އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީން، ވެރިކަން ކުރާ ޕީއެންސީއާ، ގުޅިވަޑައިގެންނެވި، ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުހައްމަދު ނިހާދު، އެ ނިންމުން ނިންމެވީ ރައްޔިތުންނަށް ޚިދުމަތް ކުރެއްވުމަށް ކަމަށް އޭނާ ވިދާޅުވެއްޖެެއެވެ.
މީލާދީ އާއަހަރުގެ ތަހުނިޔާ އައްޑޫ ސިޓީ އަދި ޚާއްސަކޮށް ފޭދޫ ރައްޔިތުން އަރިސް ކުރައްވައި ނިހާދު މިއަދު އެކްސްގައި ކުރެއްވި ޕޯސްޓެއްގައި އޭނާ ވަނީ އެއީ ރައްޔިތުންގެ މީހެއް ކަމަށް ވިދާޅުވެފައެވެ.
އަދި ގިނަ ރައްޔިތުން އެދެނީ، ރައްޔިތުންނަށް ޚިދުމަތް ކުރުމުގައި އޭނާ ދެމިހުންނެވުމަށް ކަމަށާ، އެކަމަށްޓަކައި ޕީއެންސީއާ ގުޅިގެންނެވި ކަމަށް ނިހާދުގެ ޕޯސްޓުގައި ވިދާޅުވެފައި ވެއެވެ.
ދާދިފަހުން ޕީއެންސީއާއި ގުޅިވަޑައިގެންނެވި 13 މެންބަރުންގެ ތެރޭގައި ނިހާދުވެސް ހިމެނިވަޑައިގަންނަވާއިރު، އެ ޖަލްސާގައި އޭނާ ރަށުގައި ނެތުމުން ބައިވެރިވެވަޑައި ނުގަންނަވައެވެ.
ނިހާދާއިއެކު ޕީއެންސީއާ ގުޅިވަޑައިގެންނެވި ގިނަ މެންބަރުންނަކީ ރައީސް ޑރ މުހައްމަދު މުޢިއްޒުގެ ސަރުކާރުގެ ސިޔާސަތުތަކަށް މީގެ ކުރިން ވަރަށް ބޮޑަށް ފާޑުވިދާޅުވެވަޑައިގެންފައިވާ މެންބަރުންނެވެ.
ނަމަވެސް، ފަހުން ސަރުކާރުގެ ޕާޓީއާ ގުޅިވަޑައިގެންނެވުމަށްފަހު، އެ މެންބަރުންގެ ފަރާތުން ވާހަކަވަމުން މަރަދޫ ދާއިރާގެ މެންބަރުން އިބްރާޙީމް ޝަރީފް، މަވޯޓާ ވެސް ވިދާޅުވީ ޕާޓީ ބަދަލު ކުރެއްވީ ގައުމީ ވިސްނުމެއްގައި ގައުމަށް ޚިދުމަތް ކުރައްވަން ކަމަށެވެ.
Advertisement
This content is created and paid for by advertisers and does not involve Voice Journalists
