ދެހަފުތާގެ ކުރު ޗުއްޓީއަކަށް ފަހު އެކަޑަމިކް ކަލަންޑަރުގައިވާ ގޮތަށް މިއަހަރުގެ ދިރާސީ އަހަރުގެ ދެވަނަ ސެމިސްޓާރގެ ކިޔެވުން މާދަމާ ފެށޭނެއެވެ.
ސްކޫލުތަކުގެ ކިޔެވުން މާދަމާ ފެށިގެން ދާއިރު ސްކޫލުތަކުގައި މި ސެމިސްޓަރއިން ފެށިގެން ދިވެހި ޤައުމިއްޔަތު ދިރުވާ އާލާކުރުމުގެ ގޮތުން ގިނަ ހަރަކާތްތަކެއް ރާވާ ހިންގުމަށް މިނިސްޓަރީ އޮފް އެޑިޔުކޭޝަނުން ސްކޫލުތަކަށް ވަނީ އަންގާފައެވެ.
އެގޮތުން އެންމެ ޚާއްޞަގޮތެއްގައި ފާހަގަކޮށްލެވެނީ ސްކޫލުތަކުގައި ކިޔެވުން އޮންނަ ކޮންމެ ދުވަހެއްގެ ކިޔެވުން ފެށުމުގެ ކުރިން ކޮންމެ ދަންފަޅިއެއް ވަކިން އެސެމްބްލީ ބޭއްވުމަށް އަންގާފައިވަ އެންގެވުމެވެ.
ސްކޫލުތަކުގައި އެސެމްބުލީ ބޭއްވުމާއި ގުޅޭގޮތުން މިނިސްޓްރީން ބުނެފައިވަނީ އިސްލާމީ ސިފަތަކާއި ސްލޫކީ މިންގަނޑުތައް ދަރިވަރުންގެ ކިބައިގައި އަށަގެންނެވުމާއި، ޤައުމިއްޔަތަށް ދަރިވަރުން އަހަމިއްޔަތުކޮށްދޭ މިންވަރު އިތުރުކުރުމުގެ ގޮތުން ދަރިވަރުންގެ ހިތްތަކުގައި ޤައުމީ ރޫޙް އާލާކޮށް ވަޠަން ދެކެ ލޯބިވާން ދަސްކޮށް ދިނުމަކީ މަންހަޖު ފުރިހަމަ ގޮތުގައި ތަންފީޒުކުރުމަށް ކުރަން ޖެހޭ ކަމެއް ކަމަސްވާތީ ކޮންމެ ދުވަހަކުވެސް ސްކޫލުތަކުގައި އެސެމްބުލީ ބެއްވުމަށް ނިންމެވީ ކަމަށެވެ.
މާދަމާ ސްކޫލުތަކުގައި ދެވަނަ ސެމިސްޓާރއަށް ކިޔެވުން ފެށިގެން ދާއިރު މިނިސްޓަރީން މިހާރު ވަނީ މިފެށޭ ސެމިސްޓަރގެ ކިޔެވުން އަންނަ އެޕްރީލް މަހުގެ 25 ވަނަ ދުވަހަށް ފުރިހަމަ ކުރުމަށް ސްކޫލުތަކުގެ އިސްވެރިންނަށް އަންގަވާފައެވެ.
މިއީ އެކަޑަމިކު ކަލަންޑަރުގައިވާ ދުވަހަށްވުރެ އަވަސް މުއްދަތެއްކަމަށް ވާތީވެ ދެން ސްކޫލުތަކުން ޢަމަލުކުރަން ޖެހޭނެ ގޮތްތައް ސްކޫލުތަކުގެ ކިޔެވުން ފެށުނީމަ އަންގަމުން ދާނެކަމަށް މިނިސްޓްރީ އާއި ހަވަލާ ދެއްވާ ބައެއް ޕްރިންސިޕަލުން މަޢުލޫމާތު ދެއްވައެވެ.
މިނިސްޓްރީން ކުރިން ޢާއްމު ކުރައްވާފައިވާ 2023-2024 ވަނަ އަހަރުގެ އެކަޑަމިކް ކަލަންޑަރުގައިވާ ގޮތުން މިއަހަރުގެ ދެވަނަ ސެމިސްޓާރގެ ކިޔެވުން ނިމޭނީ އަންނަ މޭމަހުގެ 23 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
