ފޯޅަވަހި މައްސަލަައިގައި އެޅެން ހުރި ފިޔަވަޅުތައް ބެލުމަށް މަސައްކަތް ފަށާފައިވާ ކަމަށް އެެޓާނީ ޖެނެރަލްގެ އޮފީހުން ބުނެފިއެވެ.

އޭޖީ އޮފީހުން ނެރެފައިވާ ނޫސް ބަޔާނެއްގައި ބުނެފައިވަނީ ރާއްޖެގެ އެކްސްކްލޫސިވް އިކޮނޮމިކް ޒޯންގެ ދެކުނުން ފޯޅަވައްސަށް ފުށުއަރާކަމަށްބުނެ އިންޓަރނޭޝަނަލް ޓްރައިބިޔުނަލް އޮން ލޯ އޮފްދަ ސީ ގައި މޮރިޝަސްގެ ފަރާތުން މައްސަލައާއި ގުޅޭގޮޮތުން ނިމިދިޔަ ސަރުކާރުން ގެންގުޅުއްވައިފައިވާ ސިޔާސަތަކީ ދިވެހިރާއްޖެގެ ޤާނޫނުއަސާސީ އާއި ޤާނޫނުތައް ފުށުއަރާ ގޮތައް އަދި ރާއްޖޭގެ މަސްލަހަތު ގެއްލޭގޮތައް ނިންމާފައިވާ ނިންމުމެއް ކަމަށް ފެންނާތީ އެމަސައްކަތް ރައީސް ޑރ މުޙައްމަދު މުޢިއްޒު އޭޖީ އޮފީހާއި ހަވާލު ކޮށްފައިވާ ކަމަށެވެ.

މީގެ އިތުރުން މިމައްސަލައާއި ގުޅިގެން ބައިނަލް އަޤްވާމީ އިސް މާހިރުންގެ ލަފާ ހޯދުމުގެ މަސައްކަތްވެސް މިހާރުވާނީ ފަށައިފައި ކަމަށް އޭޖީ އޮފީހުން ވަނީ ބުނެފައެވެ.

ހަމަމިއާއި އެކު އެމަސައްކަތް ޚާއްސަ ސަމާލުކަމެއް ދީގެން ކުރިއަށް ގެންދިޔުމަށްޓަކައި އެއޮފީހުން ކޮމިޓީއެއް އެކުލަވައިލައި އެކޮމިޓީގެ މެމްބަރުން ހަމަޖައްސަވައިފައިވާ ކަމަށްވެސް ބުނެފައިވެެވެ.

އެގޮތުން އެކޮމެޓީގެ މެމްބަރުންގެ ގޮތުގައި ކުރީގެ އޭޖީ އަލްއުސްތާޒް މުޙައްމަދު އަނިލް، މިނިސްޓްރީ އޮފް ޑިފެންސްގެ ފަރާތުން ކާނަލް އަޙްމަދު މުޖްތަބާ، ފޮރިން މިނިސްޓްރީގެ ފަރާތުން އަލްފާޟިލް އަޙްމަދު ޝިޔާން ހަމަޖެއްސެވިކަމަށްވެސް ބުނެފައިވެއެވެ.

އަދި މިމައްސަލައިގައި މިހާތަނަށް ބެލި ބެލުމުން ކުރީގެ ރައީސް އިބްރާހިމް މުޙައްމަދު ޞާލިޙް މޮރިޝަސްގެ ބޮޑުވަޒީރަށް 22 އޮގަސްޓު 2022 ގައި ފޮނުވައިފައިވާ ސިޓީއެއްގެ ކޮޕީ އާއި އެސިޓީގެ ޖަވާބުގެ ގޮތުގައި 22 ސެޕްޓެމްބަރު 2022 ގައި މޮރިޝަސްގެ ބޮޑުވަޒީރު ފޮނުއްވައިފައިވާ ސިޓީ ވެސް އެއޮފީހަށް ލިބިފައިވާ ކަމަށް އެއޮފީހުން ބުނެފައިވެއެވެ.

މިމައްސަލައާއި ގުޅިގެން ރާއްޖޭގެ އަދި ރާއްޖެއިން ބޭރުގެ މާހިރުން ލަފާގެ މައްޗަށް ރިޢާޔަތްކޮށް، ނިމިދިޔަ ސަރުކާރުގެ ފަރާތުން ރާއްޖެގެ ޤާނޫނު އަސާސީ އާއި ޤާނޫނުތަކާއި ފުށުއަރާގޮތައް، އަދި ރާއްޖެގެ އެންމެ މަތީ މަސްލަޙަތު ގެއްލޭގޮތަށް ގެންގިޅުއްވައިފައިވާ ޤާނޫނީ ޕޮޒިޝަނާއި ޢަމަލުކުރައްވާފައިވާ ގޮތާއި ގުޅޭގޮތުން އެކުލަވައިލެވޭ ރިޕޯޓް ރައީސް އަށާއި، ރައްޔިތުންގެ މަޖިލީހަށް ފޮނުވުމުގެ އިތުރުން މިކަމާއި ބެހޭ މައުލޫމާތު އާންމު ކުރުމަށް އޭޖީ ނިންމަވައިފައިވާ ކަމަށްވެެސް އެރިޕޯޓުގައި ބުނެފައިވެއެވެ.