މޯލްޑިވިއަން ޑިމޮކްރަޓިކް ޕާރޓީ އެމްޑީޕީން އިސްވެ އޮވެ، އުވާލައިފައިވާ ޤާނޫނެއްކަމަށްވާ ރައްޔިތުންގެ މަޖިލީހުގެ މެންބަރުން އިންތިހާބުވާ ޕާޓީ ބަދަލުކުރުން ހުއްޓުވުމާއި ބެހޭ ޤާނޫނު "އެންޓި ޑިފެކްޝަން ގާނޫނު" އަލުން އަބުރާ ވުޖޫދަށް ގެނައުމުގެ މަސައްކަތް ކުރަމުންދާ ކަމަށް އެ ޕާރޓީން ބުނެފިއެވެ.
އެމްޑީޕީން މިކަން ހާމަކޮށްފައި ވަނީ އެޕާރޓީގެ ޕާލިމެންޓްރީ ގްރޫޕުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި ރައްޔިތުން މަޖިލިސްގެ ހުޅުމާލެ ދާއިރާގެ އިއްޒަތްތެރި މެމްބަރު އަލްފާޟިލް އަލީ ނިޔާޒެވެ.
އެމްޑީޕީގެ ފަރާތުން މިފަދަ މަސައްކަތްތަކެއް ފަށާނެކަން ހާމަކޮށްފައި މިވަނީ ދާދި ފަހުން އެމްޑީޕީއަށް ނިސްބަތްވެ ވަޑައިގެންނެވި 13 މެމްބަރަކު އެޕާރޓީ ދޫކުރައްވާ ވެރިކަންކުރާ ޕީއެންސީ އާއި ގުޅިވަޑައިގެންފައިވާ ދަޑިވަޅެއްގައެވެ.
މިއަދުގެ ބައްދަލުވުމުގައި މިކަމާއި ގުޅޭގޮތުން އަލީ ނިޔާޒު ވިދާޅުވީ އެމްޑީޕީން "އެންޓި ޑިފެކްޝަން ގާނޫނު" އެއްގެ މަސައްކަތް ފެށުމާއި މި މެމްބަރުން ވަކިވުމާއި އެއްވެސް ގުޅުމެއް ނެތް ކަމަށެވެ.
"މި 13 މެންބަރުން ދިޔައީމަ ނުވަތަ ޕާޓީން އެއްބަޔަކު އަނެއް ބަޔަކަށް ދާތީ ވިސްނާ ވިސްނުމެއް ނޫން. މުސްތަޤުބަލުގައި މަޖިލިސް އިސްލާހު ކުރުމަށްކުރާ މަސައްކަތެއްގެ ގޮތުގައި އަޅުގަނޑުމެންނާ ރައްޓެހި ޕާޓީތަކާއި ގުޅިގެން އެ މަޝްވަރާތައް ކުރަމުން އެބަ ގެންދަން،"
މިއަދުގެ މި ބައްދަލުވުމުގައި ނިޔާޒު ވިދާޅުވި އެވެ.
މި ބައްދަލުވުމުގައި ވާހަކަފުޅު ދައްކަވަމުން މެމްބަރ އަލީ ނިޔާޒު ވިދާޅުވީ ވެރިކަންތައް ބަދަލުވުމާއިއެކު ރައްޔިތުން ހޮވާ އިންތިހާބު ކޮށްފައިވާ ރައްޔިތުންގެ މަޖިލީހުންވެސް އެކަންތައްތައް ފެނިގެން ދާކަމަށާއި، ޕާޓީތަކުން ރައްޔިތުންގެ މަޖިލިހަށް ހޮވޭ އަދަދަށް މެމްބަރުން ނުހިފެހެއްޓޭކަމަށެވެ.
Advertisement
This content is created and paid for by advertisers and does not involve Voice Journalists
