މާލެ ސަރަހައްދަށް ކުރިމަތިވެފައިވާ ބޯހިޔާވަހިކަމުގެ އެންމެ ބޮޑު މަޝްރޫޢުކަމަށްވާ ރަސްމާލެ ތަރައްޤީކުރުމުގެ މަޝްރޫޢު ކުރިއަށް ގެންދަނީ ގާނޫނާއި ގަވާއިދުތަކާއި އެއްގޮތަށް އީއައިއޭ ވެސް ހަދައިގެން ކަމަށް، އެ މަސައްކަތާ ހަވާލުވެފައިވާ އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ރަސްމާލެ މަޝްރޫއާ ގުޅޭގޮތުން ނޫސްވެރިންނަށް މަޢުލޫމާތުދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ފަޒުލް ވަނީ، އެ މަޝްރޫއު ކުރިއަށް ގެންދަނީ އެފަދަ ބޮޑު ބިމެއް ހިއްކުމުގެ ސަބަބުން ތިމާވެއްޓަށް ކުރާނެ އަސަރާއި ގުޅޭގޮތުން އީއައިއޭ ރިޕޯޓް ހެދުމަށްފަހުގައި ކަމަށެވެ.
އަޅުގަނޑުމެން މި ޕްރޮޖެކްޓް މި ކުރިއަށް ގެންދަނީ ދިވެހިރާއްޖޭގައި ހެދިފައި އޮންނަ ގަވާއިދުގެ އިމުގެ ތެރެއިން، އީއައިއޭ ރިޕޯޓް ހެދިގެން. އަދި އީއައޭގެ ރިޕޯޓް ނޫސްވެރިންނާއިވެސް ހިއްސާކުރެވިފައިވާނެ. އޭގައި ތަފްސީލް ވެސް ހިމެނޭނެ. އަޅުގަނޑުމެން މިދަނީ ޕްރޮގްރެސިވް އީއައިއޭ ތައްޔާރު ކުރަމުން. އެހެންވީމާ ޕްރޮގްރެސިވް ޑިވެލޮޕްމެންޓް ތަކެއް އަންނަ އިރުގައި، މަޝްރޫއު ކުރިއަށްދާ ވަރަކަށް އީއައިއޭ ހެދެމުންދާނެ.
އާބަންކޯގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު
މިއަދުގެ ނޫސްވެރިންގެ ބައްދަލުވުމުގައި ފަޒުލް ވަނީ ފުށިދިއްގަރުފަޅު ހިއްކުމަށް ބަޖެޓް ކަނޑައެޅި ގޮތުގެ ތަފްސީލް ވެސް ހާމަކުރައްވާފައެވެ.
އެގޮތުން އޭނާ ވިދާޅުވީ، ފުށިދިއްގަރުފަޅު ހިއްކަނީ، އެބިން ހިއްކާ ކުންފުނިކަމަށްވާ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އަށް 70 ހެކްޓަރުގެ ބިން ބަދަލުގެ ގޮތުގައި ދީގެންކަމަށެވެ.
ފަޒުލް ވިދާޅުވީ އެކަމަށް ޚަރަދު ކުރާނީ ފައިސާ ނޫން ކަމަށާއި ފައިސާ ޚަރަދުކުރުމުގެ ބަދަލުގައި ނިންމާފައިވަނީ އެ މަޝްރޫޢު ތަންފީޒުކުރާ ކުންފުންޏަށް 70 ހެކްޓަރުގެ ބިން ވިޔަފާރި އުސޫލުން ބޭނުންކުރުމަށް ދިނުން ކަމަށެވެ.
އަދި ސީއެމްސީއަށް އާބަންކޯއިން ދޭ ބިމުގެ ތެރެއިން 10 ހެކްޓަރުގެ ބިން ދިނުމަށް ނިންމާފައިވަނީ ހުޅުމާލެއިން ކަމަށާއި އެ ބިންތައް ސީއެމްސީން ބޭނުންވާ ގޮތަކަށް ވިއްކުމުގެ ހުއްދަ އެ ކުންފުންޏަށް ދިން ނަމަވެސް އެ ބިންތައް ވިއްކަންޖެހޭނީ ހުޅުމާލޭގެ މާސްޓާ ޕްލޭނާ ފުށުނާރާ ގޮތެއްގައި ކަމަށްވެސް ފަޒުލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
