ސަރުކާރުގެ ކެންޑިޑޭޓެއްގެ ގޮތުގައި މާލޭގެ މޭޔަރު ކަމަށް ވާދަކުރައްވާ އައިޝަތު އާޒިމާ ޝަކޫރު ހޮވައިދެއްވައިފި ނަމަ ވިލިމާލެ ރައްޔިތުން ބޭނުންވާ ހުރިހާ ކަމެއް ފުރިހަމަވެގެން ދާނެ ކަމަށް ރައީސުލް ޖުމުހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުހައްމަދު މުއިއްޒު މިފަދައިން ވިދާޅުވެފައި ވަނީ އާޒިމާގެ ކެމްޕެއިނުގައި ވިލިމާލެ ރައްޔިތުންނާ މިއަދު ބައްދަލުކުރައްވައި ވާހަކަފުޅު ދައްކަވަމުންނެވެ.
މިބައްދަލުވުމުގައި ރައީސް ވިދާޅުވީ އެމަނިކުފާނު މޭޔަރުކަމުގައި ހުންނެވި އިރުވެސް އަދި މިހާރުވެސް ރައްޔިތުންނަށް ޚިދުމަތް ކުރުމުގައި ވެރިކަން ކުރާ ޕާރޓީގެ މޭޔަރަކު ކައުންސިލްގައި ހުންނެވުމުގެ މުހިއްމުކަން އެނގިވަޑައި ގަންނަވާ ކަމަށެވެ. އެގޮތުން ރައީސް ޑރ. މުއިއްޒުވަނީ މިހާރުގެ މަޖިލިސް މެމްބަރުންގެ ބައެއް މިސާލުތައް ދައްކަވައި ދެއްވާފައެވެ.
"ސަރުކާރުގެ ހުރިހާ އެއްބާރުލުމެއް، ވިލިމާލެ ރައްޔިތުން ބޭނުންވާ ހުރިހާ ކަމެއް ފަހިވުމުގެ ހުރިހާ މަރުހަލާތަކެއް ކަޑައްތުވެ، ސަރުކާރުގެ ފުރިހަމަ އެއްބާރުލުން ރައްޔިތުންނަށް ލިބޭ ހިސާބުގައި އޮއްވައި މޭޔަރަކަށް އަޅުގަނޑުމެންގެ ފިކުރުގައި ނެތް އެހެން ޕާޓީއެއްގެ މޭޔަރަކު ހޮވައިފިއްޔާ އަދި މޭޔަރު ކިތަންމެ ކަމެއް ކޮށްދޭން ބޭނުން ވިޔަސް އެ ބޭފުޅަކު އެ ނިސްބަތްވާ ޕާޓީން ކަންކަން ކުރާނެ ގޮތެއް ނޭނގޭނެ،"
ޕާރޓީ ތެރެއިން މިސާލު ނަންގަވަމުން ރައީސް ވިދާޅުވި އެވެ.
މިވަގުތު ސަރުކާރު ހިންގަވަމުން ޕީޕީއެމް/ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ އައިޝަތު އާޒިމާ ޝަކޫރު ގެ ކެމްޕެއިން ތަފާތު އިވެންޓުތަކިގައި ރައީސް ޑރ. މުހައްމަދު މުއިއްޒު ވަނީ މި މޭރުމުން ވާހަކަފުޅު ދައްކަވަފައެވެ.
"މިހާރު އެބަ ފެނޭ މަޖިލިސް ތެރެއިން ކަންކަން ކުރާ ގޮތް. އެހެންވީމާ ތިބޭފުޅުން އެ ރިސްކު ނުނަންގަވާތި. އަޅުގަނޑުމެންގެ ކެންޑިޑޭޓް ، ހޮއްވަވައި ދެއްވީމާ ވަރަށް ފަސޭހަކަމާއެކު ރައްޔިތުން އެދޭ ގޮތަށް ހުރިހާ ކަމެއް ތަރުތީބުވެ، މި ރަށުގައި ކުރަން ހުރި ހުރިހާ ކަމެއް ހަމަޖެހިގެންދާނެ."
ވިލިމާލޭގައި ހުންނަވާ އުސްތާޛާ އާޒިމާގެ ކެމްޕެއިންގެ އިވެންޓުގައި ވާހަކަފުޅު ދައްކަވަމުން ރައީސް ވިދާޅުވިއެވެ.
ރައީސް ޑރ. މުހައްމަދު މުއިއްޒުގެ ވެރިކަމުގައި ވިލމާލޭގައި ކުރުމަށް ވަރަށް ގިނަ މަސައްކަތްތަކެއް މިހާރުވެސް ތާވަލު ކުރެވިފައިވާއިރު ކުރިއަށް އޮތް ދުވަސްތަކުގައި ގިނަ މަސައްކަތްތަކެއްގެ ޢަމަލީ މަސައްކަތްތައް ފެށިގެންދާނެ ކަމަށް ސަރުކާރުން ހާމަކުރައްވައެވެ.
މިވަގުތު ހުސްވެފައިވާ މާލޭ މޭޔަރުކަމަށް މީހަކު ހޮވުމަށް ބާއްވާ އިންތިހާބު މިމަހުގެ 13 ގައި ބޭއްވުމަށް ހަމަޖެހިފައިވާ އިރު މި މަޤާމަށް 4 ބޭފުޅަކު ކުރިމަތި ލައްވާއިވެއެވެ.
Advertisement
This content is created and paid for by advertisers and does not involve Voice Journalists
