ރާއްޖޭގެ މިސްކިތްތަކުގައި އިމާމުވެ ނަމާދުކޮށް ހުކުރު ޚުޠުބާ ކިޔުމަށް ގްރޭޑް 10 11 އަދި 12 ގައި ކިޔަވަމުންގެންދާ  ޒުވާން ކުދިންނަށް އިސްލާމިކް މިނިސްޓްރީން ހުޅުވާލި ފުރުޞަތުގައި މިހާތަނަށް 100 ދަރިވަރަކު ކުރިމަތި ލައިފިވާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައިވަނީ މިކަންތަކާއި ގުޅޭގޮތުން މިއަދު އެކްސް މެދުވެރި ކުރައްވާ ކުރެއްވި ޕޯސްޓެއްގައެވެ. .

" ‏ޚުޠުބާ ކިއުމުގެ ހުއްދަ ނަގަން 100 ޒުވާނުން ކުރިމަތިލައިފައިވޭ. އެބޭފުޅުން އިންޓަރވިއު އަންނަ ހަފްތާގައި ފަށާނެ. އެއަށް ފަހު ފިޤުހީ ތަމްރީނު ތަކެއް ދެވޭނެ. އެއަށް ފަހު އިންޝާ الله މި ޒުވާނުން މިންބަރުތަކުން ފެނިގެންދާނެ. ރޯދަ މަހުގެ ކުރިން މިހުރިހައިކަމެއް ނިމޭނެ. " ޝަޙީމުގެ އެކްސް ޕޯސްޓްގައި ލިޔުއްވާފައިވެއެވެ.

މިއަދު އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ކުރެއްވި މި ޕޯސްޓުގައި' ޒުވާން ޚަޠީބު'  މަޝްރޫޢު ކުރިއަށް ގެންދެވުމަށް މިނިސްޓަރީން ނިންމަވާފައިވާ ގޮތުގެ ތަފްޞީލްވެސް ހިމަނުއްވާފައިވެއެވެ.  

އެގޮތުން ކުރިމަތިލާފައިވާ މީހުންގެ އިންޓަވިއު މާލޭގައި ނަމަ އޮންނާނީ އެމީހަކު ހާޒިރުވެގެންކަމަށާއި،  އަދި ރަށުގައި އެމީހަކު ހުރިނަމަ އިންޓަވިއު ކުރިއަށްދާނީ އޮންލައިންކޮން ކަމަށާއި ، އިންޓަވިއުގައި ކުރިއަށްދާނީ ޤުރުއާން ކިޔެވުމާއި އަޑު އެހުމުގެ ބައިތަކުން އެކަނި ކަމަށް ވިދާޅުވި އެވެ.

އޭގެ އިތުރުން އިސްލާމިކް މިނިސްޓްރީގެ ވެބްސައިޓުގައި އާންމުކޮށްފައިވާ ހުތުބާތަކުން، އެމީހަކު އިޚްތިޔާރު ކުރާ ޚުޠުބާއެއް ކިޔާ އަޑުއެހުމަށް ފަހު ހުއްދަ ދެވޭނެކަމަށާއި އަދި ހުއްދަ ދެވޭ މީހުންނަށް ޚާއްސަ ތަމްރީނެއް ދިނުމަށް ވުޒާރާ އިން ނިންމާފައިވާކަމަށް ޑރ.ޝަޙީމް ވިދާޅުވި އެވެ.

މިއާއެކު ޝަހީމް ވިދާޅުވީ އިމާމްކަމުގެ ތަމްރީނު ކުރިއަށްދާނީ އަތޮޅުތަކުގައ އުޅޭ މީހުންނަށް އަތޮޅުތަކުގައި ކަމަށާއި، މާލެ ސަރަހައްދުގައި އުޅޭމީހުންނަށް މާލޭގައި ތަމްރީންތައް ކުރިއަށް ގެންދާނީ އެ ވުޒާރާގައި ކަމަށެވެ.

މި ފަރާތްތަކަށް ދެވޭނީ މޮސްކް މެނޭޖްމަންޓް، ޚުޠުބާ ކިޔުމުގެ ފަންނު، ޖަނާޒާގެ ކަންކަން، އިމާމުގެ އަހުލާޤު، މިސްކިތުގެ ދައުރު، އަދި މީގެ އިތުރުން ނަމާދު ފިގުޙުގެ ބައިން ކަމަށް ޝަހީމް ވިދާޅުވި އެވެ. އެހެން ނަމަވެސް އެއްވެސް އިމްތިހާނެއް ނޯންނާނެކަމަށްވެސް ފާހަގަ ކުރައްވާފައި ވެއެވެ.