ވޭތުވެދިޔަ 2023 ވަނަ އަހަރު ނިމުނު އިރު ދިވެހިރާއްޖޭގައި އޮޕަރޭޓް ކުރަމުން ގެންގޮސްފައިވަނީ 61،650 ޓޫރިސްޓު އެނދުކަމަށް ފަތުރުވެރިކަމާ ބެހޭ ވުޒާރާއިން ހަމަކޮށްފިއެވެ.

އެމިނިސްޓރީން އެކަން ހާމަކޮށްފައިވަނީ އެމިނިސްޓރީގެ ފަރާތުން ނެރެފައިވާ ވޭތުވެދިޔަ އަހަރުގެ ފަތުރުވެރިމާއި ބެހޭ ތަފާސް ހިބުގައެވެ.

އެމިނިސްޓރީގެ ތަފާސް ހިސާބުގައިވާ ގޮތުން ވޭތުވެދިޔަ 2023 ވަނަ އަހަރު ރާއްޖޭގައި 61،650 ޓޫރިސްޓު އެނދު އޮޕަރޭޓު ކުރަމުންދިޔައިރު އޭގެ ތެރޭގައި ހިމެނެނީ ޓޫރިސްޓް ރިސޯރޓުތަކުގައި ހުރި 43،279 އެނދާއި، ޓޫރިސްޓް ހޮޓާތަކުގައި ހުރި 1،940 އެނދާއި، ގެސްޓު ހައުސްތަކުގައި ހުރި  13،657 އެނދާއި އަދި ސަފާރީ އުޅަދުފަހަރުގައި ހުރި 2،774 އެނދެވެ.

މިނިސްޓރީން ނެރެފައިވާ އެހެނިހެން ތަފާސް ހިސާބުތަކަށް ބަލާއިރު ވޭތުވެދިޔަ އަހަރު ފަތުރުވެރިކަމުގެ އެންމެ ރަނގަޅު މާކެޓެއްގެ ގޮތުގައި ފާހަގަ ކުރެވިފައިވަނީ އިންޑިޔާއެވެ. އެގޮތުން ވޭތުވެދިޔަ އަހަރު އިންޑިޔާއިން 209،198 ފަތުރުވެރިއަކު ރާއްޖެއަށް އައިސްފައި ވާކަމަށް މިނިސްޓްރީގެ ތަފާސް ހިސާބުތަކުން ދައްކައެވެ.

އިންޑިޔާއާއި ޖެހިގެން މިދިޔަ އަހަރު ދެވަނައަށް އެންމެ ގިނަ ފަތުރުވެރިން އައި ޤައުމެއްގެ ގޮތުގައި މިނިސްޓްރީގެ ތަފާސް ހިސާބުން ފެންނަށް އޮތީ ރަޝިޔާއެވެ. ވޭތުވެދިޔަ އަހަރު ރަޝިޔާއިން 209،146 ފަތުރުވެރިއަކު ރާއްޖެ އައިސްފައިވެއެވެ. އަދި ތިންވަނައަށް އެންމެ ގިނަ ފަތުރުވެރިންއައި ޤައުމެއްގެ ގޮތުގައި ވަނީ ކޮވިޑްގެ ކުރިން އަބަދުވެސް ރާއްޖެއަށް އެންމެ ގިނަ ފަތުރުވެރިން އަންނަ ޗައިނާއެވެ. ވޭތުވެދިޔަ އަހަރު ޗައިނާއިން 187،118 ފަތުރުވެރިން އައިސްފައިވެއެވެ.

ފަތުރުވެރިކަމާއި ބެހޭ ވުޒާރާއިން ނެރެފައިވާ ތަފާސް ހިސާބުތަކުން އެނގޭ ގޮތުގައި ވޭތުވެދިޔަ އަހަރު އެންމެ ގިނަ ފަތުރުވެރިން ރާއްޖެއަށް ޒިޔާރަތް ކޮށްފައިވަނީ ޑިސެމްބަރު މަހުއެވެ. އެމަހު ރާއްޖެ އަށް 194،690 ފަތުރުވެރިން އައިސްފައިވެއެވެ.

މިއަހަރަށް މި ސަރުކާރުގެ އަމާޒަކީ އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ ގެނައުމެވެ.