ބިދޭސީން ރާއްޖެ އެތެރެވާއިރު ހަދަންޖެހޭ ވޯކްޕާމިޓް މެޑިކަލްގައި ރާއްޖެއިން މުޅިން އެއްކޮށް ނަަައްތާލެވިފައި ވަނިކޮށް މި ފަހުން ފެނުނު، ފައިލޭރިއާއަށް ޓެސްޓު ކުރުން ހިމެނުމާމެދު މަޝްވަރާކުރަމުންދާކަމަށް ހެލްތު މިނިސްޓްރީން ބުނެފިއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ހެލްތު މިނިސްޓްރީގެ ޑިރެކްޓަރ ޖެނެރަލް އޮފް ހެލްތު ސާވިސަސް ޑރ. އަހްމަދު އަޝްރަފް ވިދާޅުވީ، ފައިލޭރިއާ އަށް މިހާތަނަށް ފައްސިވެގެން ފެނިފައިވަނީ ބިދޭސީންގެ ވޭދަނަތަައް ކަމަށެވެ.
އެގޮތުން ދިވެހިންގެ ގައިގައި ބަލި ހުރިތޯ ބެލުމަށް މިހާތަނަށް 155 ޓެސްޓެއް ހެދިފައިވާ ކަމަށާއި، ނަމަވެސް އޭގެ ތެރެއިން އެއްވެސް ފައްސި ވޭދަނައެެއް ފެނިފައިނުވާކަމަށް އަޝްރަފް ވަނީ ވިދާޅުވެފައެވެ.
އެގޮތުން މިހާރުވެސް ވޯކްޕާމިޓް މެޑިކަލް ހަދާކަން ފާހަގަކުރައްވައި އަޝްރަފް އިތުރަށް ވިދާޅުވީ، ހެޕަޓައިޓިސް، އެޗްއައިވީ، އަދި ޓީބީ ފަދަ ބަލިތަކަށް މެޑިކަލް ހަދާކަމަށާއި ނަމަވެސް މިހާތަނަށް ފައިލޭރިއާއަށް ސްކްރީން ކުރުމަށް ވޯކްޕާމިޓުގައި ހިމަނާފައިނުވާނެކަމަށެވެ.
ހަމައެޔާއެކު ވޯކްޕާމިޓް މެޑިކަލްގައި ފައިލޭރިއާ ހިމެނުމުގެ މުހިއްމުކަމާމެދު މިހާރު މަޝްވަރާތައް ކުރިއަށްދާކަން ފާހަގަކުރައްވާ އަޝްރަފް ވިދާޅުވީ، ރާއްޖެއަށް ބިދޭސީން އެތެރެވާއިރު، އެ ނިޒާމުގެ ތެރެއިން ބަލިހުރި މީހުން ދެނެގަތުމުގެ ކަންކަން ކުރުމާ ގުޅޭގޮތުން މަޝްވަރާތައް ކުރިއަށްދާކަމަށެވެ.
މީގެ އިތުރުން އަޝްރަފް ވިދާޅުވީ، ރާއްޖެއަށް އިމްޕޯޓުވާ ކޭސްތައް ދެނެގަތުމަށްޓަކައި ވޯކް ޕާމިޓް މެޑިކަލްގައި ހިމަނަންވީ ކޮން އުސޫލުތަކެއްތޯއާއި، އެކަން ކުރިއަށްގެންދާނެ ގޮތުގެ މަސައްކަތް ވެސް އޮތީ މަޝްވަރާގެ މަރުހަލާގައި ކަމަށެވެ.
ރާއްޖެއިން ނައްތާލެވިފައިވާ މިފަދަ ބައްޔެއް ފެތުރުނަ ނުދިނުމަށްޓަކައި ކުރަންޖެހޭ ކަންތައްތައް މިހާރު ކުރަމުންދާކަން ފާހަގަކުރައްވައި އަޝްރަފް އިތުރަށް ވިދާޅުވީ، ޓެސްޓު ކުރުމުގެ ޤާބިލިއްޔަތުކަން އިތުރުކުރުމަށްޓަކައި އިތުރަށް ހޯދަންޖެހޭ ޓެސްޓް ކިޓުތައް ހޯދުމުގެ މަސައްކަތް ފަށާފައިވާކަމަށެވެ.
އަދި އެކަމުގައި ދައްޗެއް ނެތްކަން ވެސް އޭނާ ފާހަގަ ކުރެއްވިއެވެ.
ފައިލޭރިއާއަކީ 2016 ވަނަ އަހަރު ރާއްޖެއިން ނައްތާލެވިފައިވާ ކަމަށް ޑަބްލިއުއެޗްއޯއިން ކަނޑައަޅާފައިވާ ބައްޔެކެވެ.
Advertisement
This content is created and paid for by advertisers and does not involve Voice Journalists
