ރައީސުލް ޖުމްހޫރިއްޔާ ޑރ. މުހައްމަދު މުޢިއްޒު، ދަ ޑިމޮކްރެޓްސް ގެ ރައީސް އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި އިއްޔެ ބައްދަލު ކުރައްވައި މަޝްވަރާ ކުރެއްވި ކަންކަމުގެ ތަފްސީލް ޕާޓީ މެންބަރުންނަށް ހާމަ ނުކުރައްވާތީ، އެސްޓީއޯގެ ކުރީގެ އެމްޑީ އަދި ދަ ޑިމޮކްރެޓްސް ގެ އިސް އެއް ފަރާތް، ހުސައިން އަމްރު ނުރުހުން ފާޅުކުރައްވައިފިއެވެ. 

ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވަނީ އިއްޔެގެ ވަގުތެއްގައި، ދަ ޑިމޮކްރެޓްސް ގެ އިތުރުން ރާއްޖޭގެ އިތުރު ތިން ބޮޑު ޕާޓީގެ އިސް ވެރިންނާއި ބައްދަލު ކުރައްވާފައެވެ. 

އެގޮތުން ބައްދަލު ކުރައްވާފައި ވާ ބޭފުޅުންނަކީ؛

1) ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހިމް

2) މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ރައީސް، ދ. މީދޫ ދާއިރާގެ މެމްބަރު އަހުމަދު ސިޔާމް މުހައްމަދު

3) މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރައީސް، ދަނގެތީ ދާއިރާގެ މެމްބަރު މުހައްމަދު ނާޒިމް

މި ބައްދަލުވުން ތަކުގެ ތަފްސީލް ހާމަ ކުރަމުން، ރައީސް އޮފީހުން ބުނީ، އެ ބައްދަލުވުން ތަކުގައި މައިގަނޑު ގޮތެއްގައި މަޝްވަރާކުރެވުނީ ޤައުމުގެ ކަންކަން ކުރިޔަށްގެންދިއުމުގައި އެންމެން ގުޅިގެން ރައްޔިތުންގެ ފައިދާއާއި ލާބައަށް މަސައްކަތްކުރުމުގެ މުހިންމު ކަމުގެ މައްޗަށް ކަމަށެވެ.

އެގޮތުން ޤައުމުގައި ސުލްޙައާއި ހަމަޖެހުން ޤާއިމުކުރުމާއި ސަރުކާރުން ކުރިޔަށްގެންދަވާ ތަރައްޤީގެ އެކިއެކި މަޝްރޫޢުތަކާއި ދާޚިލީ އަދި ޚާރިޖީ އެކިއެކި ކަންކަމުގައި ޤައުމީ މަސްލަޙަތު އިސްކުރައްވައި، ސަރުކާރަށް އެބޭފުޅުންގެ ފުރިހަމަ އެއްބާރުލުމާއި ތާއީދު ދެއްވާނެކަމުގައި އެބޭފުޅުން ފާހަގަކުރައްވާފައިވާ ކަމަށާ ސަރުކާރު ހިންގެވުމުގައި ސިޔާސީ ހުރިހާ ފަރާތްތަކެއްގެ ޚިޔާލާއި މަޝްވަރާ ވަރަށް މުހިންމުކަމަށް ރައީސް މުޢިއްޒު ވިދާޅުވި ކަމަށް އެ އޮފީހުން ބުނެފައިވެއެވެ. 

ނަމަވެސް، އިތުރަށް އެކަމާއި ގުޅޭ މައުލޫމާތު ހާމަކޮށްފައެއް ނުވެއެވެ. 

އެ ބައްދަލުވުން ނިންމަވާލެއްވުމަށްފަހު ގާސިމް ވަނީ އައު ސަރުކާރުގެ ވަޒީރުންނަށް ރުހުންދީ އައު ސަރުކާރަށް ފުރުސަތު ދޭންޖެހޭ ކަމަށް ވިދާޅުވެފައެވެ. 

އެހެން ޕާޓީތަކުގެ ލީޑަރުން އެއްވެސް އެއްޗެއް ވިދާޅެއް ނުވެއެވެ. 

މިކަމާއި ގުޅިގެން ނުރުހުން ފާޅުކުރައްވައި، ނިމިދިޔަ ޑިމޮކްރެޓްސް ގެ އެތެރޭގެ އިންތިޚާބުގައި، ޑިމޮކްރެޓްސް ގެ ރައީސް ކަމަށް ހަސަނާއި ވާދަކުރެއްވި އަމްރު، ކުރެއްވި ޓްވީޓެއްގައި ވިދާޅުވީ، ރައީސުލްޖުމުހޫރިއްޔާ އަޒުލުކުރުމުގެ ވާހަކަތަކެއް ފެންމަތިވެފަވާ ވަގުތެއްގަ، ސިޔާސީ ޕާޓީތަކުގެ ވެރިންނާ ރައީސުލް ޖުމްހޫރިއްޔާ ކުއްލިޔަކަށް ބައްދަލުކުރައްވާ ކުރެވުނު މަޝްވަރާގެ ތަފްސީލު އެ ޕާޓީތަކުގެ އާންމު މެންބަރުންނާ ރައްޔިތުންނަށް ސާފުވުމަކީ މުހިންމު ކަމެއް ކަމަށެވެ. 

އަމްރު މިފަދައިން ވިދާޅުވެފައި ވާއިރު، ދާދިފަހުން އެމްޑީޕީ މެޖޯރިޓީ އޮންނަ މަޖިލީހުން ވަނީ، ހަމައެކަނި އެ ޕާޓީގެ މެންބަރުންނަށްވެސް ރައީސުލްޖުމުހޫރިއްޔާ އާއި ނާއިބު ރައީސް އަވަސް މަރުހަލާއެއްގައި އަޒުލު ކުރެވޭގޮތަށް މަޖިލީހުގެ ގަވާއިދު ބަދަލު ކުރަން ފާސްކޮށްފައެވެ.