ހަނިމާދޫ އިންޓަރނޭޝަނަލް އެއަރޕޯޓުގައި އަލަށް ތަރައްޤީކުރާ 2،460 މީޓަރުގެ ރަންވޭގެ ތެރެއިން 1،200 މީޓަރުގެ ރަންވޭގެ މަސައްކަތް ނިންމައި ހުޅުވުމާއި ގާތަށް ގޮސްފައިވާ ކަމަށް، ރީޖަނަލް އެއަރޕޯޓްސް ކޮމްޕަނީ ލިމިޓެޑް، އާރްއޭސީއެލް އިން ބުނެފިއެވެ.

އެއާޕޯޓް ގެ މަސައްކަތުގެ އަދާހަމަ ހާމަކޮށް، އާރްއޭސީއެލް އިން ނެރުނު ނޫސް ބަޔާނެއްގައި ބުނެފައިވާ ގޮތުގައި، އެ އެއާޕޯޓްގެ 1،200 މީޓަރުގެ މަސައްކަތް ކުރިއަށް އޮތް މަހެއްހާ ދުވަސް ތެރޭގައި ނިމޭނެއެވެ. އަދި ނިމުމާއެކު، ނަގަންޖެހޭ ހުއްދަތައް ނެގުމަށްފަހު، ރަންވޭ ބޭނުންކުރަން ހުޅުވާލެވޭނެކަންވެސް ފާހަގަކޮށްފައިވެއެވެ.

މިއާއެކު އާރްއޭސީއެލް އިން ބުނީ، 1،200 މީޓަރުގެ ރަންވޭ ހުޅުވިގެންދާއިރު، ނައިޓް ލޭންޑިންގ ފެސިލިޓީސްވެސް ޤާއިމްކުރެވިގެންދާނެ ކަމަށާ އޭގެ ސަބަބުން، ރޭގަނޑުގެ ދަތުރުތަކަށްވެސް ޙިދުމަތްދެވޭނެ ކަމަށެވެ.

އާރް.އޭ.ސީ.އެލް އިން އިތުރަށް ބުނީ، މުޅި ރަންވޭ (2،460 މީޓަރު)ގެ މަސައްކަތް 2024 ވަނަ އަހަރުގެ ދެވަނަ ކުއަރޓަރުގެ ތެރޭގައި ނިމި 24 ގަޑިއިރު ބޭނުންކުރުމަށް ހުޅުވާލެވޭނެ ކަމަށެވެ.

އާރްއޭސީއެލް ބުނެފައިވާ ގޮތުގައި، ހަނިމާދޫ އިންޓަރނޭޝަނަލް އެއަރޕޯޓުގެ ބިޔަ މަޝްރޫޢު ކުރިއަށް ގެންދާނީ އެއަރޕޯޓް ބަންދުނުކޮށެވެ. އެގޮތުން، ރަންވޭގެ މަސައްކަތްތައް ކުރިއަށް ގެންދާނީ 03 ސެގްމަންޓަކަށް ބަހާލެވެގިން، ރަންވޭއެއްކޮށް ބަންދުނުކޮށްވާނެ ގޮތެއްގެ މަތިން ކަމަށް ބުނެފައިވެއެވެ. 

މި މަސްރޫޢަކީ 2023 ވަނަ އަހަރުގެ ޖަނަވަރީ މަހުގެ ތެރޭގައި ފެށިގެން ދިޔަ ބިޔަ މަސްރޫޢެކެވެ. 

ތަރައްޤީކުރެވޭ ހަނިމާދޫ އިންޓަރނޭޝަނަލް އެއަރޕޯޓަކީ، އިންޑިއާގެ އެގްޒިމް ބޭންކުގެ ލޯނު އެހީގައި ކުރިޔަށް ގެންދެވޭ މަޝްރޫޢެކެވެ. މިމަޝްރޫޢުގެ ދަށުން 2،460 މީޓަރުގެ އައު ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޖާގައިގެ ޓަރމިނަލެއް ޤާއިމްކުރެވިގެން ދާނެއެވެ. އަދި ބައިނަލްއަޤްވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައްވެސް މިމަސްރޫޢުގެ ތެރެއިން ޤާއިމުކުރެވިގެންދާނެއެވެ.

މިމަޝްރޫޢު ނިމުމުން ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސް A320 އާއި ބޮއިންގ 737 މަރުކާގެ ބޯޓު ފަހަރަށް ހަނިމާދޫ އިންޓަރނޭޝަނަލް އެއަރޕޯޓުން ޚިދުމަތް ދެވޭނެއެވެ. 

އަދި ތަރައްޤީއާއެކު، އުތުރުގެ ރަށްތަކުގައި ފަތުރުވެރިކަން މިހާރަށްވުރެ ބޮޑަށް ފުޅާވެގެންދާނެ ކަމަށް އާރްއޭސީއެލް އިން ޔަގީން ކުރާއިރު، އެއަރޕޯޓު ނިމުމާއެކު ސީދާގޮތުންނާއި ނުސީދާގޮތުން، ބޮޑުތިލަދުންމަތީގެ އިގްތިޞާދަށް އިތުރު ދިރުން ލިބިގެންދާނެ ކަމަށްވެސް ކުންފުނިން ބުނެއެވެ. އެގޮތުން، އެތައްހާސް ވަޒީފާގެ ފުރުސަތުތައް އުފެދި، ގެސްޓް ހައުސްތަކާއި، ސިޓީ ހޮޓާތަކާއި، ރިސޯޓުތަކުގެ އެނދުތައް، އެތައް ގުނައެއް އިތުރުވެގެންދާނެ ކަމަށް އާރްއޭސީއެލް އިން ލަފާކުރެއެވެ.