ދިވެހިރާއްޖޭގެ ސިއްޙީ ނިޒާމުގައި ފައިލޭރިއާ ކޮންޓްރޯލު ކުރެވޭނެ ޤާބިލުކަން އެބަހުރި ކަމަށާއި، ފައިލޭރިއާގެ ކޭސްތަކެއް ރާއްޖެއިން ފެނުނުކަމުގައި ވީ ނަމަވެސް ރައްޔިތުން އެކަމާއި ކަންބޮޑުވެވަޑައި ނުގަތުމަށް ހެލްތު މިނިސްޓަރު ޑރ އަބްދުﷲ ޚަލީލު އިލްތިމާސް ކުރައްވައިފި އެވެ.
ޑރ ޚަލީލު މިފަދައިން ވިދާޅުވެފައި ވަނީ ކާބޯތަކެތީގެ ރައްކާތެރިކަމާ ގުޅޭގޮތުން އާންމުން ހޭލުންތެރިކުރުވުމަށް ހިންގާ ސޯޝަލް މީޑިއާ ކެމްޕެއިން "މުކައްބަ" އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ނެވެ.
އެ ރަސްމިއްޔާތުގައި ވާހަކަދައްކަވަމުން ޑރ ޚަލީލު ވިދާޅުވީ ފައިލޭރިއާގެ ކޭސްތަކެއް ރާއްޖެއިން ފެނުމާއި ގުޅިގެން ރައްޔިތުންގެ މެދުގައި ނުތަނަވަސްކަމެއް އުފެދިފައިވާއިރު، ރައްޔިތުންގެ ކަންބޮޑުވުންތަކަށް ހައްލު ހޯދޭނެ ގޮތްގޮތް ހޯދުމުގެ މަސައްކަތް ހެލްތު މިނިސްޓްރީން މަސައްކަތް ކުރަމުންދާ ކަމަށެވެ.
އެގޮތުން ރާއްޖެއިން ފެނިފައިވާ ފައިލޭރިއާ ބަލީގެ ކޯންޓްރޯލިން މެކޭނިޒަމް ރާއްޖޭގައި ގާއިމްކުރެވިފައިވާ ކަމަށާއި، ބަލިޖެހިފައިވާ މީހުންނަށް ދޭން ޖެހޭ ބޭހާއި ބައްޔަށް ޓެސްޓްކުރެވޭނެ އިންތިޒާމް ހުރިކަން ޑރ ޚަލީލުގެ ވާހަކަފުޅުގައި ފާހަގަކުރެއްވި އެވެ.
އޭގެ އިތުރުން އެ ބައްޔަށް ފަރުވާކުރުމަށް ބޭނުންވާ ބޭހާއި ޓެސްޓިން ކިޓް ހޯދުމަށްޓަކައި އިމަޖެންސީ ފަންޑުތަކާ ވާހަކަދައްކައިގެން އެ މަސައްކަތް ހެލްތު މިނިސްޓްރީން ކުރަމުން އަންނަކަން ވެސް އެމަނިކުފާނު ފާހަގަކުރެއްވި އެވެ.
"ފައިލޭރިއާ އެންމެ ބޮޑަށް ފެނިފައިވާ ސަރަހައްދުން ދިވެހިން ބައްޔަށް ޓެސްޓްކޮށްފައިވާނެ. 155 ދިވެހިން ޓެސްޓް ކުރިއިރު އެއްވެސް ދިވެއްސަކު ޕޮޒިޓިވް ނުވުމުން އެއީ ރާއްޖެއަށް އިމްޕޯޓްވެފައިވާ ބައްޔެއް. ބައްޔަށް ފަރުވާދެވޭނެ ގޮތް އެބައޮތް، އެހެންކަމުން ރައްޔިތުން މިކަމާ ކަންބޮޑުވެނުލައްވާ"
ހެލްތު މިނިސްޓަރު ޑރ ޚަލީލު
ޑރ ޚަލީލުގެ ވާހަކައިގައި ވަނީ ވަހި ޖެހުމުގެ ކުރިން ބަލިން ރައްކާތެރިވުމަށް އަޅަން ޖެހޭ ފިޔަވަޅުތަކުގެ މުހިންމުކަމަށް ވެސް އަލިއަޅުވާލައްވާފަ އެވެ.
އެގޮތުން "ޕްރިވެންޓް ހެލްތް"ނުވަތަ ބަލިން ރައްކާތެރިވުމަށް ދުރާލާ ފިޔަވަޅު އެޅުމަކީ ސިއްޙީ ދާއިރާއަށް އޮތް އެންމެ ބޮޑު އެއް ސިޔާސަތުކަން އެމަނިކުފާނު ފާހަގަކުރެއްވި އެވެ.
އެއާއެކު ވިދާޅުވީ ޕްރިވެންޓިވް ހެލްތް ކެއަރއަށް ސަމާލުކަން ދިނުމުގެ ގޮތުން މަޖިލީހުގައި އޮތް ކާބޯތަކެއްޗާ ބެހޭ ބިލު އަވަސްކޮށްދިނުމަށްޓަކައި ރައްޔިތުންގެ މަޖިލީހަށް ސިޓީއެއް ފޮނުވާފައިވާނެ ކަމަށާއި، އެ ބިލާ ގުޅޭގޮތުން މަޝްވަރާކޮށްފައިވާކަމާށާއި އެކްސްޕާޓުން ޚިޔާލުވެސް ހޯއްދަވާފައިވާނެ ކަމަށެވެ.
ފައިލޭރިއާއަކީ މަދިރީގެ ޒަރިއްޔާއިން ޖެހޭ ބަައްޔެއް ކަމަށްވާއިރު، އެ ބަލިން ރައްކާތެރިވުމަށް މަދިރި އުފެދި އާލާވާ ތަންތަން ނައްތާލުމާއި، މަދިރި ހެފުމުން ސަލާމަތްވުމަށް އަޅަން ޖެހޭ ފިޔަވަޅުތައް އެޅުމަށް ހެލްތު މިނިސްޓްރީން ދަނީ ނަސޭހަތްތެރި ވަމުން ނެވެ.
Advertisement
This content is created and paid for by advertisers and does not involve Voice Journalists
