ބަންދާ ދިމާކޮށް ރާއްޖެއިން ބޭރަށްދާއިރު މިހާރު ފެތުރެމުންދާ ކޮވިޑްގެ އައު ވޭރިއަންޓް ޖޭއެން.1 އަށް ސަމާލުވާން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން ނެރެފައިވާ ނޫސްބަޔާނުގައި ބުނެފައިވަނީ މިފެށުނު ހަފްތާ އަކީ ދަރިވަރުންގެ ޗުއްޓީ ފެށޭ ހަފްތާކަމަށްވެފައި ގިނަ ޢަދަދެއްގެ ބަޔަކު ރާއްޖެއިން ބޭރަށާއި ރާއްޖޭގެ އެކި ސަރަހައްދުތަކަށް ދަތުރުކުރާނެ ދުވަސްތަކަށް ވާނެކަމަށެވެ.

މީގެއިތުރުން ކުރިއަށް އޮތް ދުވަސްވަރުގައި ރާއްޖެއިން ޢުމްރާގެ އަޅުކަމަށް ގިނަ ޢަދަދެއްގެ މީހުން އައިސް ގޮސްވާނެ ދުވަސްތަކަކަށް ވާތީ އެހެން އަހަރުތަކެކޭ އެއްފަދައިން އަރިދަފުސް ރޯގާ، ވައިރަލް ހުން އަދި ނޭވާލާ ނިޒާމަށްޖެހޭ ގައިންގަޔަށް އަރާ ބަލިތައް އިތުރުވާނެ ކަމަށެވެ.

އަދި މިހިނގާ ޑިސެމްބަރު މަހުގެ ތެރޭގައި ކޮވިޑް-19ގެ އައު ވޭރިއެންޓް ޖޭއެން.1 ދުނިޔޭގެ ގިނަ ޤައުމުތަކަކުން ފެނި ކޮވިޑް-19 ފެތުރުން އިތުރުވެފައިވާ ކަމަށް ވެސް އެޗްޕިއޭ އިން ބުނެއެވެ.

އެހެންކަމުން އެފަދަ ބަލިތަކުން ރައްކާތެރިވުމަށްޓަކައި ސަމާލުވާންވީ ކަންތައްތައް އެ އެޖެންސީ އިން ބުނެދީފައިވެއެވެ.

އެގޮތުން އަރިދަފުސް ރޯގާ ޖެހިއްޖެނަމަ ކެއްސާ، ކިނބިހި އަޅާއިރު އަނގަޔާއި ނޭފަތް ޓިޝޫ ފަދަ އެއްޗަކުން ނިވާކުރުމާއި، ޓިޝޫ ބޭނުން ކުރުމަށްފަހު ރައްކާތެރި ގޮތުގައި އެނައްތާލުން ހިމެނެއެވެ.

މިއާއެކު ޢާންމު ސާފުތާހިރު ކަމަށް ސަމާލުވުމާއި، ޚާއްސަކޮށް ސައިބޯނި ލައިގެން އަތްދޮވުން ފަދަ ކަންކަމަށް ސަމާލުކަން ދިނުމަށާއި، ރޯގާޖެހި ކެއްސާނަމަ، އަނގަޔާ ނޭފަތް ފޮރުވޭ ގޮތައް މާސްކު އެޅުމަށް ވެސް އެޗްޕީއޭ އިން އިރުޝާދު ދީފައިވެއެވެ.

ރޯގާޖެހި ކެއްސާނަމަ މީހުން އެއްވާ ތަންތަނަށް ނުދިޔުމަށާއި، އެފަދަ ތަންތަނަށް ކުޑަކުދިން ނުގެންދިޔުމަށް އެ އެޖެންސީ އިން އިރުޝާދު ދެއެވެ.

ބަލީގެ ޢަލާމާތެއް ހުރި ނަމަ ކުޑަކުދިންނަށް ޒިޔާރަތްކޮށް އެކުދިން އުރައި ނުހެދުމަށާއި، ބަލިވެގެން ޑޮކްޓަރަށް ދައްކަންދާއިރު ވެސް އެހީތެރިންގެ ގޮތުގައި ވީހާވެސް މަދު މީހުން ދިޔުމަށް އިލްތިމާސްކޮށްފައިވެއެވެ.

ޢުމުރުންދުވަސްވީ މީހުންނާައި، މާބަނޑު މީހުން އަދި ކުޑަކުދިން ކޮންމެހެން ހޮސްޕިޓަލަށް ގެންދަން ޖެހިއްޖެ ހާލަތެއްގައި ނޫނީ ނުގެންދިޔުމަށް ވަނީ އިލްތިމާސްކޮށްފައެވެ.

އަދި ރޯގާޖެހި ހުންއައިސް ރަނގަޅުނުވެ ގިނަ ދުވަސްނުވާނަމަ، ލަސްނުކޮށް ޑޮކްޓަރަށް ދެއްކުމާއި އެ ޙާލަތުގައި ވީހާވެސް ބޮޑަކަށް އެކަހެރިވުމަށް ވަނީ ބުނެފައެވެ.

އަދި ޢުމުރުން ދުވަސްވެ ގިނަ ބަލިތަކަށް ބޭސްކުރާ މީހުން ކޮވިޑް ވެކްސިން ޖެހުމާއި، ޢުމުރުން ދުވަސްވީ މީހުން، 5 އަހަރުން ދަށުގެ ކުޑަކުދިން، މާބަނޑު މީހުން އަދި ދިފާޢީ ނިޒާމް ބަލިކަށިވެފައިވާ މީހުން އިންފުލުއެންޒާ ވެކްސިން ޖެހުމަށް ވެސް އެ އެޖެންސީ އިން އިލްތިމާސްކޮށްފައިވެއެވެ.