ނޫސްތަކަށް ފިޔަވަޅު އެކުމަކީ, މޯލްޑިވްސް މީޑިއާ ކައުންސިލް، އެމްއެމްސީގެ ޒިންމާއެއް ކަމަށާ، ސަރުކާރުން އެއަށް ވަނުމަކީ ގާނޫނީ ނިޒާމް ތަރުތީބު ވެފައިވާ ގޮތެއް ނޫން ކަމަށް، ނޫސްވެރިންގެ ހައްގުގައި ވަކާލާތުކުރާ މޯލްޑިވްސް ޖާނަލިސްޓް އެސޯސިއޭޝަން، އެމްޖޭއޭ އިން ބުނެފިއެވެ.
ސަރުކާރަށް ފާޑުކިޔައި، ލިޔުންތައް ޝާއިއުކުރަމުންދިޔަ ދެ ވެބްސައިޓަކާއި ރަޖިސްޓާކޮށްގެން ހިންގާ "ފުރަތަމަ.ކޮމް" ނޫހުގެ ވެބްސައިޓް ސަރުކާރުން ބްލޮކްކުރުން ކުށްވެރިކޮށް އެމްޖޭއޭ އިން ނެރުނު ނޫސް ބަޔާނެއްގައި ބުނީ، ސަރުކާރުގެ އެ ފިޔަވަޅަކީ ރައްޔިތުންނަށް މައުލޫމާތު ލިބުމުގެ ހައްގާއި ނޫސްވެރިކަމުގެ މިނިވަންކަމާއި ހިޔާލުފާޅުކުރުމުގެ ހައްގަށް ހުރަސްއެޅޭ ގޮތަށް އެޅި ފިޔަވަޅެއް ކަމަށް ގަބޫލު ކުރާ ކަމަށެވެ.
އަދި ސަރުކާރުން އެފަދަ ފިޔަވަޅެއް އަޅާފައިވަނީ އެކަން ކުރުމުގެ އުސޫލެއް އާންމު ކުރުމަކާ ނުލާ ކަން ފާހަގަކޮށް އެމްޖޭއޭއިން ބުނީ ހަރުދަނާ ދެފުށް ފެންނަ އުސޫލެއް ނެތި އިންޓަނެޓް ސެންސަޝިޕް ސަރުކާރުން އެކްސަސައިޒް ކުރުމަކީ އެއްވެސް ހާލެއްގައި ގަބޫލުކުރާނެ ކަމެއް ނޫން ކަމަށެވެ.
އެމްޖޭއޭ އިން ވަނީ އެކަމާ ދެކޮޅު ހަދާކަމަށާ، ހަރުކަށި އިބާރާތުން އެކަން ކުށްވެރިކުރާ ކަމަށް ބުނެފައެވެ. އަދި ސަރުކާރުން ފިޔަވަޅު އަޅަނީ އެއްވެސް އުސޫލެއް ނެތި ކަމަށް ބުނެ، އެކަން ވަގުތުން ވަގުތަށް ހުއްޓާލުމަށް އެ ޖަމިއްޔާ އިން ވަނީ ގޮވާލާފައެވެ.
"ޑިމޮކްރަަސީއާ ބީރައްޓެހި މި ފިޔަވަޅުތަކަކީ، ނޫސްތަކަށާއި ނޫސްވެރިން އަދި ޖުމްލަކޮށް ހުރިހާ ރައްތިތުންނަށްްވެސް ސަރުކާރުން ދިން ވަރަށް ބޮޑު ނުރައްކަލުގެ ރަނގަބީލެއްގެ ގޮތުގައި މި ޖަމިއްޔާއިން ސިފަ ކުރަމެވެ. އަދި މިއީ ރާއްޖޭގެ ޑިމޮކްރަސީގެ ހަޔާތުގައި އެތައް އަހަރެއްް ފަހަތަށް ސޮސްސާލައިގެންދާފަދަ ބިރުވެރި ނިންމުމެއްގެ ގޮތުގައި މި ޖަމިއްޔާއިން ދެކެމެވެ."
އެމްޖޭއޭގެ ބަޔާން
މިއާއެކު އެމްޖޭއޭ އިން ބުނީ، ނޫސްވެރިކަމުގެ އަހްލާގީ މިންގަނޑު ހިފެހެއްޓުމާއި ދޮގު މައުލޫމާތު ފެތުރުން ހުއްޓުވުމައި އެކަމުގައި ފިޔަވަޅު އެޅުމަކީ މޯލްޑިވްސް މީޑިއާ ކައުންސިލްގެ ގާނޫނުގެ ދަށުން މޯލްޑިވްސް މީޑިއާ ކައުންސިލް (އެމްއެމްސީ)ގެ މެންޑޭޓް ކަމުގައި ކަނޑައަޅާފައިވާ ކަމެއް ކަމަށެވެ.
"ރަޖިސްޓާ ނުކޮށް ހިންގާ ނޫސްތަކަކީ ވެސް އެމްއެމްސީ އަށް ރެގިއުލޭޓްކޮށް އެ ގާނޫނުން މީޑިއާގެ ގޮތުގައި ބަލައިގެންފައިވާ ނޫސްތަކަށްވާއިރު ވެބްސައިޓްތަކުގެ މައްސަލައެއް އުޅޭ ނަމަ, އެކަން ބަލައި ފިޔަވަޅު އެޅުމަކީ އެމްއެމްސީ އަށް ގާނޫނުން ލާޒިމް ކުރާ ކަމެކެވެ. އެކަމުގެ ތެރެއަށް ސަރުކާރުން ވަދެ ބަސް ކިޔައި ފިޔަވަޅު އެޅުމަކީ ގާނޫނީ ނިޒާމް ތަރުތީބުކޮށްފައިވާ ގޮތެއް ނޫނެވެ."
އެމްޖޭއޭގެ ބަޔާން
މިއާއެކު އެމްޖޭއޭ އިން ވަނީ ގާނޫނުން އެމްއެމްސީ އަށް ހަވާލުކޮށްފައިވާ ޒިންމާ އެންމެ ރަނގަޅު ގޮތުގައި އަދާކުރުމަށް އެ ކައުންސިލް ބާރުވެރިކުރުވައި, އެހީތެރިކަން ފޯރުކޮށްދިނުމަށް ގޮވާލާފައެވެ.
ޑިސް އިންފޮމޭޝަން އާއި މިސް އިންފޮމޭޝަންއާ ދެކޮޅަށް މަސައްކަތް ކުރުމަކީ އެ ޖަމިއްޔާ އިން ވެސް ތާއިދު ކުރާ ކަމެއް ނަމަވެސް ވެބްސައިޓްތައް ބްލޮކްކުރުމަކީ އެކަމަށް އޮތް ފަރުވާއެއް ކަމަށް އެމްޖޭއޭ އިން ނުދެކެއެވެ.
އަދި އެކަން ހައްލު ކުރުމަށް އޮތް އެންމެ ރަނގަޅު މަސައްކަތަކީ ދޮގު މައުލޫމާތު ދެނެގަންނަން އާންމުން ހޭލުންތެރިކުރުމާއި ފެކްޓް-ޗެކިން މަސައްކަތް ޕްރޮފެޝަނަލްކަމާ އެކު ކުރުމަށް ސަރުކާރުން މީޑިއާއަށް އެހީވުން ކަމަށް ވެސް ބަޔާނުގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
