ދިވެހިރާއްޖޭގެ ހުރިހާ ސަރަހައްދަކަށް މިހާރުކުރަމުންދާ ވިއްސާރައިގައި ކ.ގުރައިދޫގައި ފެންބޮޑުވެ އެރަށުގެ 3 ގެއަކުން މީހުން ބަދަލުކުރަން ޖެހިފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، ބުނެފިއެވެ.

އެންޑީއެމްއޭއިން ބުނެފައިވާ ގޮތުގައި މިހާރު ކުރަމުންދާ ވިއްސާރައިގައި ރާއްޖޭގެ ފަސްރަށަކަށް ގެއްލުން ލިބިގެން ރިޕޯރޓްކޮށްފައިވާ ވެއެވެ. މިގޮތުން ރިޕޯރޓްކޮށްފައިވަނީ ކ.ގުރައިދޫ، ލ.ގަން، ސ.މަރަދޫ، ލ.ފޮނަދޫގެ އަދި ފ. ނިލަންދޫ އިންނެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އިން މަޢުލޫމާތު ދެއްވާފައިވާ ގޮތުގައި ރިޕޯރޓްކޮށްފައިވާ މި 5 ރަށުގެ ތެރެއިން ކ. ގުރައިދޫގެ 20 ގެއެއްގައި ފެންބޮޑުވެ 3 ގެއަކުން މީހުން ބަދަލުކުރަން ޖެހުނު ކަމަށެވެ.

ރާއްޖޭގއަށް މިހާރު ކުރަމުންދާ ވިއްސާރަ އާއި ގުޅޭގޮތުން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އިތުރަށް ބުނެފައިވަނީ ވިއްސާރައިގައި ފެން ބޮޑުވުމުގެ ހާދިސާތަކަށް އިޖާބަ ދިނުމުގެ މަސައްކަތް ސިފައިންނާއި، ފުލުހުންނާއި ކައުންސިލްތައް ގުޅިގެން ގެއްލުން ލިބުނު ރަށްތަކުގައި ކުރަމުން އަންނަ ކަމަށެވެ.

ހަމަ މިއާއިއެކު މި ވިއްސާރައިގައި މާލެއަށް ގިނަ އަދަދަކަށް ވާރެ ވެހިފައި، ވުމާއިއެކު މާލޭގެ ބައެއް ގޭގައި ފެންބޮޑުވެފައިވާތީ ވެލި ބަސްތާޖެހުމުގެ މަސައްކަތް ސިޓީ ކައުންސިލްގެ އެހީތެރިކަމާއިއެކު ކޮށްފައިވާ ކަމަށްވެސް އެއޮތޯރިޓީން ވިދާޅުވެއެވެ.

މީގެ ކުރިންވެސް މި ވިއްސާރަ އާއި ގުޅިގެން ރާއްޖޭގެ އެންމެ ދެކުނުން އައްޑޫ އާއި ފޯއްމުލަކުގެ ބައެއްގެތަކަށް ފެން ވަނުމުގެ ސަބަބުން އެފަރާތްތަކަށް އެހީތެރިކަން ފޯރުކޮށްދެވިފައި ވާނޭކަމަށް އެންޑީއެމްއޭއިން މަޢުލޫމާތު ދެއްވައެވެ.

މިދުވަސަވަރަކީ ބޯކޮށް ވާރޭ ވެހުމާއެކު ގުގުރައި އަދި ވައިގަދަވެ ކަނޑުތައް ގަދަވާނެކަމަށް ލަފާކޮށް މެޓް އޮފީހުން ރާއްޖޭގެ ރައްޔިތުން މިކަންތައްތަކަށް ސަމާލުކަން ދިނުމަށް އިލްތިމާސްކޮށްފައިވާ ދުވަސްކޮޅެއްވެސް މެއެވެ.  އެހެންކަމުން ވިއްސާރައިގެ ސަބަބުން ލިބިދާނެ ގެއްލުން ކުޑަކުރުމަށް ދުރާލާ ފިޔަވަޅުއެޅުމަށް ޑިޒާސްޓަރ މެނޭޖްމެންޓް އޮތޯރިޓީ އޮފް މޯލްޑިވްސް، އެންޑީއެމްއޭއިން ވެސް ވަނީ އިލްތިމާސްކުރައްވާފައެވެ.

ހާއްޞަކޮށް ކަނޑު ދަތުރުކުރާ ފަރާތްތަކުން މޫސުމަށް ހާއްޞަ ސަމާލުކަމެއް ދިނުމަށް ކަމާއިބެހޭ ފަރާތްތަތަކުން އިލްތިމާސް ކުރައްވައެވެ.