މީހުން ހޯދުމުގެ ވަސީލަތްތައް ލިބެން ހުއްޓައި އެވަސީލަތްތައް ބޭނުން ނުކުރުމަކީ ގޯހެއް ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސެއިން ޢަމްރު ވިދާޅުވެއްޖެއެވެ.

ޢަމްރު މިހެން ވިދާޅުވީ އެކްސްގައި އޭނާ ކުރެއްވި ޕޯސްޓެއްގައެވެ.

ޢަމްރު މިހެން ވިދާޅުވެފައިވަނީ އައްޑޫ ސިޓީ އިން ގެއްލިގެން ހޯދަމުން ގެންދާ މުޙައްމަދު ނައީޝް ހޯދުމުގެ މަސައްކަތުގައި އިންޑިޔާ ސިފައިންގެ އެހީތެރިކަމާއި ނުލައި މަތިންދޯބޯޓު ބޭނުންކޮށްގެން ފެށުމަށް އެމްއެންޑީއެފް އިން ތައްޔާރުވާން ފެށި ޚަބަރު ހިއްސާ ކުރައްވަމުންނެވެ.

ޢަމްރު ވިދާޅުވީ ސަރުކާރުގެ އެންމެ ބޮޑު ޒިންމާ އަކީ ދިވެހިންގެ ފުރާނަ ހިމާޔަތްކުރުން ކަމަށެެވެ. އަދި ދިވެއްސަކު ކަނޑުމަތިން ގެއްލުމުން ރާއްޖޭގައި ހުރި ހުރިހާ ވަސީލަތެއް ބޭނުންކުރުން މަޖުބޫރު ކަމަށް ވެސް އޭނާ ވިދާޅުވެފައިވެއެވެ.

“މީހުން ހޯދުމުގެ މަސައްކަތަކީ ވަކި ވަސީލަތްކަކާއި އުކުޅު ބޭނުންކުރަންޖެހޭ ކަމެއް. އެ ލިބެން ހުއްޓާ ބޭނުން ނުކުރުމަކީ ގޯހެއް" ޢަމްރު ވިދާޅުވެފައިވެއެވެ.

ސ. ގަމުގެ ދެކުނު ފަރާތަށް އިހި ނަގަން ގޮސް އުޅެނިކޮށް މިދިޔަ ބުރާސްފަތި ދުވަހު ގެއްލުނު ސ މަރަދޫ، ކުރެދުމާގެ މުހައްމަދު ނައީޝް (18އ) ގެއްލުނު ކަމުގެ ރިޕޯޓު ކޮށްފައިވަނީ ބުރާސްފަތި ދުވަހުގެ ރޭ 22:45 ހާއިރުއެވެ.

ނައީޝް ހޯދުމުގެ މަސައްކަތުގެ އެންމެ ފަހުގެ މަޢުލޫމާތު ޚިއްސާކުރަމުން އެމްއެންޑީއެފް އިން ބުނެފައިވަނީ ނައީޝް ހޯދުމަށް އެމްއެންޑީއެފް ސަދަން އޭރިއާ ކޮމާންޑް، ކޯސްޓްގާޑް ފޯރތު ސްކޮޑްރަންއިން ކުރިއަށްގެންދާ އޮޕަރޭޝަންގައި ވައިގެމަގުން 23.46 ސްކޮޔަރ ނޯޓިކަލް މޭލު، ކަނޑުމަގުން 490 ސްކޮޔަރ ނޯޓިކަލް މޭލު އަދި ޑައިވްކޮށްގެން 1 ސްކޮޔަރ ނޯޓިކަލް މޭލުގެ ސަރަހައްދެއް ބަލާފައިވާ ކަމަށެވެ.

އެގޮތުން މި އޮޕަރޭޝަނުގައި ގަމުގެ ފުއްޓަރު ފަރާތް ބަލާ ހޯދުމަށް ހުކުރު ދުވަހު ހެނދުނު 10:25 އިން ފެށިގެން ދިވެހި ސިފައިންގެ ޑައިވަރުންގެ ޓީމެއް ވެސް ހަރަކާތްތެރިވަމުން އަންނަ ކަމުގައި އެމްއެންޑީއެފުން ބުނެއެވެ.

އެމްއެންޑީއެފްގެ އިތުރުން އެރަށުގެ ރައްޔިތުންވެސް ދަނީ ނަޢީޝް ހޯދުމުގެ މަސައްކަތް ކުރަމުންނެވެ.