މާލެސިޓީގެ އަވަށްތަށް ތަމްސީލް ކުރައްވަން، އަވަށް ކުރިއަރުވާ ބޯޑު އަލުން އެކުލަވާލައްވާނެ ކަމަށް މާލޭ މޭޔަރ ކަމަށް ވެރިކަންކުރާ ޕީއެންސީގެ ފަރާތުން ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.
ރޭ ސަންގު ޓީވީގައި ކުރިއަށް ގެންދިޔަ މޭޔަރ ކަމުގެ ބަހުސްގައި ވާހަކަދައްކަވަމުން، ޢާޒިމާ ވިދާޅުވީ، ރާއްޖޭގެ ކައުންސިލްތައް ހިންގަމުންދަނީ ގާނޫނު އަސާސީއާއި ޚިލާފަށް ކަމަށެވެ.
އެގޮތުން، ކައުންސިލްތައް ހިންގަވަމުންދަނީ ރައްޔިތުން ބޭނުންވާ ގޮތަށް، ރައްޔިތުންގެ ޚިޔާލު ނުހޯދާ ކަން ފާހަގަކުރައްވައި އޭގެ މިސާލެއްގެ ގޮތުން ޢާޒިމާ ވަނީ މާލެސިޓީ ގެ ވިލިމާލޭގެ މަގުތައް ހެދުމާއި ގަސްތައް ކެނޑުމުގެ މަސައްކަތް ކުރިއަށް ގެންދަނީ އެ އެއަވަށު ރައްޔިތުން ބޭނުންވާ ގޮތާއި ގުޅޭގޮތުން ޚިޔާލު ނުހޯދާ ކަމަށް ވިދާޅުވެފައެވެ.
އެހެންކަމުން، އެފަދަ މައްސަލަތައް ހައްލު ކޮށް, އަވަށް ތަކުގެ ރައްޔިތުންގެ ޚިޔާލު ހޯއްދެވުމަށް އަވަށު ބޯޑެއް އެކުލަވާލައްވާނެ ކަމަށް ޢާޒިމާ ވިދާޅުވިއެވެ.
ޑިމޮކްރަސީއަކީ ޓޮޕް ޓު ބޮޓޮމް އެޕްރޯޗް އެއްނޫން. އެއީ ބޮޓޮމް ޓު ޓޮޕް އެޕްރޯޗް އެއް. އެހެންވީމާ އަޅުގަނޑުގެ މޭޔަރ ކަމުގައި އަޅުގަނޑު އިންޓްރޮޑިޔުސް ކުރާނަން އަލުން އަނބުރާ އަވަށު ބޯޑު ނުވަތަ އަވަށް ކުރިއަރުވާ ކޮމިޓީގެ ކޮންސެޕްޓް. އެ ކޮންސެޕްޓް އަންނަން އެބަޖެހޭ. އަޅުގަނޑަކީ މާފަންނު އަވަށް ކުރިއަރުވާ ކޮމިޓީގައި، މާފަންނުގެ އަވަށު ވެރިޔާގެ އެހީތެރިޔާގެ ގޮތުގައި 6 އަހަރު މަސައްކަތް ކުރި މީހެއް. މާލެއަށް ސުނާމީ އެރި އިރުގައި މާފަންނު އޮފީސް ހިންގަން ހުންނާނީ އަޅުގަނޑު، އަބްދުالله ޖަމީލުގެ ދަށުން. މިސާލަކަށް ވިލިނގިލީ ރައްޔިތުން ބޭނުންވާ ގޮތް ހޯދަން ބޭނުންވަންޏާ ރެޕްރެޒެންޓެޓިވް ބޯޑެއް އަންނަން އެބަޖެހޭ. މިސާލަކަށް ސްކޫލް ޕްރިންސިޕަލް ނޫނީ ޕީޓީއޭގެ ރައީސް އާ. މިގޮތަށް އަންނަ ރެޕްރެޒެންޓެޓިވް ބޯޑަކުން އެ އަވަށް ކުރިއަރުވާނެ ގޮތުގެ ވިޝަން އެއް ސިޓީ ކައުންސިލަށް އަންނަން އެބަޖެހޭ.
ޢާއިޝަތު ޢާޒިމާ ޝަކޫރު
މީގެ އިތުރުން ޢާޒިމާ ވިދާޅުވީ، އަވަށު ބޯޑުގެ އިތުރުން، މާލޭގެ އަވަށް ތަކުގައި ތިބި ހަރު ބޭފުޅުންގެ ޚިޔާލާއި މަޝްވަރާ ހޯއްދެވުމަށް އެފަދަ ބޭފުޅުން ހިމެނޭ ބޯޑެއްވެސް އެކުލަވާލައްވާނެ ކަމަށެވެ. އޭގައި، މާލެއަށް ޚިދުމަތްކުރެއްވި އިސްރަށްވެހިން ހިމަނުއްވައި، އެފަރާތްތަކުގެ ޚިޔާލު ސިޓީ ކައުންސިލަށް ސީދާގޮތަށް ހުށަހެޅޭނެ ފޯރަމް ތަކެއް ބާއްވާމެ ކަމަށް އޭނާ ވިދާޅުވި އެވެ.
ހަމަ މިއާއެކު، ޒުވާނުން މާލެ ސިޓީއާއި މެދު ދެކޭގޮތާއި، އެފަރާތްތަކުގެ ތަސައްވުރު ހުރިގޮތް ބެލުމަށްވެސް ވަރަށް އަވަހަށް މަސައްކަތް ފަށްޓަވައި، އެމީހުންގެވެސް ޚިޔާލާއި މަޝްވަރާ ހޯއްދަވާނެ ކަން ޢާޒިމާ ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
