ހުސްވެެފައިވާ މާލެ ސިޓީގެ މޭޔަރުކަމުގެ މަޤާމަށް ކުރިމަތިލައްވާފައިވާ ބޭފުޅުންނަށް ދައުވަތު ދެއްވައިގެން ސަންގު ޓީވީން އިންތިޒާމުކޮށްގެން ކުރިއަށްގެންދަން ހަމަޖައްސާފައިވާ ސަންގު ބަހުސްގައި ބައިވެރިވެވަޑައިނުގެންނެވުމަށް މި އިންތިޚާބުގައި އެމްޑީޕީގެ ފަރާތުން ކުރިމަތިލައްވާފައިވާ އާދަމް އާޒިމް ނިންމަވައިފި އެވެ. 

އެކަން އަންގާ އެމްޑީޕީން އެކްސްގައި ކުރި ޕޯސްޓެއްގައި ބުނެފައިވަނީ އާޒިމް ބަހުސްގައި ބައިވެރިވެވަޑައިނުގެންނެވުމަށް ނިންމަވާފައިވާކަން ސަންގު ޓީވީއަށް މިހާރު އަންގާފައިވާ ކަމަށެވެ. 

އާޒިމް ބަހުސްގައި ބައިވެރިވެވަޑައިނުގެންނެވުމަށް ނިންމެވީ ސަންގު ޓީވީ ބަހުސް މިނިވަންކަމާއެކު ކުރިއަށްގެންދިއުމަށް މިނިވަން މޮޑަރޭޓަރެއް ބަހައްޓައިދިނުމަށް އެދިވަޑައިގެންނެވި ނަމަވެސް، އެކަމަށް އެއްވެސް އިޖާބައެއް ދީފައި ނުވާތީކަމަށް އެމްޑީޕީން ބުނެއެވެ.

މީގެ އިތުރުން އިންތިޚާބު އޮންނަ ދުވަސް މިހާ ކުޑަތަންވެފައިވަނިކޮށް ހަތަރު ދުވަހަށް ދިގުދެމިގެންދާ ބަހުސެއްގައި މޭޔަރު ކެންޑިޑޭޓް ތާށިވުމަކީ ކެމްޕެއިންގައި ދެންކުރަން ހުންނަ ކަންތައްތަކަށް އަސަރުކުރާނެ ކަމަކަށް ވާނެތީ، އެއީ ވެސް ބަހުސްގައި ބައިވެރިވެވަޑައިނުގެންނެވުމަށް އާޒިމް ނިންމެވި ސަބަބެއް ކަމަށް އެމްޑީޕީން ބުނެއެވެ. 

އެމްޑީޕީން އިތުރަށް ބުނީ ސަންގު ބަހުސްގައި ބައިވެރިވެވަޑައިނުގެންނެވި ކަމުގައި ވީ ނަމަވެސް 6 ޖެނުއަރީގައި ޕީއެސްއެމް އިން އިންތިޒާމުކޮށްގެން ބާއްވާ ބަހުސްގައި އާޒިމް ބައިވެރިވެވަޑައިގަންނަވާނެކަމަށެވެ.

މާލެ ސިޓީގެ މޭޔަރަކު ހޮވުމަށް ބާއްވާ އިންތިޚާބުގައި އާޒިމްގެ އިތުރުން 4 ބޭފުޅުން ވާދަކުރުމަށް ވަނީ ނިންމަވާފަ އެވެ. 

މި އިންތިޚާބުގައި ސަރުކާރު ހިންގާ މައި ޕާޓީއާއި، ވާދަވެރި އެމްޑީޕީގެ އިތުރުން ދަ ޑިމޮކްރެޓްސްގެ ފަރާތުން ކެންޑިޑޭޓުން ވާދަކުރައްވައެވެ.