ރާއްޖެއަށް މިހާރު ކުރަމުންދާ ވިއްސާރައިގައި ޏ ފުވައްމުލަކަށް ބޯކޮށް ވާރޭ ވެހި ފެންބޮޑުވުމުގެ ސަބަބުން ބައެއް ގެތަކަށް ފެން ވަދެ އެކި ވަރުގެ ގެއްލުންތައް ލިބިއްޖެއެވެ.
"ވޮއިސް" އަށް މައުލޫމާތު ދެއްވަމުން ފުވައްމުލަކު ސިޓީ ކައުންސިލުން ވިދާޅުވީ މިއަދު ހެނދުނު 8:00 ހާއިރު އެރަށަށް ވެހެންފެށި ވާރޭ މެދު ނުކެނޑި 12:00އި ހަމައަށް ވެހި އެ ރަށުގެ އެކި ސަރަހައްދުތަކުގައި ވަރަށް ބޮޑަށް ފެންބޮޑުވެފައިވާކަމަށެވެ.
އެގޮތުން މިއަަދަކީ މި ފަހުން އެންމެ ބޯކޮށް އެރަށަށް ވާރޭ ވެހުނު ދުވަސްކަން ފާހަގަކުރައްވައި ކައުންސިލުން ވިދާޅުވީ ވިއްސާރައިގައި 21 ގެޔަކަށް ފެންވަދެގެން ރިޕޯޓް ކޮށްފައިވާކަމަށެވެ. އަދި ފެން ވަތް ގެތަކުން ފެން ހިންދުމާއި އިތުރަށް ފެން ނުވާންނާނެހެން ވެލި ބަސްތާ ޖެހުމުގެ މަސައްކަތް މިހާރު ކުރެވެމުންދާކަމުގައިވެސް އެ ފަރާތުން މައުލޫމާތު ދެއްވައެވެ.
ފެން ވަތް ގެތަކުގެ ތެރެއިން 5 ގެޔަކަށް ވަނީ އެކި ވަރުގެ ގެއްލުންތައް ވެފަ، ބައެއް ގޭގޭގައި އެބަހުރި ހުރިހާ ފަރުނީޗަރުތަކެއްހެން ފެނުތެރޭގައި
ފުވައްމުލަކު ކައުންސިލްގެ އެސްޖީ
މީގެ އިތުރުން އެރަށުގެ އެންމެ އަޑި ސަރަހައްދުތަކުގައި އެމްޓީސީސީ ސުޕަރ ވޯޓަރ ޕަމްޕްތައް ބެހެއްޓިފައިވާކަމަށާއި އޭގެ ތެރެއިން 10 ޕަންޕަކައި ފެންހިންދުމަށް ކައުންސިލްގައި ބޭނުންކުރާ 4 ޕަންޕެއް ބޭނުންކޮށްގެން ފެންހިންދުމުގެ މަސައްކަތް ކުރިއަށް ގެންދާކަމުގައި އެ ފަރާތުން މައުލޫމާތު ދެއްވައެވެ.
މީގެ އިތުރުން މިހާރު ކުރަމުންދާ ވިއްސާރައިގައި ފުވައްމުލަކުގެ ބައެއް އަވަށްތަކުގައި ފެންބޮޑުވެ ބައެއް ގޭގެއަށް ގެއްލުން ލިބެމުންދާކަމުގެ ރިޕޯޓު ލިބިފައިވާކަމަށާއި އެ ގެތަކުގެ ހާލަތު ވަޒަންކުރުމުގެ މަސައްްކަތް ސިޓީ ކައުންސިލުން ކުރިއަށް ގެންދާ ކަމުގައި ނެޝަނަލް ޑިޒާސްޓަރ މެނޭޖްމަންޓް ސެންޓަރުން ވަނީ ހާމަކޮށްފައެވެ.
އަދި ފެން ހިއްކުމުގެ މަސައްކަތް ސިފައިންގެ އެހީތެރިކަމާއިއެކު ކުރިއަށް ދާކަމުގައި އެ ސެންޓަރުން ބުނެއެވެ.
Advertisement
This content is created and paid for by advertisers and does not involve Voice Journalists
