ރައީސުލްޖުމްހޫރިއްޔާ ޑރ މުހައްމަދު މުޢިއްޒު ގެ ކެބިނެޓް ގެ ވަޒީރުންނަށް ރުހުން ދިނުން ފަސްކޮށް، އެމްޑީޕީ މެޖޯރިޓީ އޮންނަ މަޖިލީހުން އެ ޕާޓީގެ ނަން ހަޑިކޮށްލާފައިވާ ކަމަށް ކަމަށް ނައިބް ރައީސް ހުސައިން މުހައްމަދު ލަތީފް ވިދާޅުވެއްޖެއެވެ.

ޕްރޮގްރެސިވް ކޮންގްރެސް ކޯލިޝަނުން ބޭއްވި ކެމްޕެއިން ޖަލްސާގައި ވާހަކަދައްކަވަމުން ނައިބް ރައީސް ހުސައިން ވިދާޅުވީ، މާލެ ސިޓީގެ މޭޔަރުގެ އިންތިހާބަކީ މުހިންމު އިންތިހާބެއް ކަމަށާއި، މި އިންތިހާބުގެ މުހިންމު ކަން ހިތްތަކަށް ގެނުވި، އިންތިޚާބު ވާދަވެރި އިންތިޚާބަކަށް ވެގެން ދިޔައީ ކުރީގެ މާލޭ މެޔަރ، އަދި އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒު، މަސައްކަތް މޭޔަރ ކަމުގެ މަގާމުގައި ހުންނަވައި ކޮށްދެއްވި ޚިދުމަތްތަކުގެ ސަބަބުން ކަމަށެވެ. 

މިގޮތުން ދެ އަހަރާއި ހަ މަސް ދުވަހު އެމަނިކުފާނު މާލެ ސިޓީގެ މޭޔަރުކަމުގައި، ބޮޑު ސަރުކާރެއްގެ ފިއްތުންތަކާއި އެކުގައި ހުންނަވައިގެން ބޮޑެތި ބަދަލުތަކެއް މާލޭގެ ރައްޔިތުންނަށް ގެނެސްދެއްވި ކަމަށް ނާއިބު ރައީސް ވިދާޅުވިއެވެ.

އޭގެ ނަތީޖާއެއްގެ ގޮތުން، މާލެ ސިޓީ މޭޔަރ ކަމަށް މިހާރުވެސް ވާދަކުރައްވާ ބައެއް ކެންޑިޑޭޓުން ރައީސް މުޢިއްޒުގެ ތަސައްވުރަށް ތަޢުރީފް ކުރައްވައި، އެއީ ކޮންމެހެންވެސް ތަންފީޒު ކުރައްވަން ޖެހޭ ތަސައްވުރެއްކަން ވިދާޅުވަމުންދާކަން ނާއިބު ރައީސް ފާހަގަކުރެއްވިއެވެ. 

ކަންމިހެން ހުރި ނަމަވެސް، ޕީއެންސީގެ ކެންޑިޑޭޓު ފިޔަވައި ދެން ވާދަ ކުރައްވާ ކެންޑިޑޭޓުންނަކީ އެހެން ޕާޓީ ތަކަށް ނިސްބަތްވާ ކެންޑިޑޭޓުން ކަމަށްވާއިރު, އެބޭފުޅުން ތިއްބެވީ އެ ޕާޓީ އެއްގެ މެނިފެސްޓޯ އެއްގައި ކަމަށް އެމަނިކުފާނު ވިދާޅުވި އެވެ.

ވުމާއެކު، މާޒީގައި ކަން ހިނގާފައިވާ ގޮތަށް ބަލައި، ރައީސް ޑރ. މުއިއްޒުގެ ތަސައްވަރުގައި އެ ހުންނެވި ކަންކަން، ތަންފިޒު ކުރުމަށް، އެމަނިކުފަނާއި އެއް ސަފެއްގައި އެއް އަޑަކުން ވާހަކަދެއްކޭނެ ބޭފުޅަކު މާލޭ މޭޔަރ ކަމުގައި ހުންނެވުން އެއީ އެމަނިކުފާނު ބޭނުންފުޅުވެވަޑައިގަންނަވާ ގޮތް ކަމަށް ނައިބް ރައީސް ވިދާޅުވިއެވެ. އަދި އެ ބޭފުޅަކީ ޕީއެންސީގެ ޓިކެޓް ގައި މާލޭ މޭޔަރ ކަމަށް ވާދަކުރައްވާ ކުރީގެ ބަންޑާރަ ނާއިބު އައިޝަތު ޢާޒިމާ ޝަކޫރު ކަމަށް އެމަނިކުފާނު ވިދާޅުވި އެވެ. 

ހަމައެހެންމެ، ނާއިބު ރައީސް ވިދާޅުވީ، ހަމައެކަނި ސަރުކާރުގެ ސިޔާސަތުތައް ތަންފީޒުކުރާނެ މޭޔަރަކު އިންތިޚާބު ކޮށްގެން ވާން ނެތް ކަމަށާ، އެއާއެކު، ދެން ތިބި ކައުންސިލް މެންބަރުންނަކީވެސް ވެރިކަން ކުރާ ޕާޓީގެ މެންބަރުންނަށް މުހިންމު ކަމަށެވެ. އަދި އޭގެ މުހިންމުކަން މިހާރު ރައްޔިތުންގެ މަޖިލީހުގައި ހިނގަމުންދާ ކަންކަމުންވެސް ހާމަވެގެންދާކަން އެމަނިކުފާނު ފާހަގަކުރެއްވިއެވެ. 

އެގޮތުން، އެމްޑީޕީ މެޖޯރިޓީ އޮންނަ މަޖިލީހުން ރައީސް މުޢިއްޒުގެ ކެބިނެޓަށް ރުހުން ނުދީ ހިފަހައްޓާފައިވާކަން ފާހަގަކުރައްވައި ނާއިބު ރައީސް ވިދާޅުވީ އެއީ ދުސްތޫރީ ނިޒާމު ގަޑުބަޑުކޮށްލުމުގެ ބޭނުމުގައި ކުރަމުންދާ ކަމެއް ކަމަށެވެ.

އެހެންކަމުން ނައިބު ރައީސް ވިދާޅުވީ މާލޭ ސިޓީ ކައުންސިލްގެ ބައި އިލެކްޝަންގައި ވޯޓު ދޭއިރު ސަރުކާރާ ދެކޮޅު ކެންޑިޑޭޓަކަށް ވޯޓުލައިފިނަމަ، އެއީ ތަރައްގީގެ ފިޔަވަޅު ފަހަތަށް އެޅުން ކަމަށާ، އެ އިންތިހާބުގައި ވޯޓު ދޭއިރު ވިސްނަން ވާނީ ސަރުކާރާ ދެކޮޅު ވިސްނުން ހުރި ކެންޑިޑޭޓުންނަށް ވޯޓު ނުދިނުމަށް ކަމަށެވެ.