ޖީއެމްއާރު މައްސަލައިގެ ހައްލު ހޯއްދަވައިދެއްވުމަށް، ޤާނީނީގޮތުން އެންމެ ވަރުގަދަ މަސައްކަތްތަކެއް ކުރެއްވި ބޭފުޅަކީ ސަރުކާރުގެ ފަރާތުން މާލެ ސިޓީ މޭޔަރު ކަމަށް ވާދަ ކުރައްވާ އައިޝަތު އާޒިމާ ޝަކޫރުކަމަށް ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
މިނިސްޓަރ ޚަލީލު މިފަދައިން ވިދާޅުވެފައިވަނީ އާޒިމާގެ މެނިފެސްޓޯ ލޯންޗުކުރުމަށް ރޭ ޕިއެންސީގެ އޮފީސް ގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ
ރޭގެ އެ ހަފްލާގައި ވާހަކަފުޅު ދައްކަވަމުން ޚަލީލު ވިދާޅުވީ، އާޒިމާގެ ޚިދުމަތްތަކާމެދު އެއްވެސް ސުވާލެއް ނެތް ކަމަށާއި އެކަމަނާއަކީ މޭޔަރުކަމަށް އެންމެ އެކަށީގެންވާ ކެނޑިޑޭޓް ކަމަށެވެ. އޭގެ ތެރެއިންވެސް ޖީއެމްއާރު އަބުރާ ހޯއްދެވުމަށް އާޒިމާ ކުރެއްވި މަސައްކަތްޕުޅު މިނިސްޓަރ ޚަލީލު ފާހަގަ ކުރެއްވިއެވެ.
"ޖީއެމްއާރު އަނބުރާ ހޯދުމުގައި ޤާނޫނީ ގޮތުން ކުރަންޖެހުނު ހުރިހާ މަސައްކަތެއްގެ އެންމެ ވަރުގަދަ މަސައްކަތްޕުޅުތަކެއް ކުރެއްވީ އެކަމަނާ،"
ހަލީލް ވިދާޅުވިއެވެ.
މިކަންތައްތަކުގެ ތަފުސީލް ދެއްވަމުން ޚަލީލު ވިދާޅުވީ ޖީއެމްއާރު މައްސަލައިގައި ސިންގަޕޫރުގެ ކޯޓަށް ވަޑައިގެން ބައިނަލްއަޤުވާމީ މައިދާނުގައި އާޒިމާ ވަނީ ރާއްޖެއަށް ކާމިޔާބު ހޯއްދަވައި ދެއްވާފައި ކަމަށާއި، ނިމިދިޔަ ސަރުކާރުން ސިއްރިއްޔާތުގައި ނިންމާލަން އުޅުނު ޗާގޮސް މައްސަލަވެސް އެއީ ކިހާބޮޑު ނުރައްކަލެއް އޮތް ކަމެއްކަން އާއްމުންނާއި ހިސާބަށް ތިލަކޮށްދިނުމުގައި އެންމެ އިސް ދައުރެއް އަދާކުރެއްވީ އާޒިމާ ކަމަށެވެ.
"ޤާނޫނީ ގޮތުން މިކަމުގައި ހުރި ދެކޮޅު ނުޖެހޭ ކަންތައްތައް، ކުރީގެ ސަރުކާރުން ކުރެއްވި ކަންތައްތަކުގެ ތެރޭގައި ހިމެނޭ ދެކޮޅު ނުޖެހޭ ކަންތައްތައް، ދިވެހިން އަތުން އެ ނިގުޅައިގަތް ހައްޤުތައް ބަޔާންކޮށްދެއްވައި ޤާނޫނީ ގޮތުން މިކަމަށް ހައްލެއް ހޯދިދާނެކަން ޤާނޫނުތަކުގެ ޒަރީއާއިން އެކަމަނާ ވަނީ ދިވެހި ރައްޔިތުންނަށް ސާބިތުކޮށްދީފައި."
ރޭގެ ހަފުލާގައި ހަލީލް ވިދާޅުވިއެވެ.
މިހުރިހާ ކަމަކަށް އިޝާރާތް ކުރެއްވުމަށްފަހު މިނިސްޓަރ ޚަލީލު ވިދާޅުވީ އުސްތާޛާ އާޒިމާއަށް ވޯޓުދޭން ޖެހޭ ކަންތައްތަކާ މެދު ދިވެހި ރައްޔިތުންނަށް އެއްވެސް ސުވާލެއް ނެތްކަމަށެވެ.
Advertisement
This content is created and paid for by advertisers and does not involve Voice Journalists
