ރައީސް ޑރ. މުހައްމަދު މުއިއްޒުގެ ސަރުކާރުން އުފެއްދުމަށް ނިންމާފައިވާ "ޕްރެސިޑެންޝަލް ޔޫތު އެޑްވައިޒާސް" ބޯޑަށް ކުރިމަތި ލުމުގެ ފުރުޞަތު ހުޅުވާލައިފިއެވެ.

މިކަން ހާމަކޮށްފައިވަނީ އިއްޔެގެ ވަގުތެއްގައި މި ސަރުކާރުގެ ޔޫތު މިނިސްޓްރީން ކުރި އިޢުލާނެއްގައެވެ.

އެ އިއުލާނުގައިވާ ގޮތުން މި ބޯޑަށް ވަނުގެ ފުރުޞަތު ހުޅުވާލައިފައިވަނީ ފަންނިއްޔާތާއި ފަންނުވެރިކަމުގެ ދާއިރާއާއި ޒުވާނުން ބާރުވެރިކުރުވުމުގެ ދާއިރާއިން މަސައްކަތްކުރާ އެންޖީއޯ/ ސިވިލް ސޮސައިޓީ ދާއިރާއިން މިއިން ކޮންމެ ދާއިރާއަކުން ޖުމުލަ 4 ޖާގައެވެ. މިއިޢުލާނުގައިވާ ގޮތުން މި 4 ޖާގައަށް ފުރުޞަތު ލިބިގެންދާނީ ކޮންމެ ދާއިރާއަކަށް އަންހެން އަދި ފިރިހެން ވަކިން ފުރުޞަތު ލިބޭ ގޮތަށެވެ.

ޔޫތު މިނިސްޓްރީގެ މި އިއުލާނުގައިވާ ގޮތުގައި މިކަމަށް ކުރިމަތިލާ ފަރާތްތަކުގެ ޝަރުތެއްގެ ގޮތުގައި ހިމަނާފައި  ވަނީ ދިވެއްސަކަށް ވުމާއި އުމުރުން 18 އަހަރާއި 30 އަހަރާ ދެމެދުގެ މީހަކަށް ވުމުގެ އިތުރުން އެ މީހަކު ތަމްސީލުކުރާ ދާއިރާއާ ގުޅޭ ފަންނީ ޤާބިލްކަން ނުވަތަ ތަޖުރިބާ ލިބިފައިވުމާއި ވޭތުވެ ދިޔަ ފަސް އަހަރުގެ ތެރޭގައި ޖިނާއީ ކުށެއް ސާބިތުވެފައިވާ މީހެއް ކަމުގައިނުވުމެވެ.

ޔޫތު މިނިސްޓްރީގެ އިޢުލާނުގައި މިވާ ބޯޑަކީ މިދިޔަމަހުގެ 25 ވަނަ ދުވަހު ރައީސް ޑރ. މުހައްމަދު މުއިއްޒު އުފައްދަވާނެކަމަށް އިޢުލާނުކުރައްވާފައިވަ ބޯޑެކެވެ. އެދުވަހު ސަރުކާރުން ބުނެފައިވަނީ އެބޯޑު އެކުލެވިގެންވާނީ 15 މެމްބަރުންގެ މައްޗަށް ކަމަށާއި، ކޮންމެ ތިން މަހުން އެއްމަހު އެ ބޯޑުގެ ޗެއާކަން ކުރައްވާނީ ރައީސްކަމަށެވެ.

"ޕްރެސިޑެންޝަލް ޔޫތު އެޑްވައިޒާސް" ބޯޑާއި ގުޅޭގޮތުން ޔޫތް މިނިސްޓްރީން ކުރި އިއުލާނުގައިވާ ގޮތުން ބޯޑަށް ކުރިމަތިލުމަށް ފުރަން ޖެހެނީ ގޫގުލް ފޯމެކެވެ. އަދި މި ފޯމު ހުށައެޅުމުގެ ސުންގަޑިއަކީ އަންނަ ހޯމަ ދުވަހުގެ 14:00ގެ ކުރިން ކަމުގައި އިއުލާނުގައި ފާހަގަކުރައްވާފައި ވެއެވެ.