މީގެ އަހަރުތަކެއް ކުރިން ރާއްޖެއިން ނައްތާ ލެވިފައިވާ ފައިލޭރިއާ ބަލިޖެހިފައިވާ ބިދޭސީން ތަކެއް އަލުން ރާއްޖެއިން ފެނުމާއި ގުޅިގެން ފައިލޭރިޔާއަށް ޓެސްޓު ކުރުމުގެ ބޮޑު ހަރަކާތެއް މުޅިރާއްޖޭގައި ކުރިއަށް ގެންދިޔުމަށް ހެލްތު ޕްރޮޓެކްޝަން އެޖެންސީ، (އެޗްޕީއޭ) އިން ނިންމައިފިއެވެ.
މުޅި ރާއްޖޭގައި ކުރިއަށް ގެންދިއުމަށް ނިންމާފައިވާ މިހަރަކާތާއި ގުޅޭގޮތުން އެޗްޕީއޭއިން ވިދާޅުވީ މިހަރަކާތުގައި ފުރަތަމަ ސާމްޕަލްތައް ނެގުމަށް ހަމަޖެހިފައިވަނީ މާލެއާއި ހުޅުމާލެއިން ކަމަށެވެ. އަދި އެއަށްފަހު ވިލިމާލެއާއި ގުޅީފަޅާއި ތިލަފުށީގައިވެސް މިހަރަކާތް ކުރިއަށް ގެންދިޔުމަށް ހަމަޖެހިފައިވާ ކަމަށެވެ.
ހެލްތު ޕްރޮޓެކްޝަން އެޖެންސީ، (އެޗްޕީއޭ) އިން ހާމަކޮށްފައިވާ ގޮތުގައި މި ފަށާ ޕްރޮގްރާމު ކުރިއަށް ގެންދާނީ ވަކި އުމުރުފުރާއެއް ނެތި ދިވެހިންނާއި ބިދޭސީންނަށްވެސް ބައިވެރިވެވޭ ގޮތަށް ކޮންމެ ދުވަހަކުވެސް މަދުވެގެން 70 ރެންޑަމް ސާމްޕަލް ޓެސްޓު ކުރުމަށް އަމާޒުކޮށްގެން ކަމަށެވެ.
މިދިޔަ ޑިސެމްބަރު މަހުގެ ތެރޭގައި ހދ. ކުޅުދުއްފުށިން މި ބަލި ޖެހިފައިވާ ބިދޭސިންތަކެއް ފެނިފައިވާއިރު އޭގެފަހުން ހުޅުމާލެ އިންނާއި މާލެއިން ވެސް ވަނީ މިބަލިޖެހިފައިވާ ބިދޭސީންގެ ބަޔަކު ފެނިފައެވެ. މިކަމާއި ގުޅިގެން ރާއްޖެ އެތެރެވާ ބިދޭސީ މަސައްކަތްތެރިން މި ބަލި ހިމެނޭ ގޮތަށް މެޑިކަލް ޗެކަޕް ހެދުމަށް ސަރުކާރުން މިހާރު ވަނި ނިންމާފައެވެ.
ރާއްޖޭގައި ފައިލޭރިޔާ ބަލި ފެތުރެން ފެށުމާއި އެކު ޞިއްޙަތާ ބެހޭ ވަޒީރު ޑރ. ޢަބްދުالله ޚަލީލް ވިދާޅުވެފައިވަނީ ފައިލޭރިއާއަށް ޓެސްޓްކުރުމަށް ކިޓްތަކާއި ފަރުވާއަށް ބޭނުންވާ ބޭސް ރާއްޖޭގައި އެބަހުރިކަމަށާއި އަދި މި ބައްޔަށް ބޭނުންވާ އިތުރު ބޭހާއި ޓެސްޓިން ކިޓް ހޯދުމަށް މަސައްކަތް ކުރައްވަމުން ގެންދަވާ ކަމަށެވެ.
ރާއްޖެއިން އަނެއްކާވެސް ފައިލޭރިޔާ ބަލި ފެނުމާއި ގުޅިގެން މިބައްޔަށް ހޭލުންތެރި ކުރުވުމުގެ ގިނަ ހަރަކާތްތަކެއް ކަމާގުޅޭ ފަރާތްތަކުން މިހާރުވެސް ގެންދަވަނީ ހިންގަވަމުންނެވެ.
Advertisement
This content is created and paid for by advertisers and does not involve Voice Journalists
