ޓްރާންސްޕޯޓް މިނިސްޓްރީން ފޯރުކޮށްދެމުންދާ ހުރިހާ ޚިދުމަތެއް އެއް ޕޯޓަލްއަކުން ލިބޭނެ އިންތިޒާމު ހަމަޖައްސަން ނިންމަވާފައިވާ ކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

ޓްރާންސްޕޯޓް މިނިސްޓްރީގެ ޚިދުމަތްތައް އޮންލައިންކޮށް ފޯރުކޮށް ދެމުންދިޔަ ނަމަވެސް މިހާރު، އެކި ޚިދުމަތްތައްކަށް އެދެވެނީ އެކި ޕޯޓަލްތައް މެދުކޮށެވެ.

އެކަމުގެ ސަބަބުން އައްމުންނަށް އުނދަގޫ ތަކާއި ކުރިމަތިލާން ޖެހޭ އިރު، މިއަދު ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަމީން ވަނީ، އެމައްސަލަ ހައްލުކުރުމުގެ މަސައްކަތް މިނިސްޓްރީން ފަށާފައިވާ ކަމަށް ވިދާޅުވެފައެވެ. 

މިއާއެކު އަމީން ވިދާޅުވީ އެ މިނިސްޓްރީގެ އަމާޒަކީ ކުރިއަށް އޮތް 3 މަސް ނުވަތަ 4 މަސްތެރޭ އެއް ޕޯޓަލްއަކުން ހުރިހާ ޚިދުމަތެއް ލިބޭގޮތަށް ހަމަޖެއްސުން ކަމަށެވެ.

މީގެ އިތުރުންވެސް، މިއަދުގެ ބައްދަލުވުމުގައި އަމީން ވަނީ ޓްރާންސްޕޯޓް މިނިސްޓްރީގެ އެތެރޭގެ ހިންގުމުގެ ނިޒާމު ރަނގަޅުކުރުމަށް އެ މިނިސްޓރީގައި އައިޓީ އަދި ޕީއާރް ސެކްޝަނެއް އުފައްދަން ޖެހޭ ކަމަށާ އެކަމަށްޓަކައި މިހާރު އެދިފައިވާ ކަމަށެވެ.

އަދި ޓްރާންސްޕޯޓް މިނިސްޓްރީގެ ޚިދުމަތްތައް އޮންލައިން ކުރި ނަމަވެސް މިނިސްޓްރީ ގައި ބޭނުން ކުރަމުންދަނީ ދުވަސްވީ ސޮފްޓްވެއަރ އެއް ކަމުން އެކަން ރަނގަޅު ކުރުމަށްވެސް މަސައްކަތް ކުރަންޖެހޭ ކަމަށެވެ. 

މީގެ އިތުރުން އަމީން ވަނީ، މިނިސްޓްރީގެ އެތެރޭގައި ގޯސްތަކެއް ހިންގާފައިވާ ކަމަށް ތުހުމަތު ކުރައްވައި، އެކަންކަން ބެލުމަށް އޮޑިޓެއް މިހާރު ފަށާފައިވާ ކަމަށް ވިދާޅުވެފައެވެ.