ކުލަގަދަ ރަސްމިއްޔާތަކާއެކު ރ.އަތޮޅު ފުޓްސަލް މުބާރާތް 2023، މިއަދު ހަވީރު އިންނަމާދޫގައި ފަށައިފިއެވެ.

މުބާރާތް ފެށުމުގެ ގޮތުން މިއަދު ހަވީރު ކުޅުނު ފުރަތަަމަ މެޗުގައި ބައްދަލުކުރީ އިނގުރައިދޫ އާއި މަޑުއްވަރީއެވެ. އަދި މިރޭ ވެސް މުބާރަތުގެ ދެ މެޗް ކުޅުމަށް ހަމަޖެހިފައިވާއިރު ފުރަތަމަ މެޗްގައި ބައްދަލުކުރާނީ އިންނަމާދޫއާއި އަލިފުއްޓެވެ. އަދި ދެވަނަ މެޗުގައި ވާދަކުރާނީ އުނގޫފާރާއި ދުވާފަރެވެ. 

މި މުބާރަތަކީ ރ.އަތޮޅު ކައުންސިލްގެ ފަރާތުން އިންތިޒާމްކޮށްގެން މުޅި އަތޮޅަށް ހުޅުވާލައިގެން ބާއްވާ ދެވަނަ ފުޓްސަލް މުބާރާތެވެ. މިދިޔަ އަހަރު ބޭއްވި މުބާރާތުގައި ޖުމްލަ 10 ޓީމަކުން ބައިވެރިވިއިރު، މިއަހަރުގެ މުބާރާތުގައި ބައިވެރިވެފައިވަނީ 7 ޓީމަކުންނެވެ.

Advertisement

ޗެންޕިއަން ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމު ސެމީ ފައިނަލަށް ހޮވޭގޮތަށެވެ.

މިއަހަރުގެ މުބާރާތް އެންމެ ފުރަތަަމަ ބާއްވަން ނިންމީ އުނގޫފާރުގައެވެ. ނަމަވެސް މުބާރަތް ފެށެން ކުޑަ ދުވަސްކޮޅަކަށްވެފައި ވަނިކޮށް އުނގޫފާރުން މުބާރާތް ބޭއްވެން ނެތްކަމަށް އެންގުމުން، އިންނަމާދޫގައި މުބާރާތް ބޭއްވުމަށް ނިންމީ އެވެ. އިންނަމާދޫގައި މި މުބާރާތް ބާއްވަން ނިންމިއިރު މުބާރާތް ފެށުމަށް އޮތީ ގާތްގަނޑަކަށް ދެ ހަފްތާއެވެ. 

ނަމަވެސް މިއަދު ހަވީރު މުބާރާތުގެ ކުޅުން ފެށިއިރު، އިންނަމާދޫ އިން އޮތީ މި މުބާރާތަށް ވަރަށް ފުރިހަމައަށް ތައްޔާރުވެފައެވެ. ފާއިތުވެދިޔަ ދެ ހަފްތާ ތެރޭގައި އިންނަމާދޫގޭ ރައްޔިތުން ވަނީ ވަރަށް ޖޯޝާއި ފޯރީގައި މިމުބާރާތް ކާމިޔާބު މުބާރާތަކަށް ހެދުމަށްޓަކައި ގިނަ މަސައްކަތްތަކެއް ކޮށްފައެވެ. އޭގެ ތެރެއިން އިންނަމާދޫ ފުޓްސަލް ދަނޑުގެ ޗޭންޖިންރޫމް ފާހާނާއާ އެކު އިމާރާތްކޮށް ނިންމާލުންފަދަ ބައެއް މަސައްކަތްތައް ސުމަކުން ފަށައިގެން ކޮށްފައިވެއެވެ. މީގެއިތުރުން ދަނޑުގެ ޓާފް ބަދަލު ކުރުމާއި ރަށުތެރެއާއި ބަނދަރު ސަރަހައްދު ވަރަށް ބޮޑަށް ޒީނަތްތެރިކޮށްފައި ވެއެވެ.