ރ. އަތޮޅު ކައުންސިލް ފުޓްސަލް ޗެލެންޖު 2023 ގެ ފައިނަލުގައި މިއަދު ހަވީރު އެންމެ ފަހުގެ ޗެމްޕިއަން ދުވާފަރާއި ރަނަރަޕް އިނގުރައިދޫ ވާދަކުރި މެޗު ފަސޭހަކަމާއި އެކު 6-0 ގެ ނަތީޖާއަކުން މޮޅުވެ، ދުވާފަރުން ތަށި ދިފާއުކޮށްފިއެވެ.

ދުވާފަރު މުބާރަތުގެ ފައިނަލުން ޖާގަ ހޯދީ ސެމީފައިނަލުގެ ދެވަނަ މެޗުގައި 2-0 ގެ ނަތީޖާއަކުން އަލިފުށީ ރެކްރިއޭޝަން ކުލަބު ބަލިކުރުމަށްފަހު އެވެ. އަދި އިނގުރައިދޫ އިން ފައިނަލުގެ ޖާގައެއް ހޯދީ ސެމީ ފައިނަލުގެ ފުރަތަަމަ ޖާގަ 12-6 ގެ ތަފާތުބޮޑު ނަތީޖާއަކުން ރަސްމާދޫ ބަލިކުރުމަށްފަހު އެވެ.

ރ. އިންނަމާފޫ ފުޓްސަލް ދަނޑުގައި ދެޓީމުގެ ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅެވުނު މިމެޗުގެ ފުރަތަމަ ހާފުގައި ދުވާފަރު ޓީމުގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު، މިހާފުގައި އެޓީމުން ވަނީ ހަތަރު ލަނޑުގެ ލީޑެއް ނަގާފައެވެ. އެގޮތުން މިހާފުގައި އެޓީމުގެ މޫސާ ލަތީފް ދެލަނޑު ކާމިޔާބު ކުރި އިރު، އެޓީމުގެ މުސްލިމް މުހައްމަދު އަދި އަހުމަދު އީސާ މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ.

މުބާރާތުގައި މޮޅު ކުޅުމެއް ދެއްކި އިނގުރައިދޫ ޓިމިގެ ފަރާތުން ފުރަތަަމަ ހާފުގައި ވަރަށް އާދައިގެ ކުޅުމެއް ފެނިގެންދިޔަ އިރު، ފުރަތަަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން ދުވާފަރު ކުރީގައި އޮވެގެންނެވެ.

މެޗުގެ ދެވަަނަ ހާފުގައި ދުވާފަރުން އިތުރު ދެލަނޑު ކާމިޔާބު ކުރި އިރު، މިމެޗުގައި އެޓީމުން ކާމިޔާބުކުރި ފަސްވަނަ ލަނޑު ދެވަނަ ހާފުގެ ކުރީކޮޅު ކާމިޔާބުކޮށްދިނީ މުސްލިމް މުހައްމަދު އެވެ. އަދި އެޓީމުގެ 6 ވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ މޫސާ މުޒާހް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 6-0 ގެ ނަތީޖާއަކުން ދުވާފަރު ކުރީގައި އޮވެގެންނެވެ.

ފައިނަލް މެޗުގެ މޭން އޮފް ދަ މެޗަކަށް ހޮވުނީ ދުވާފަރު ޓީމުގެ އަހުމަދު އީސާ އެވެ. 

މުބާރާތުގެ އެންމެ މޮޅު ފަސް ކުޅުންތެރިންނަކީ އަހުމަދު އައިހަމް (އިނގުރައިދޫ), މުހައްމަދު މަމްދޫހް (އިނގުރައިދޫ), މުހައްމަދު އިސާމް (ދުވާފަރު), މުސްލިމް މުހައްމަދު (ދުވާފަރު) އަދި އަބްދުއް ސަދާދު އާދަމް (އަލިފުށީ ރެކްރިއޭޝަން ކުލަބް) އެވެ. 

މުބާރާތުގެ އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ އިނގުރައިދޫ ޓީމުގެ ކެޕްޓަން އަހުމަދު އައިހަމް އެވެ. އަދި މުބާރާތުގެ ފެއާޕްލޭ ކުޅުންތެރިއަކަށް ހޮވިފައި ވަނީ އިނގުރައިދޫ ޓީމުގެ އަލީ ޝާފިޢު އެވެ. އަދި މުބާރާތުގެ އެންމެ އުންމީދީ އެއްކުޅުންތެރިއަކީ އަލިފުށީ ރެކްރިއޭޝަން ކުލަބުގެ އަހުމަދު ޒަލަފް އެވެ. އަދި މުބާރާތުގެ ފެއާޕްލޭ ޓީމަކަށް ހޮވުނީ އަލިފުށީ ރެކްރިއޭޝަން ކުލަބެވެ.

މުބާރާތުގެ އެންމެ މޮޅު ކޯޗުގެ މަގާމު ލިބުނީ ދުވާފަރު ޓީމުގެ ކޯޗު ޔާނިއު އަލީ އަށެވެ. އަދި މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އިނގުރައިދޫ ޓީމުގެ ކެޕްޓަން އަހުމަދު އައިހަމް އެވެ.