މިހާރު ފެތުރެމުންދާ ކޮވިޑް19ގެ އައު ވޭރިއަންޓް ޖޭއެން.1, 41 ޤައުމަކުން ފެނިފައިވާ ކަމަށް ވޯލްޑް ހެލްތު އޯގަނައިޒޭޝަން (ޑަބްލިޔުއެޗްއޯ) އިން ބުނެފިއެވެ.

އަލްޖަޒީރާއިން ބުނީ މީގެ ހަތަރު އަހަރުކުރިން މުޅި ދުނިޔެ ޕެންޑަމިކްގެ ހާލަތައް ގެނައި ކޮވިޑް19 ގެ އަލަށް ފެތުރެން ފަށާފައިވާ މި ވޭރިއަންޓް ފުރަތަމަ ފެނިފައިވަނީ އިނގިރޭސިވިލާތުން ކަމަށެވެ.

އަލްޖަޒީރާއިން ބުނީ ކޮވިޑްގެ މިވޭރިއަންޓް ޕަބްލިކް ހެލްތު އެޖެންސީތަކުން ވަރަށް ގާތުން މޮނިޓަރ ކުރަމުންދާކަމަށެވެ.

Advertisement

މިހާރު އަލަށް ފެނިފައިވާ ކޮވިޑް 19ގެ އައު ވޭރިއަންޓް ޖޭއެން.1 އަކީ އޭގެ ޕޭރެންޓް ވޭރިއަންޓް ކަމަށްވާ ބީއޭ.2.86 އިން އުފެދިފައިވާ ވޭރިއެންޓެއް ކަމަށާއި އަދި މި ވޭރިއަންޓް އަކީ މިފާއިތުވި އަހަރު ވަރަށް ބާރުމިނުގައި ފެތުރުނު އޮމިކްރޯން އިން އުފެދިގެން އައި ވޭރިއެންޓެއް ކަމަށެވެ.

މިހާތަނަށް މި ވޭރިއަންޓް އެންމެ ބޮޑަށް ފެތުރިފައިވާ ކަމަށް ރިޕޯޓް ކޮށްފައިވަނީ ފްރާންސް، ސިންގަޕޫރް، ކެނެޑާ، އިނގިރޭސި ވިލާތް އަދި ސްވިޑަން އިންނެވެ. އަދި ޗައިނާއިން ވެސް 6 ކޭސް ރިޕޯޓު ކުރެވިފައިވާ ކަމަށް އަލްޖަޒީރާއިން ބުނެފައިވެއެވެ.

ޑިސެމްބަރު މަހުގެ ކުރީކޮޅު އިންޑިޔާގެ ކެރެލާއިން ވަނީ ކޮވިޑްގެ އައު ވޭރިއަންޓްގެ ކޭހެއް ފެނިފައެވެ. އެއީ އުމުރުން 79 އަހަރުގެ އަންހެނެއްގެ ފަރާތުންނެވެ.

އޭގެ ފަހުން އިންޑިޔާގެ އެހެން ސަރަހައްދުތަކުން ވެސް ވަނީ މި ވޭރިއަންޓްގެ ކޭސްތައް ފެނިފައެވެ.

ދިރާސާ ކުރާ ފަރާތްތަކުން ބުނެފައިވަނީ މި ވޭރިއަންޓް މިގޮތައް ފެތުރިގެން ދިޔަޔަސް މިއީ މާބޮޑަށް ކަންބޮޑުވާންވީ ކަމެއް ނޫން ކަމަށެވެ. އަދި މިދުވަސްވަރު މިވޭރިއަންޓްގެ ކޭސްތައް ފެތުރެމުންމިދަނީ ފިނިމޫސުމުގެ ސަބަބުން ކަމަށް ވެސް އަލްޖަޒީރާއިން ބުނެފައިވެއެވެ.

ކޮވިޑް-19ގެ އެހެން ވޭރިއަންޓްތަކާއި އެއްގޮތައް މިވޭރިއަންޓްގެ ޢަލާމާތްތަކާއި އަސަރު ވެސް ކުރަނީ އެމީހެއްގެ ދިފަޢީ ނިޒާމާއި އެމީހެއްގެ އާންމު ސިއްހަތާއި ގުޅިގެންނެވެ. 

އަދި އަލާމާތްތަކަކީ ހުން އައުން، ކެއްސުން، ގައިގަރިއްސުން އަދި ވަރުދެރަވެ ވަރުބަލިވުމެވެ.