އިންޑިއާގެ ބޮޑުވަޒީރު ނަރެންދުރަ މޯދީ އިންޑިއާގެ ޓެރިޓަރީއެއްކަމުގައިވާ ލަކްޝައްދީބުގެ ރަށަކަށް ޗުއްޓީއެއް ހޭދަކުރައްވަން ވަޑައިގެންފައި އެރަށުގެ ދޮންވެލީގެ ރީތި ބީޗެއްގައި ހިންގަވާފައި ފޮޓޯއެއް ނަންގަވައި އެކްސްގައި ޝެއަރ ކުރެއްވުމުން ރާއްޖޭ ނޫސްވެރިއަކަށް ފެނުނީ އެއީ ދިވެހިރާއްޖެއަށް ދިން އިންޒާރެއް ކަމަށެވެ. އެފޮޓޯގަނޑު އިންޒާރަކަށް ހަދައިގެން އޭނާގެ ނޫހުގައި އެވާހަކަ އޭނާގެ އަމިއްލަ ޖަޒުބާތުތައް ލައިގެން ލިޔުމާއެކު ގިނަބަޔަކަށް އަޅައިގަންނަ ކަމަކަށް އެކަންވިއެވެ.

ދިވެހިރާއްޖެއަށް އިންޑިއާގެ އަސްކަރީ ނުފޫޒު ފޯރުވުމާއި އިދިކޮޅު ޚިޔާލުގެ ބަޔަކު އެނޫން އެބުނެދިން އިންޒާރަށް ރިއެކްޓްކުރިއެވެ. އެއާއެކު ނޫހުން ބޭނުންވި މަގްސަދު ހާސިލުވީ ކަހަލައެވެ. ސޯޝަލް މީޑިއާގައި އެފޮޓޯގަނޑެއް ދައުރުވަމުން ދެގައުމުގެ އެކްޓިވިސްޓުންތަކެއް އެއަށް ކޮމެންޓްކުރަމުންގޮސް ރާއްޖޭގައި ސަރުކާރުގައި ސިޔާސީ މަގާމްތަކެއް ފުރާ ޒުވާން ކުދިންތަކެއް އިންޑިއާގެ ބޮޑުވަޒީރަށް ނިސްބަތްކޮށް ކުރި ނެގެޓިވްކޮމެންޓްތަކަކާ ގުޅިގެން އެމީހުންގެ މަގާމްތަކުން ވަގުތީގޮތުން އިއްޔެ މިވަނީ ސަސްޕެންޑްކޮށްފައެވެ.

މީގައި އެންމެ ހައިރާންވާންޖެހޭ ކަމަކީ މޯދީ އެޓްވީޓެއް ކުރައްވާފައި ދިވެހިރާއްޖެއާ ބެހޭގޮތުން އެއްޗެއް ވިދާޅުވީއަކީވެސް ނޫނެވެ. އެގައުމުގެ އެރަށްތަކުގައި ދިވެހިރާއްޖޭގެ ރިސޯޓްތައް ހަދާފައި ހުންނަގޮތަށް ރިސޯޓްތައް ހެދުމުގެ ވާހަކަތަކަކީ އާ ވާހަކަތަކެއްވެސް ނޫނެވެ. އެއީ ރީތި ރަށްތަކެއްވީމާ އެރަށްތަކުގައި ރިސޯޓްހަދައިގެން ހިންގަންވީއެވެ. އެޕްރޮޖެކްޓް އިންޑިއާ ސަރުކާރުން ޕްލޭން ކޮށްގެން އުޅޭތާވެސް ކިތަންމެ ދުވަހެކެވެ. ސައުދީ އަރަބިއްޔާއިން ރެޑްސީގައި ދިވެހިރާއްޖެ ކަހަލަ ރީތިރަށްތަކެއް ހަދައިގެން އެތާގައި ވަރަށް އެއްގޮތް މޮޑެލްތަކަކަށް ރިސޯޓް އެބަހަދައެވެ. ތުރުކީގައިވެސް ދިވެހިރާއްޖޭގެ ނަމުން މަޝްހޫރުކޮށްގެން އުޅޭ ރީތި ރިސޯޓްރަށެއް އެބަހުއްޓެވެ. މޯދީ އެރަށްތަކަށް ޒިޔާރަތްކުރައްވައި ޗުއްޓީ ހެއްދެވީ އަލަކަށްވެސް ނޫނެވެ. އެހެންވީމާ އިންޑިއާގެ ބޮޑުވަޒީރު އެގައުމުގެ ރަށަކަށް ވަޑައިގެން ރާއްޖޭގެ ރަށެއްކަހަލަ ރަށެއްވީމާ އެތާގައި ޓޫރިޒަމް ޕްރޮޖެކްޓެއް ހިންގުމުގެ ވާހަކައެއް ދެއްކެވީމާ ދިވެހިރާއްޖެއާއި އެކަމާގުޅުވައިގެން ރާއްޖޭގެ ނޫސްތަކުން އެކަންތައް ބޮޑުކޮށް ޑިޕްލޮމެޓިކް މައްސަލަ ގަނޑެއް އުފެދޭ ހިސާބަށް އުފުލަންޖެހޭ ސަބަބެއްވެސް ނެތެވެ.

އެކަމުގައި އޮތީ އެންމެ ސަބަބެކެވެ. އިންޑިއާގެ ސިފައިން ދިވެހިރާއްޖެއިން ގެންދިއުމަށް ރައީސް ޑޮކްޓަރ މުޙައްމަދު މުއިއްޒު ގެންގުޅުއްވާ ސިޔާސަތަކީ ގެއްލުންބޮޑު ސިޔާސަތެއްކަން ދިވެހިންނަށް ވިސްނައިދޭން ދިވެހިންގެ ބަޔަކު ބޭނުންވުމެވެ. މިއީ މިނިވަންކަން އޮތީމާ ފާޅުގައި ބައެއް މީޑީއާތަކުން ފަށައިގެން ހިންގާ ހަރަކާތެއްވެސް މެއެވެ. އެހެންޏާ އިންޑިއާގެ ވެރިކަންކުރާ ޕާޓީގެ ސިޔާސީ ލީޑަރުން ދިވެހިރާއްޖެއަށް ބަދުބަސްބުނެ ދިވެހިރާއްޖެއަށް ސިފައިން އަރުވައި ދިވެހި ގައުމުގެ ސިޔާދަތާއި މިނިވަންކަމާއި ތޮޅި ގައުމު އަޅުވެތިކުރަން ގޮވައި އަދި އިންޑިއާގެ މީޑިއާތަކުން މިހާރު ރާއްޖޭގެ ރައީސް ސިފަކުރާ އެންޓީ އިންޑިއާގެ ސޫރައާމެދު އަޅައިލުމެއް ނެތި މިގޮތަށް ފޮޓޯގަނޑެއް އިންޒާރަކަށް ހަދައިގެން ދިވެހިންގެތެރޭގައި އެނބުރުމުގެ އޮތީ ކޮން މަގްސަދެއް ކަމެއް ނުވިސްނެއެވެ. ރަންގަލަމަކުން ފޮޓޯގަނޑެއްގައި ކުރަހައި ކުލަޖައްސާފައި އެއަށް ޕެޓްރޯލްއަޅައި ރޯކޮށްގެން ރާއްޖޭގައި ފެތުރައިގެން ނޫސްވެރިކަމުގެ އުސްމިންތަކަށް އެރިއްޖެކަމަށް ދެކެވަޑައިގަތަސް ދިވެހި ގައުމުގެ މަސްލަހަތަށް އެއިން ލިއްބައިދިން ގެއްލުމާމެދުވެސް ވިސްނައިލުމަކީ އެންމެ ރަގަޅުކަމަކަށް ނުވާނެތޯއެވެ.

ދިވެހިރާއްޖެއަށް ނާންނަންގޮވާ މަޝްހޫރު މީހުން މީގެކުރިންވެސް އެހެން ގޮވައެވެ. އެހެންގޮވާ ބައެއް މަޝްހޫރުމީހުން އެތަކެއް ފަހަރު ރާއްޖެއަށް ޒިޔާރަތްކޮށްވެސް ހަދައެވެ. ދިވެހިރާއްޖޭގެ ގުދުރަތީ ރީތިކަމާއި މިގައުމަށް ދުނިޔޭގެ ރަންވަނަ ލިބޭތީ ހަސަދަވެރިވާ ކިތަންމެ ބަޔަކު އުޅެއެވެ.

މިކަމުގައި ސަރުކާރުން އެޅީ ރަނގަޅު ފިޔަވަޅެކެވެ. ސަރުކާރު މަގާމެއްގައި ހުރެ އިންޑިއާގެ ބޮޑުވަޒީރަށް ނިސްބަތްކޮށް ބަދުބަސް ބުނެވިގެން ނުވާނެއެވެ. އިންޑިއާ ސަރުކާރުންވެސް މިގޮތަށް ދިވެހިރާއްޖެއަށް ފުރައްސާރަކޮށް ވާހަކަދައްކާ ވެރިކަން ކުރާ ޕާޓީގެ އިސްވެރިންނާމެދު ފިޔަވަޅު އަޅާނަމަ ހާދަހާވާ ރަނގަޅެއެވެ. އެކަމަކު އެގައުމުން ކުރާކަމެއް އަޅުގަނޑުމެން ބަލާކަށެއްވެސް ނުޖެހެއެވެ. ސަރުކާރުން އެޅި ފިޔަވަޅު ރަނގަޅެވެ. މިމައްސަލާގައި ފޮޓޯގަނޑެއް އިންޒާރަކަށް ހަދައިގެން ފެތުރި ގަލަމުގެ ވެރިމީހާ ވެސް އެފުތުރީ ފިތުނައެކޭ ނުބުނެވޭނެތޯއެވެ.