަމަށެވެ. 

މީގެ އިތުރުން މިއަދުގެ ރަސްމިޔާތުގައި ވާހަކަފުޅު ދައްކަވަމުން ރައީސް ވިދާޅުވީ ރައްޔިތުންނަށް ދޫކުރި ގޯއްޗާއި ފްލެޓްތައް އެ ފަރާތްތަކަށް ލިބޭނެކަމަށާއި ގެޒެޓްކޮށްފައިވާ ލިސްޓުން އެއްވެސް ފަރާތެއް ގޯތީގެ ހައްޤުން އުނި ނުކުރައްވާނެކަމުގެ ޔަގީންކަން ދެއްވާކަމަށެވެ. ރައީސް ވިދާޅުވީ، އޭގެ ބަދަލުގައި ނުހިއްކާހުރި ފަޅުތައް ހިއްކައިގެން ގޯތި ދީ މިހާރަށް ވުރެ ފުރިހަމައަށް އެކަންކަން ހަމަޖައްސަވައިދެއްވާނެ ކަމަށެވެ. 

ރާއްޖޭގެ ހުރިހާ ބޭންކުތަކުން ވެސް ގެދޮރުވެރިކަމަށް ފަސޭހައިން ލޯނު ލިބޭނެ ގޮތް ފަހިކޮށްދެއްވުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. މޯލްޑިވްސް މަނިޓަރީ އޮތޯރިޓީ (އެމްއެމްްއޭ)އިން ފެށިގެން، ބޭންކް އޮފް މޯލްޑިވްސް (ބީއެމްއެލް) އަދި ދެން ވެސް ރާއްޖޭގައި އޮޕަރޭޓް ކުރާ ކޮމާޝަލް ބޭންކުތަކުން، ފަސޭހަކަމާއެކު އަތްފޯރާ ފަށުގައި ލިބޭ ހައުސިން ލޯން ސްކީމްތައް ތައާރަފް ކޮށްދެއްވާނެ ކަމަށް އެމަނިކުފާނު ވަނީ ވައުދުވެވަޑައިގަންނަވާފައެވެ.