މާލެ ސަރަހައްދުން ފައިލޭރިއާއަށް ފައްސިވީ މީހުންގެ އަދަދު7ށް އަރައިފިއެވެ. 

އެޗްޕީއޭން ހާމަކުރި އެންމެ ފަހުގެ އަދާހަމަތައް ދައްކާ ގޮތުން ޑިސެމްބަރ 22 އަދި 23 ދެދުވަހު ކުރެވުނު ތަހުލީލުތަކުން، މާލެ، ހުޅުމާލެ އަދި ގުޅިފަޅު ހިމެނޭހެން 7 މީހަކު ވަނީ މި ބައްޔަށް ފައްސި ވެފައެވެ. 

މިހުރިހާ ފައްސި ވޭދަނަތަަކެއް ވެސް ފެނިފައިވަނީ، ބިދޭސީން މަސައްކަތްކުރާ ސައިޓުތަކުން ނެގި ސާމްޕަލްތަކުންނެވެ.

Advertisement

ހުޅުމާލެއިން ފަސް މީހުން ފައްސިވެފައިވަނީ ޓެސްޓު ކުރި 25 މީހުން ތެރެއިންނެވެ. މާލެއިން އެކަކު ފައްސި ވީ، ޓެސްޓު ކުރި 15 މީހުންގެ ތެރެއިންނެވެ. ގުޅިފަޅުން ޓެސްޓު ކުރި 20 މީހުން ތެރެއިން ވެސް، އެކަކު ވަނީ ފައްސިވެފައެވެ.

އެއާއެކު، މިހާތަނަށް ޖުމްލަ ހަތް މީހުން މާލެ ސަރަހައްދުން ޕޮޒިޓިވް ވެފައިވެއެވެ.

ރާއްޖޭން އެއްކޮށް ނައްތާލާފައިވާ ބައްޔެއް ކަމުގައިވާ ފައިލޭރިއާ ޖެހިފައި ތިބި ބަޔަކު ފުރަތަމަ ފެނުނީ، ދުނިޔޭގެ އެއިޑްސް ދުވަސް ފާހަގަކުރުމުގެ ގޮތުން ކުރިއަށް ގެންދިޔަ ސްކްރީނިން ޕްރޮގްރާމެެއްގެ ތެރެއިން، ކުޅުދުއްފުށި ސިޓީންނެވެ. އެ ރަށުން ފައިލޭރިއާ ޖެހިފައިވާ 25 ބިދޭސީ މަސައްކަތްތެރިއަކު މިހާތަނަށް ދެނެގަނެވިފައިވެއެވެ.

ފައިލޭރިއާއަކީ މަދިރީގެ ޒަރިއްޔާއިން ފެތުރޭ، ގައިންގަޔަށް އަރާ ބައްޔެކެވެ.