އިއްޔެވަގުތެއްގައި ޖަޕާނުގެ މެދުތެރޭގައި އޮންނަ އިޝިކަވާ ޕުރޮވިންސަށް އައި ބާރުގަދަ ބިންހެލުމުގައި 30 މީހުން އެ ޕްރޮވިންސަށް ބޮޑެތި ގެއްލުންތަކެއް ލިބިއްޖެއެވެ.

ޖަޕާނުގެ ކާރިސާތަކާއި ބެހޭ މައި ޢިދާރާއިން މަޢުލޫމާތު ދޭގޮތުގައި މި ބިންހެލުމާއި ގުޅިގެން އަދިވެސް އިތުރު މީހުން މަރުވެފައިވާ ކަމަށް ލަފާކުރެވޭ ކަމަށާއި މި ބިންހެލުމުގެ އަސަރު އެންމެ ބޮޑަށްކޮށްފައިވަނީ ޖަޕާނުގެ ވަޖިމާ ސަރަހައްދަށް ކަމަށެވެ.

އިއްޔެ ޖަޕާނަށް ފުލްފުލުގައި 20 ވަރަކަށް ބިންހެލުން އައިސްފައިވާއިރު އެންމެ ބާރު ގަދަ ބިންހެލުމެއްގެ ގޮތުގައި އިއްޔެ ރެކޯރޑު ކުރެވިފައި ވަނީ ރިކްޓަރ މިންގަނޑުން 7.5 ގައި އައި ބިންހެލުމެވެ. މި ބިންހެލުމުގެ ސަބަބުން ޖަޕާނުގެ އައްސޭރި ފަށަށް ސުނާމީގެ އިންޒާރު ނެރެފައިވާ އިރު ޖަޕާނުގެ ބައެއް ހިސާބުތަކަށް ސުނާމީވެސް އަރާފައިވެއެވެ.

ޖަޕާނުގެ ކާރިސާތަކާއި ބެހޭ ޢިދާރާއިން މަޢުލޫމާތުދޭ ގޮތުގައި ޖަޕާނަށް އައި ބިންހެލުމުގެ ސަބަބުން އާއްމު ރައްޔިތުންގެ ގެދޮރަށާއި ތަކެއްޗަށް ވަނީ ވަރަށް ބޮޑަތި ގެއްލުންތަކެއް ލިބިފައެވެ. ބައެއް ހިސާބުތަކުން ގަސްތައް ވެއްޓި މަގުމަތީގެ ދަތުރުފަތުރުތަކަށް ވަނި ބުރޫ އަރާފައެވެ. އަދި ބައެއް ސަރަހައްދުތަކުން ކަރަންޓުގެ ޚިދުމަތްވެސް ވަނީ ކެނޑިފައެވެ. ހަމަ އެހެންމެ ބައެއް ސަރަހައްދުތަކުގެ ވައިގެ ދަތުރުފަތުރުގެ ޚިދުމަތްވެސް ވަނީ މެދު ކަނޑާލަށް ޖެހިފައެވެ.

އިއްޔެގެ ޖަޕާނަށް އައި ބިންހެލުމާއި ގުޅިގެން 140 ވަރަކަށް ލޮޅުންތައް ރެކޯރޑު ކުރެވިފައިވާއިރު ސުނާމީގެ އިންޒާރާއި ގުޅިގެން 97،000 އަށްވުރެ ގިނަ މީހުންނަށް ރައްކާތެރި ހިސާބުތަކަށް ދިއުމަށް އަންގައިފައިވެއެވެ. ނަމަވެސް މިހާރު މިއެންމެން އަބުރާ އެމީހުން ދިރިއުޅޭ ސަރަހައްދުތަކަށް ވަނީ ބަދަލުވެފައެވެ.

ކުރިއަށް އޮތް ދުވަސްތަކުގައި ޖަޕާނަށް ބިން ހެލުން އައިސްދާނެކަމަށް ވިސްނައިގެން އެކަމަށް ސަމާލުވުމަށް ޖަޕާނުގެ ކަމާ ބެހޭ ފަރާތްތަކުން ވަނީ އިންޒާރުކޮށްފައެވެ.