ރައީސުލް ޖުމުހުރިއްޔާގެ ނައިބު ހުސެއިން މުހައްމަދު ލަޠީފު އެންމެފަހުން މޮންޓަނޭގްރޯ އަށް މިދިޔަ މަހު ކުރެއްވި ދަތުރުފުޅަށް ދައުލަތުން ހަލައްކައެއްހާ ރުފިޔާ ޚަރަދުވިކަމަށް ރައީސް އޮފީހުން މިއަދު ހާމަކޮށްފިއެވެ.

ނައިބު ރައީސް ހުސެއިން މުހައްމަދު ލަތީފު އެންމެފަހުން ކުރެއްވި ދަތުރުފުޅަކީ، ދެކުނު އިރުމަތީގެ ޤައުމެއް ކަމަށްވާ، މޮންޓަނޭގްރޯގެ ޑަންލޮވް-ގްރަޑްގައި ބޭއްވި 3 ވަނަ ކޮންގްރެސް އޮފް ޑިމޮކްރެޓިކް މޮންޓަނޭގްރޯގައި ބައިވެރިވެވަޑައިގަތުމަށް ކުރެއްވި ދަތުރު ފުޅެކެވެ.

މޮންޓަނޭގްރޯ އަށް ނައިބު ރައީސް ފުރާވަޑައިގެންނެވީ މިދިޔަމަހުގެ 23 ވަނަ ދުވަހުއެވެ.  ބިޒްނަސް ކްލާހުގައި ކުރެއްވި ހަތަރު ދުވަހުގެ ދަތުރުފުޅަށް ފަހު، އެނބުރި ރާއްޖެ ވަޑައިގެންނެވީ މިދިޔަ މަހުގެ 27 ވަނަ ދުވަހުއެވެ.

Advertisement

ރައީސް އަދި ނައިބް ރައީސް ކުރައްވާ ދަތުރުފުޅުތަކުގެ ތަފްސީލް، އެ ދަތުރުފުޅެއް ނިމޭތާ 15 ދުވަހުގެ ތެރޭގައި އާންމު ކުރެއްވުމަށް ރައީސް ޑރ. މުހައްމަދު މުއިއްޒު ، ވައުދުވެ ވަޑައިގެންފައިވާ ފަދައިން މިއަދު މިވަނީ ނައިބުރައީސްގެ އެންމެފަހުގެ ދަތުރުފުޅަށް ދަޢުލަތުން ހިނގި ޚަރަދުގެ ތަފުޞީލް އާއްމު ކުރައްވާފައެވެ.

ރައީސް އޮފީހުން އާއްމުކޮށްފައިވާ މައުލޫމާތުތަކަށް ބަލާއިރު، އެ ދަތުރުފުޅަށް ދައުލަތުން، މުޅި ޖުމުލަ 589،736ރ. ޚަރަދު ކޮށްފައިވެ އެވެ.

މި ޚަރަދުގެ ތަފްޞީލަށް ބަލާއިރު ބިޒްނަސް ކްލާހުގެ ފަސް ޓިކެޓަށް 492،746ރ. ހަރަދު ކޮށްފައިވާއިރު ،ފަސް ބޭފުޅުންގެ ޕޮކެޓުމަނީއަށް 64،638ރ. ޚަރަދު ކޮށްފައިވެއެވެ. މީގެ އިތުރުން ފަސް ބޭފުޅުންގެ މޮންޓިނީގްރޯގައި ފަރިއްކޮޅަށް 23،823ރ. ޙަރަދުކޮށްފައިވާއިރު ފަސް ބޭފުޅުންގެ އިސްތަންބޫލް ގައި ފަރިއްކޮޅަށް 7،895ރ. ޚަރަދު ކޮށްފައިވެއެވެ. އަދި ވިސާއަށް 633ރ. ޚަރަދު ކުރައްވާފައިވެއެވެ.