ދައުލަތުގެ މީޑިޔާ، ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރ ކަމަށް ވެލިދޫ ދާޢިރާގެ ކުރީގެ މެމްބަރ ނ.ވެލިދޫ، އަމަން އަލްފާޟިލް ޢަބްދުالله ޔާމީން ރަޝީދު އައްޔަން ކުރައްވައިފިއެވެ.
ސަރުކާރު ހިއްސާވާ ކުންފުނިތަކަށް ވެރިން އައްޔަށް ކުރުމަށް އުފައްދާފައިވާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ވިދާޅުވީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި، ކޯޕަރަޓައިޒް ކުރުމާއި، އަދި މޮނިޓަރކޮށް އިވެލުއޭޓް ކުރުމުގެ ޤާނޫނުގެ މަތިން ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރ ކަމުގެ މަޤާމާއި ޑިރެކްޓަރުންގެ ބޯޑުގެ މެންބަރުކަމުގެ މަޤާމަށް ޢަބްދުالله ޔާމީން ރަޝީދު އައްޔަން ކުރައްވާފައިވާ ކަމަށެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ޕީސީބީން މަޢުލޫމާތު ދެއްވި ގޮތުގައި ޕީއެސްއެމްގެ ޑިރެކްޓަރުންގެ ބޯޑުގެ މެންބަރުކަމުގެ މަޤާމުގައި ހުންނެވި ސ.ހުޅުދޫ، ކަޅުމަގިގެ ޢަބްދުالله ރަޝީދު ވަނީ އެމަޤާމުން ވަކި ކުރައްވާފައެވެ.
ދައުލަތުގެ މީޑިޔާ، ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރުގެ މަޤަމަށް އައްޔަށް ކުރެއްވި ޢަބްދުالله ޔާމީން އަކީ މީގެ ކުރިން ވަރަށް ގިނަ މީޑިޔާ ތަކުގައި މަސައްކަތް ކުރައްވާފައިވާ ބޭފުޅެކެވެ. އެގޮތުން ރާއްޖޭ ޓީވީގަ އާއި ސަންގު ޓީވީގައިވެސް ޢަބްދުالله ޔާމީން މަސައްކަތް ކުރައްވާފައިވެއެވެ.
ސިޔާސީ ގޮތުން ނިމިދިޔަ ރިޔާސީ އިންތިހާބުގެ ފުރަތަމަ ބުރުގައި ޢަބްދުالله ޔާމީން ތާޢީދު ކުރައްވާފައިވަނީ އޭރު ޔާމީން ހުންނެވި ޕާރޓީކަމަށްވާ ޖުމުހުރީ ޕާރޓީގެ ލީޑަރ އަލްފާޟިލް ޤާސިމް އިބުރާޙިމަށެވެ. އެހެން ނަމަވެސް ދެވަނަ ބުރުގައި ޔާމީން ވަނީ ޕީއެންސީއަށް ސޮއިކުރައްވާ މިހާރުގެ ރައީސުލް ޖުމުހުރިއްޔާ ޑރ. މުހައްމަދު މުއިއްޒުއަށް ތާޢިދު ކުރައްވާފައެވެ.
Advertisement
This content is created and paid for by advertisers and does not involve Voice Journalists
