އިއްޔެ ފެށިގެން ދިޔަ، ބޯހިޔާވަހިކަމުގެ ބިޔަ މަޝްރޫޢު އިން ބިންގާ އެޅިގެންދިޔަ 'ރަސްމާލެ' އަށް ދަތުރު ފަތުރު ކުރުމަށް ބޭނުންކުރާނެ ފެރީގެ ނިޒާމަކީ ދަތުރު ކުރާއިރު ކަނޑުގެ ރާޅާއި އޮއިގައި އެހާބޮޑަށް ނުޖެހި ދުއްވޭ ކަހަލަ ފެރީގެ ނިޒާމެއް ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

ރަސްމާލެ މަޝްރޫޢު އަށް ބިންހިއްކުމުގެ މަސައްކަތް ފެއްޓެވުމަށް އިއްޔެ ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، ރަސްމާލެ އަށް ދަތުރުފަތުރު ކުރުމަށް ގެންނަން ހަމަޖެހިފައިވަނީ ރާޅުގެ އުނދަގޫ ނުޖެހި ދަތުރު ކުރެވޭ ހައި ސްޕީޑް ފެރީގެ ނިޒާމެއް ކަމަށެވެ.

ޖަޕާންގައި ބޭނުން ކުރާ، ރާޅާއި އޮއިގެ އުނދަގުލުގައި ނުޖެހި ރާޅު މަތިން ދަތުރު ކުރާ ހައިޑްރޯ ފޮއިލް ފެރީއެއް--

މީގެ އިތުރުން ރަސްމާލެ އަށް ދަތުރުފަތުރު ކުރުމަށް އިތުރަށް ފަސޭހަ ކުރުމަށްޓަކައި އެތަނާއި އެންމެ ކައިރީގައި އޮތް ފަޅުގައި ވެލާނާ އިންޓަނޭޝަނަލް އެއާޕޯޓަށް އުނދަގޫ ނުވާނެ ގޮތަކަށް އިތުރު އެއާ ސްލިޕެއް ވެސް ގާއިމް ކުރައްވާނެކަމަށް ރައީސް މުޢިއްޒު ވިދާޅުވި އެވެ. 

ރައީސް މުޢިއްޒު ވިދާޅުވީ، ރަސްމާލެ ވެގެންދާނީ، ގެދޮރުވެރި ކަމާއި، ވިޔަފާރި އާއި ވަޒީފާގެ ފުރުސަތުތައް ރައްޔިތުންނަށް ހޯދައިދޭނެ ސިޓީއަކަށް ކަމަށެވެ.

އަދި އެތަން ތަރައްގީ ކުރާނީ ތިމާވެއްޓާ ރައްޓެހި، ފެހި، ކާބަން ފްރީ އިކޯ ސިޓީއެއްގެ ގޮތުގައި ކަންވެސް އެމަނިކުފާނު ފާހަގަކުރެއްވިއެވެ. 

އިއްޔެގެ ރަސްމިޔާތު ގައި ވާހަކަ ދައްކަވަމުން ރައީސް މުޢިއްޒު ވަނީ ވަޢުދުވެވަޑައިގެންނެވި ގޮތަށް މަސައްކަތް ފަށާތާ 8 މަސްދުވަހުގެ ތެރޭގައި ފުށިދިއްގަރު ފަޅުގައި 1150 ހެކްޓަރުގެ ބިން ހިއްކާނެކަމަށެވެ.